ریحانہ بستی والا
ممبئی |  |
 فلم میں امیتابھ کا کردار بالا صاحب ٹھاکرے سے متاثر ہوکر بنایا گیا ہے۔ |
فلمساز رام گوپال ورما کی نئی فلم ’سرکار‘ جو ماریو پوزو (Mario Puzo) کے ناول ’گاڈ فادر‘ سے متاثر ہو کر بنائی گئی ہے اس ہفتے انڈیا میں ریلیز ہورہی ہے۔ فلم کے بارے عام خیال یہی ہے کہ اس کے پلاٹ کو مقامی رنگ دینے کی خاطر مرکزی کردار کو ممبئی کے سخت گیر رہنما بالا صاحب ٹھاکرے کی شخصیت پر ڈھالا گیا ہے۔ فلم میں سرکار، گاڈ فادر یا ’بالا صاحب ٹھاکرے‘ کا کردار امیتابھ بچن ادا کر رہے ہیں۔ ان کے ہاتھ اور گلے میں اسی طرح رودراکش ہے جس طرح بالا صاحب ٹھاکرے پہنتے ہیں اور پیشانی پر بڑا سا تلک بھی موجود ہے۔ لیکن رام گوپال ورما کا کہنا ہے کہ یہ فلم یقینناً بالا صاحب ٹھاکرے کی شخصیت سے متاثر ہو کر بنائی گئی ہے لیکن کہانی ان کی زندگی کی عکاسی نہیں کرتی ہے۔
|  فلم میں ابھیشیک بچن کے سامنے قطرینہ کیف ہیں۔ |
فلم میں ’سرکار‘ کا کردار کسی ڈان کا نہیں ہے بلکہ وہ ایک با رعب شخصیت کا مالک ہے جس کی اپنے لوگوں پر دھاک ہے۔ وہ قانون اور ضوابط کو بالائے طاق رکھ کر اپنے انداز میں فیصلے کرتا ہے اور اس کا حکم ہی اس کے لوگوں کے لیے خدائی درجہ رکھتا ہے۔ سرکار کا ماننا ہے کہ جو کچھ زندگی میں ہے وہ صرف طاقت ہے اور اس کے علاوہ کچھ نہیں ۔امیتابھ بچن اور ابھیشیک بچن پہلی مرتبہ پردے پر ایک ساتھ بنٹی اور ببلی میں آئے لیکن سرکار میں فلمی باپ بیٹے بنے ہیں اور دونوں میں خیالات اور اصولوں کا ٹکراؤ ہوتا ہے۔ ابھیشیک تعلیم حاصل کرنے کے لیے ملک سے باہر جاتا ہے اور وہاں اسے ایک لڑکی سے پیار ہو جاتا ہے۔ جب وہ واپس آتا ہے تو اسے باپ کی کئی باتوں سے اختلاف ہوتا ہے اور باپ کا یقین ہے کہ دنیا میں کچھ بھی صحیح یا غلط نہیں بلکہ صرف طاقت ہی سب کچھ ہے۔
|  ڈائیریکٹر رام گوپال ورما نے اس فلم میں ابھیشیک کی اداکاری کی بہت تعریف کی ہے۔ |
فلم میں امیتابھ کی بیوی سپریہ پاٹھک بنی ہیں بڑے بیٹے کا رول کے کے مینن کر رہے ہیں اور ان کی بیوی رخسار ہیں جبکہ ابھیشیک کے سامنے قطرینہ کیف ہیں ۔رام گوپال ورما نے اس فلم میں ابھیشیک بچن کے کام کی بہت تعریف کی ہے انہوں نے یہاں تک کہہ دیا کہ ابھیشیک اداکاری میں امیتابھ بچن سے کئی جگہ بہتر ہیں۔ لیکن ابھیشیک اسے نہیں مانتے ان کا کہنا ہے کہ ان کے والد اداکاری کے انسٹی ٹیوٹ ہیں۔ جونیئر امیتابھ کی پندرہ فلاپ فلموں کے بعد حال ہی میں کئی فلمیں کامیاب ہوئی ہیں جن میں ’یوا، دھوم ، اور بنٹی اور ببلی‘ شامل ہیں۔ | 
یہ صفحہ دوست کو ای میل کیجیئے
پرِنٹ کریں
