بھارت میں عدم رواداری پر اے آر رحمان عامر خان سے متفق

بھارت میں عدم رواداری کے معاملے پر ابھی ایوارڈز کی واپسی اور پھر اس سلسلے میں شاہ رخ خان اور عامر خان کے بیانات پر شروع ہونے والا تنازع تھما نہیں تھا کہ اب معروف موسیقار اے آر رحمان بھی اس میں شامل ہو گئے ہیں۔

آسکر انعام یافتہ موسیقار نے منگل کو کہا کہ وہ عامر خان کے بیان سے متفق ہیں اور انھیں بھی ملک میں بڑھتی عدم رواداری سے سابقہ پڑا ہے۔

<link type="page"><caption> ’کِرن نے مجھ سے پوچھا کیا ملک چھوڑ دینا چاہیے‘</caption><url href="http://www.bbc.com/urdu/entertainment/2015/11/151123_amir_khan_india_violence_rh.shtml" platform="highweb"/></link>

<link type="page"><caption> بھارت میں عدم رواداری پر شاہ رخ خان کو تشویش</caption><url href="http://www.bbc.com/urdu/entertainment/2015/11/151102_shahrukh_intolerance_in_india_mb.shtml" platform="highweb"/></link>

انھوں نے اس حوالے سے بتایا کہ چند ماہ قبل ایک مسلم تنظیم نے ان کے خلاف فتوی جاری کیا تھا۔

اے آر رحمان نے بھارت کے ساحلی شہر گوا میں جاری 46 ویں انٹرنیشنل فیسٹیول آف انڈیا میں این ایف ڈی سی کے فلم بازار کے پروگرام میں بات کرتے ہوئے کہا: میں چند ماہ قبل اسی طرح کے حالات سے دوچار ہوا تھا۔

انھوں نے مزید کہا: کچھ بھی پرتشدد نہیں ہونا چاہیے۔ ہم سب انتہائی مہذب لوگ ہیں اور ہمیں دنیا کو بتا دینا چاہیے کہ ہماری بہترین تہذیب ہے۔‘

ایوارڈ لوٹانے کے معاملے پر کیے جانے والے ایک سوال کے جواب میں انھوں نے کہا: ’میرے خیال سے لوگ جو کر رہے ہیں وہ بہت شاعرانہ ہے۔ ہمیں دنیا کے سامنے مثال قائم کرنی چاہیے کیونکہ ہم مہاتما گاندھی کے سرزمین کے لوگ ہیں جنھوں نے دنیا کو یہ دکھا دیا تھا کہ بغیر تشدد کے کیسے انقلاب لایا جا سکتا ہے۔‘

خیال رہے کہ ممبئی میں قائم رضا اکیڈمی نے ان کے خلاف ایرانی فلم محمد: میسنجر آف گاڈ کے لیے موسیقی دینے پر فتوی جاری کیا تھا۔

رضا اکیڈمی نے کہا تھا کہ فلم کے ٹائٹل نے پیغمبر اسلام کی توہین کی ہے۔

اس کے بعد دہلی اور ریاست اترپردیش کے وزرائے اعلی نے آخری موقعے پر اے آر رحمان کے پروگرام منسوخ کر دیے۔

اور پھر سخت گیر ہندو تنظیم وشو ہندو پریشد نے اپنے گھر واپسی پروگرام کے تحت انھیں واپس ہندو مذہب قبول کرنے کی دعوت دے ڈالی تھی۔