سپین کی لالہ گنا رویو نئی حسینہِ عالم

سپین کی میریا لالہ گنا رویو مس ورلڈ 2015 قرار پائی ہیں۔

چین کے جنوبی شہر سانیا میں انھوں نے 100 سے بھی زیادہ ممالک کی حسیناؤں کو شکست دے کر یہ خطاب حاصل کیا ہے۔

روس کی صوفیہ نكیچك رنرز اپ رہیں جبکہ انڈونیشیا کی ماریا ہرفنتی نے تیسرا مقام حاصل کیا۔

مس ورلڈ کا خطاب حاصل کرنے کے بعد بارسلونا کی 23 سالہ ماڈل لالہ گنا نے کہا ’میرے خیال سے یہ ایک اچھا فیصلہ ہے کیونکہ مس ورلڈ میں ہمارے جسم کو نہیں بلکہ ہماری روح کو دیکھا جاتا ہے۔‘

انھوں نے فارمیسی میں ڈگری حاصل کی ہے اور غذائیت میں ماسٹرز کرنا چاہتی ہیں۔ خیال رہے کہ ٹاپ ماڈلنگ کے زمرے میں بھی وہ سرفہرست رہیں اور پھر انھوں نے ججز کو اپنے خطاب عام کے دوران متاثر کر کے یہ خطاب حاصل کیا۔

چین کے سانیا شہر میں ہونے والے رواں سال کے مس ورلڈ کے فائنل مقابلے کو دنیا بھر میں تقریبا ایک ارب لوگوں نے ٹی وی پر دیکھا۔

گذشتہ سال منتخب ہونے والی مس ورلڈ جنوبی افریقہ کی رولین سٹراس نے سپین کی رويو کو مس ورلڈ کا تاج پہنایا۔

اس مقابلے کی اہم دعویدار تسلیم کی جانے والی بھارت کی آدیتی آریہ اور انگلینڈ کی نتاشا ہمنگس کو پہلی 20 فائنلسٹوں میں بھی جگہ نہیں مل سکی۔

اس بار مس ورلڈ کا مقابلۂ حسن تنازعات کا بھی شکار رہا کیونکہ اس میں چینی نژاد مس کینیڈا اینستاسيا لن کو اس مقابلۂ حسن میں شرکت کی اجازت نہیں دی گئی۔

مس کینیڈا لن کو چین جانے والے طیارے پرسوار نہیں ہونے دیا گيا۔

اینستاسيا چین کی مذہبی پالیسی کی ناقد رہی ہیں اور وہ فالن گونگ عقیدے کی پیروکار ہیں جس پر چین میں سنہ 1999 سے پابندی عائد ہے۔

پہلی بار مس ورلڈ کا مقابلہ 64 سال قبل لندن میں ہوا تھاجس میں سویڈن کی کک ہاکونسن فاتح رہی تھیں۔