رندیپ ہوڈا ’سلطان‘ کی شوٹنگ کے دوران بےہوش

دہلی میں فلم کی شوٹنگ کے دوران اچانک بےہوش ہونے والے اداکار رندیپ ہوڈا کو ہسپتال میں داخل کروایا گیا ہے جہاں پیر کو ان کا آپریشن کیا جانا ہے۔

رندیپ ان دنوں فلم ’سلطان‘ کی شوٹنگ میں مصروف ہیں اور اسی دوران اتوار کی شام وہ پیٹ میں درد کے سبب بے ہوش ہو گئے تھے۔

فلم کی ترجمان کی جانب سے جاری کیے گئے ایک بیان میں بتایا گیا ہے کہ رندیپ اپینڈکس کے درد میں مبتلا تھے اور یہی ان کی بےہوشی کی وجہ بنا۔

ترجمان کا کہنا ہے کہ ’رنديپ اس مرض میں کافی دنوں سے مبتلا تھے اور کچھ دنوں سے اس مرض کی وجہ سے کچھ زیادہ ہی پریشان تھے لیکن شوٹنگ کے شیڈول کی وجہ سے وہ اسے نظر انداز کر رہے تھے۔‘

رندیپ اس فلم میں اداکار سلمان خان کے کوچ کا کردار ادا کر رہے ہیں۔

اتوار کو جب وہ شاٹ کی تیاری کر رہے تھے تبھی انہیں درد اٹھا اور پھر وہ بے ہوش ہوگئے۔

فلم کی ترجمان کے مطابق انھیں دہلی کے فورٹز ہسپتال میں داخل کروایا گیا ہے جہاں پیر کی شام ان کا آپریشن کیا جائے گا۔

رنديپ ہوڈا گذشتہ کچھ وقت سے کافی مصروف ہیں اور وہ ایک ساتھ تین فلموں میں کام کر رہے ہیں۔

اس میں سب سے پہلی فلم ’سربجیت‘ دوسری ان کی سولو فلم ’لال رنگ‘ اور تیسری ’سلطان‘ ہے۔