ایوی ایٹر کی گیارہ شعبوں میں نامزدگی ہوئی تھی

’ملین ڈالر بے بی‘ کو بہترین فلم کے علاوہ بہترین ہدایت کاری، بہترین اداکاری اور بہترین معاون اداکاری کے شعبوں میں بھی آسکر ایوراڈ دیے گئے۔ اس فلم کے ہدایت کار کلنٹ ایسٹ وڈ تھے جبکہ فلم میں مرکزی کردار ہلیری سوینک اور معاون اداکار کا کردار مارگن فری مین نے ادا کیا۔

مشہور اداکارہ کیٹ بلانچٹ نے فلم ایوی ایٹر میں بہترین معاون اداکارہ کا ایوارڈ حاصل کیا۔ اس کے علاوہ اس فلم نے چار اور شعبوں میں بھی ایوارڈ جیتے۔
جبکہ ایوی ایٹر کی گیارہ شعبوں میں آسکر کے لیے نامزدگی ہوئی تھی۔

کیٹ بانچٹ نے اپنی تقریر میں کیتھرین ہیپ برن کو خراج عقیدت پیش کیا

ہلیری سوینک نے اپنی بہترین اداکاری پر اپنی زندگی کا دوسرا آسکر جیتا ہے۔ ملین ڈالر بے بی میں انہوں نے ایک خاتون باکسر کا کردار ادا کیا اور اس طرح انہوں نے اینٹ بینگ، کیٹ ونسلیٹ اور ایمیلڈا سٹانٹن کو مات دے دی۔

ایوارڈ جتینے کے بعد انہوں نے کہا کہ وہ نہیں جانتی کہ زندگی میں انہوں نے ایسا کیا کیا ہے جس کی وجہ سے انہیں یہ ایوارڈ دیا گیا۔ انہوں نے کہا کہ ’میں ٹریلر پارک کی عام سی لڑکی ہوں جس کے اپنے خواب ہیں۔‘

فری مین نے اپنی تقریر میں کلنٹ ایسٹ وڈ کا شکریہ ادا کیا اور فلم کو محنت کی لگن کا ثمر قرار دیا۔

اب تک انہیں چار مرتبہ آسکر کے لیے نامزد کیا جا چکا ہے لیکن وہ پہلی دفعہ آسکر جیتنے میں کامیاب ہوئے ہیں۔

بلانچیٹ نے کہا کہ یہ ان کی زندگی کا سب سے بڑا ’سرپرائز‘ اور اعزاز ہے۔ انہوں نے فلم کے ہدایت کار مارٹن سکورسیسی کو بھی خراج عقدیت پیش کیا اور کہا کہ ’ میں امید کرتی ہوں کہ میرا بیٹا ان کی بیٹی سے شادی کرئے گا۔‘

ایوایٹر کو بہتری ایڈٹنگ ، آرٹ ڈائریکٹر، لباس اور عکاسی پر بھی آسکر ایوارڈ دیے گئے۔