عائشہ جاوید اکرم

سشمیتا سمیت ہندوستانی فنکاروں کے لیے سخت حفاظتی انتظامات

تین مئی کو بھارت کے مشہور اداکار سیف علی خان جن کا گانا ’اولے اولے‘ ابھی تک بچوں کی زبان پر ہے کراچی پہنچے ۔

سیف علی خان یہاں سیر سپاٹے کے لئے نہیں بلکہ سابق مس یونیورس ششمیتا سین اور ایم ٹی وی کی ملائکہ اروڑہ کے ہمراہ ایک سٹیج شو کرنے آئے ہیں ۔

اس شو کے منتظم پاکستان کے پاپ سنگر فخرعالم ہیں جنہوں نے حال ہی میں ایک ایونٹ مینجمنٹ کمپنی انڈس ٹری پروڈکشن کے نام سے بنائی ہے۔

کراچی کے شاندار عریبین سی کنٹری کلب میں یہ شو چار مئی کی شام ہو رہا ہے۔ کراچی کے اعلیٰ طبقات بڑی بے چینی سے اس شو کا انتظار کر رہے ہیں۔ اس شو کے ٹکٹ چھ ہزار سے پندرہ ہزار تک کی مالیت کے ہیں۔

عادل خان نے بی بی سی کو یہ بھی کو بتایا کہ اس شو کا ایک مقصد اقوام متحدہ کے بچوں کے ادارے یونیسیف کے لئے فنڈ اکٹھے کرنا ہے ۔

ایک آئٹم جس کا سب کو بے چینی سے انتظار ہے وہ سیف علی خان کا سولو پروگرام ہے جس میں وہ پینتالیس منٹ تک اپنی مشہور فلموں کے گانوں پر رقص پیش کریں گے۔

عادل کا یہ کہنا ہے کہ سیف پاکستان آ کر یہاں کے لوگوں کی محبت اور خلوص دیکھ کر بہت متاثر ہوئے اور آئندہ آنے کی امید رکھتے ہیں۔

دہلی میں ملائکہ نے بی بی سی سے بات چیت کرتے ہوئے بتایا کہ وہ پاکستان آنے کے لئے بے تاب ہیں کیونکہ اس سے پہلے انہوں نے پاکستان سے متعلق صرف ٹیلی وژن پر دیکھا تھا یا کتابوں میں پڑھا تھا۔

ملائکہ کو اس بات کی بھی خوشی تھی کہ وہ ایسے شائقین کے سامنے اپنے فن کا مظاہرہ کریں گی جن سے ان کا تعارف اس سے پہلے کبھی نہیں ہوا تھا۔

’چونکہ میں نے اس سے پہلے سیف اور ششمیتا کے ساتھ کبھی شو نہیں کیا، اس لئے مجھے یہاں آنا اور بھی اورمشکل لگ رہا ہے۔‘

سیف علی خان کا گانا ’اولے اولے‘ ابھی تک بچوں کی زبان پر ہے

ملائکہ کا شوق دیکھنے کے بعد مجھے یہ سن کر بہت حیرانی ہوئی کہ جب پہلی بار ان سے شو کے بارے میں رجوع کیا گیا تو وہ مکمل طور پر راضی نہیں ہوئی تھیں کیونکہ پاکستان کے حالات کے بارے میں پڑھنے کے بعد وہ یہاں آنے سے گھبرا رہی تھیں۔

لیکن شو کے منتظمین اور پاکستان جانے والی دیگر فنکاروں کے ساتھ بات چیت کے بعد ان کے شبہات دور ہوگِئے بلکہ اب تو ملائکہ کا کہنا ہے کہ وہ ان کو اس بات پر فخر ہے کہ وہ اس ثقافتی تبادلہ میں حصہ لے رہی ہیں۔

یہ دوسرا موقع ہے کہ اس سال بالی ووڈ کے نامور فنکار شائقین کا دل بہلانے پاکستان آئے ہیں ۔

اپریل میں لاہور کے رائل پام کنٹری کلب میں شاندار تقریب ہوئی جس میں شلپا سیٹھی اور ایکشن ہیرو اکشے کمار نے شرکت کی۔ ان کے ہمراہ پاکستان کے بیشتر فنکار جن میں گلوکار علی ظفر اورعمر شریف نے بھی شرکت کی۔