 |  آرتھر ملر اپنی تحریروں کے ذریعے امریکی اسٹیبلشمنٹ پر کڑی تنقید کرتے تھے۔ |
’دی کروسبل‘ اور ’ ڈیتھ آف دی سیلز مین‘ کے خالق آرتھرملر نواسی سال کی عمر میں انتقال کرگئے۔وہ کینسر اور دل کے امراض میں مبتلا تھے۔ آرتھر ملر کی اسسٹنٹ جولیا بولس کے مطابق ان کا انتقال کنکٹیکٹ میں ان کی رہائشگاہ پر ہوا۔ان کی موت کی وجہ دل کا دورہ بتائی گئی ہے۔ آرتھر ملر بیسویں صدی کے چند مشہور ترین امریکی مصنفین میں سے تھے جو اپنی تحریروں کے ذریعے امریکی اسٹیبلشمنٹ پر کڑی تنقید کرتے تھے۔ آرتھر ملر 1915 میں نیو یارک میں پیدا ہوئے اور ان کے والد اگرچے ایک کپڑوں کی فیکٹری کے مالک تھے لیکن 1929 میں امریکی معیشت میں آنے والی بدحالی سے متاثر ہوئے۔
|  آرتھر ملر اور مارلن منرو |
آرتھر ملر نے ذاتی محنت سےصحافت کے شعبے میں اپنی تعلیم کے اخراجات برداشت کئے اور وہ ایک ریڈیکل مصنف کے طور پر ابھر کر سامنے آئے۔ وہ اپنے لبرل خیالات کی وجہ سے جلد ہی امریکی اسٹیبلشمنٹ کی طرف سے ملک میں شروع کی جانے والی کمیونسٹ مخالف مہم میں زیر اعتاب آئے لیکن تفتیش کے دوران اپنے کمیونسٹ دوستوں کے نام ظاہر کرنے سے انکار کردیا۔ ان کی شہرت کی ایک اور وجہ 1956 میں مشہور امریکی اداکارہ مارلن منرو سے ان کی شادی بھی تھی۔ ایک سنجیدہ دانشور اور مصنف کے ایک فلمسٹار کے ساتھ اس ملاپ پر کئی لوگوں کو بہت حیرانگی بھی ہوئی تھی۔ آرتھر ملر کو 1949 میں تینتیس برس کی عمر میں ’ ڈیتھ آف دی سیلز مین‘ لکھنے پر ادب کا پلٹزر انعام ملا تھا۔ آرتھر ملر کے دیگر مشہور ڈراموں میں ’ اے ویو فرام اے برج‘ اور ’دی لاسٹ یانکی‘ شامل ہیں۔ برطانوی مصنف ہیرالڈ پنٹر نے آرتھر کی وفات پر کہا کہ ’ وہ ایک شاندار دوست تھے اور میں ان کی وفات کی خبر سن کر ششدر رہ گیا‘۔ ان کا یہ بھی کہنا تھا کہ ’ آرتھر ایک عظیم مصنف اور بڑے آدمی تھے۔ ان کے ڈرامے بیسویں صدی کے بہترین ادب میں سے ہیں‘۔ | 
یہ صفحہ دوست کو ای میل کیجیئے
پرِنٹ کریں
