 |  یہ ابھی تک واضح نہیں ہو سکا ہے کہ جیمز بانڈ کا کردار کون ادا کرے گا |
جیمز بانڈ سیریز کی اگلی فلم مصنف آئن فلیمنگ کی پہلی کتاب ’ کیسینو رویال‘ پر بنے گی۔ جیمز بانڈ فلم گولڈن آئی کے ہدایت کار مارٹن کیمبل اس فلم میں بھی ہدایت کاری کے جوہر دکھائیں گے۔ یہ جیمز بانڈ سیریز کی ا کیسویں فلم ہے اور یہ ابھی تک واضح نہیں ہو سکا ہے کہ جیمز بانڈ کا کردار کون ادا کرے گا۔ جیمز بانڈ سیریز کی گزشتہ چار فلموں میں مرکزی کردار ادا کرنے والے پیئرس براسنن کا کہنا ہے کہ فلم کے پروڈیوسروں نے پہلے تو اس فلم کے لیے ان سے رابطہ کیا تاہم بعد میں انہیں رد کر دیا گیا۔ امید ہے کہ’ کسیسنو رویال‘ کی شوٹنگ اس وقت شروع ہو گی جب مارٹن کیمبل اپنی فلم ’لیجنڈ آف زورو‘ مکمل کر لیں گے۔ یہ فلم ’ماسک آف زورو‘ نامی فلم کا دوسرا حصہ ہے۔ فلم کی پروڈیوسر مائیکل ولسن اور باربرا بروکولی کو امید ہے کہ ’ کسیسنو رائل‘ 2006 میں نمائش کے لیے پیش کی جا سکے گی۔ اس فلم کا سکرپٹ نیل پروِس اور رابرٹ ویڈ نے تحریر کیا ہے جو کہ پہلے بھی بانڈ فلموں کے سکرپٹ لکھ چکے ہیں۔ ایم جی ایم کے نایب صدر کرس میگرک کا کہنا ہے کہ ’ مارٹن کیمبل ایک شاندار ہدایت کار ہیں۔ گولڈن آئی ایک زبردست فلم تھی اور اس نے جیمز بانڈ کے نام کو تقویت بخشی تھی۔ ہم بہت خوش ہیں کہ مارٹن نے نئی بانڈ فلم کی ہدایت کاری کی ذمہ داری اٹھائی ہے‘۔ ’ کسیسنو رائل‘ پر 1967 میں جان ہیوسٹن نے ایک فلم بنائی تھی جس میں ڈیوڈ نیون نے مرکزی کردار ادا کیا تھا۔ | 
یہ صفحہ دوست کو ای میل کیجیئے
پرِنٹ کریں
