ریحانہ بستی والا ممبئی

	رامانند نے پچیس سے زیادہ فلمیں اور ایک درجن سے زیادہ ٹی وی ڈرامے بنائے۔

رامانند ساگر کی عمر ستاسی برس تھی اور انہیں بھارتی ٹی وی کی مشہور اساطیری سیریل ’رامائن‘ کی تخلیق پر بہت شہرت حاصل ہوئی تھی۔

رامانند ساگر نے اپنے کیرئر کا آغاز بطور فلم ٹیکنیشن کیا تھا اور ممبئی کی فلم نگری میں ترقی کرتے کرتے وہ ایک کہنہ مشق فلمساز بن گئے تھے۔

رامانند نے پچیس سے زیادہ فلمیں اور ایک درجن سے زیادہ ٹی وی ڈرامے بنائے۔ ان کی چند یادگار فلموں میں انسانیت ، کوہ نور ، پیغام ، گھونگھٹ ، زندگی ، آنکھیں ، للکار ، آرزو ، گیت اور بغاوت کے نام آتے ہیں۔

	ٹی وی سیریل رامائن بھارت میں بہت مقبول ہوئی تھی

رامانند ساگر کی زندگی پرگیت کار ،مکالمہ نگار اور معروف صحافی حسن کمال نے بی بی سی اردو ڈاٹ کام سے بات کرتے ہوئے کہا کہ ’ساگر جی جو کام کرتے ،اس میں ڈوب کر کرتے۔ وہ بہت روشن خیال انسان تھے۔ان کا علم بہت وسیع تھا۔ہر فن پر ہر موضوع پر آپ ان سے گھنٹوں گفتگو کر سکتے تھے۔وہ سیکولر مزاج انسان تھے اور وقت کے پابند‘۔

حسن کمال کا کہنا ہے کہ انہوں نے ساگر جی کے ساتھ فلم’سلمٰی‘ میں کام کیا تھا جس میں ہیروئین پاکستانی اداکارہ سلمی آغا اور ہیرو راج ببر تھے۔ اس فلم کے نغمے حسن کمال نے ہی لکھے تھے۔

ساگر کو اردو زبان سے بہت لگاؤ تھا ۔وہ ایک اچھے ناول نگار اور افسانہ نگار بھی تھے۔ برصغیر کی تقسیم پر بھی رامانند ساگر نے ایک ناول’اور انسان مر گیا‘ لکھا۔ اس کے علاوہ ان کے کئی افسانے اردو کے رسائل اور جرائد میں شائع ہو چکے ہیں۔