محمد ارسلان
کراچی |  |
تمام رشتوں کو میں گھر پہ چھوڑ آیا تھا پھر اس کے بعد مجھےکوئی اجنبی نہ ملا کراچی کے موہٹہ پیلس میں بنے خوبصورت سٹیچ پر جب بھارتی گلوکار جگجیت سنگھ نے یہ شعر پڑھ کر تقریب کا آغاز کرنا چاہا تو وہاں موجود لوگوں کی بڑی تعداد نے تالیاں بجاکر جگجیت کو پاکستان میں خوش آمدید کہا۔ اُنیس سو ستر سے گائیکی کا آغاز کرنے والے جگجیت سنگھ نے چوبیس سال پہلے پاکستان کے شہر کراچی میں اپنے فن کا مظاہرہ کیا تھا۔ اور اب پاکستان انٹرنیشنل ائیر لائنز کے نئے طیارے 777 میں بیٹھ کر جگجیت اسی کی تقریب میں شرکت کرنے پاکستان آئے ہیں۔ کراچی کی جس تاریخی عمارت کو لوگ بے حد شوق سے دیکھتے ہیں وہیں جب چوبیس سال بعد جگجیت سنگھ سٹیچ پر آئے تو بوڑھے، جوان، لڑکےاور لڑکیاں تقریباً تمام ہی عمرکے لوگ جگجیت سنگھ کی تمام غزلیں اُن کے ساتھ گارہے تھے۔ بہت ہی کم کوئی ایسا وقت دیکھنے میں آتا تھا کہ جب لوگ اُن کی آواز سے آواز ملا کرنہیں گاتےتھے۔ جگجیت سنگھ کے ذاتی معاون کلدیپ دیسائی کےمطابق اُنہوں نے کبھی بھی کسی پروگرام میں دو یا ڈھائی گھنٹے سے زیادہ نہیں گایا مگر جب جگجیت پاکستانی عوام کے سامنے گانے بیٹھے تو انہوں نے تین گھنٹوں سے زیادہ اپنے فن کا مظاہرہ کیا۔ آدھی رات کے گزرنے کے بعد بھی تمام لوگ اُسی پرزور انداز میں جگجیت کی غزلیں سن رہے تھے اور ان کے ساتھ گا بھی رہے تھے۔ لوگ تقریباً پانچ سے زائد گھنٹے صرف جگجیت سنگھ کو سننے کے لئے بیٹھے رہے۔ اپنے استقبال اور فن کا لمبا مظاہرہ کرنے کے بعد جگجیت سٹیچ سے اترے تو بہت خوش نظر آرہے تھے، انہوں نے اس خواہش کا اظہار کیا کہ ’اتنا چاہنے والی عوام کے سامنے وہ اور گانا چاہتے ہیں‘ مگر وقت کی کمی کی وجہ سے انہیں جانا پڑھ رہا ہے۔ ان کا کہنا تھا’ اتنا چاہنے والی عوام مجھے یہاں ملی کہ مجھے لگ ہی نہیں رہا ہے کہ میں اپنے ملک سے دور آیا ہوں، مجھے ایسا لگ رہا ہے جیسے میں اپنے لوگوں کے ہی درمیان گا رہا ہوں۔‘ اُنہوں نے کہا کہ ’میں چاہتا ہوں کہ دونوں ملکوں کے لوگ آپس میں مل جل کر رہیں اور اِن میں مزید پیار بڑھے۔‘ دوسرے ملکوں میں جگجیت سنگھ اپنے فن کا مظاہرہ پاکستانی نامور گلوکار مہدی حسن اور غلام علی کے ساتھ کرتے رہے ہیں۔ ایسے بہت سارے مشہور گلوکاروں کو برصغیر کے فنکار کہا جاتا ہے۔ کیونکہ بھارت اور پاکستان دونوں ملکوں میں ایک دوسرے ملک کے گلوکاروں کے قدردان موجود ہیں۔ اس موقع پر جگجیت سنگھ نے مہدی حسن کی صحت یابی کے لئے تمام لوگوں سے دُعا کی اپیل کی اور ان کے علاج کے لئے فنڈ دینے کی درخواست کی وہاں موجود مختلف شعبوں سے تعلق رکھنے والے افراد نے جگجیت کی خواہش کا احترام کرتے ہوئے اُسی وقت مہدی حسن کے علاج کے لئے بھاری رقم دینے کا اعلان کیا جس کی کل لاگت پچاس لاکھ سے زائد تھی۔ | 
یہ صفحہ دوست کو ای میل کیجیئے
پرِنٹ کریں
