سویڈن کے زیلمرلو یوروویژن مقابلے کے فاتح
،تصویر کا ذریعہGetty
یورپ میں گائیکی کے مقابلے یورو ویژن میں سویڈن کے گلوکار مینز زیلمرلو فاتح قرار پائے ہیں، انھوں نے اس مقابلے میں روس کی پولینا گگارینا کو شکست دی ہے۔
60 واں یوروویژن مقابلہ آسٹریا کے شہر ویانا میں منعقد ہوا۔
مینز زیلمرلو نے اپنی تیز دھن والے پاپ نغمے ’ہیروز‘ کے لیے یہ اعزاز حاصل کیا جس میں انھوں نے اختراعی اینیمیٹڈ ویژوئلس کا بھی استعمال کیا تھا۔
اس مقابلے میں تیسرے نمبر پر اٹلی رہا جبکہ بلجیئم چوتھے اور پہلی بار مدعو کیے جانے والا ملک آسٹریلیا پانچویں نمبر پر رہا۔
اس میں مجموعی طور پر 27 ممالک نے حصہ لیا تھا جو کہ اب تک کی سب سے زیادہ تعداد ہے۔
آسٹریا اور جرمنی صفر پوائنٹس کے ساتھ آخری مقام پر رہے اور سنہ 2003 کے بعد یہ پہلا موقع ہے جب کسی ملک کو صفر پوائنٹس ملے ہوں۔
برطانیہ کی الیکٹرو ویلویٹ نے صرف پانچ پوائنٹس حاصل کیے تاہم انھوں نے اس مخصوص شمارے میں شرکت کرنے پر خوشی کا اظہار کیا۔
،تصویر کا ذریعہAP
انھوں نے کہا: ’ہم نے اپنے ملک کی نمائندگی کرنے میں دل و جان لگا دیا اور ہم دنیا بھر میں اپنے تمام مداحوں کا شکریہ ادا کرتے ہیں۔‘
End of سب سے زیادہ پڑھی جانے والی
خیال رہے کہ اس سال کے مقابلے کے لیے زیلمرلو سٹے بازوں کے بھی پسندیدہ گلوکار تھے۔
زیلمرلو نے ناظرین سے کہا ’میں بہت زیادہ خوش ہوں اور آپ تمام کا ووٹ دینے کے لیے شکر گزار ہوں۔ میں یہ کہنا چاہتا ہوں کہ ہم سب ہیروز ہیں خواہ ہم کسی کو بھی چاہیں، خواہ ہم کوئی بھی ہوں اور ہم کسی میں بھی یقین رکھتے ہوں، ہم سب ہیروز ہیں۔‘
،تصویر کا ذریعہReuters
یہ چھٹا موقع ہے جب سویڈن نے یوروویژن خطاب حاصل کیا ہے اور اب وہ آئر لینڈ سے صرف ایک نمبر پیچھے ہے جس نے یہ خطاب سات بار حاصل کر رکھا ہے۔
اس نتیجے کا مطلب یہ ہے کہ آئندہ سال کا یوروویژن اب سوئیڈن میں ہوگا۔
یہ خیال ظاہر کیا جاتا ہے کہ تقریباً 20 کروڑ افراد نے اس مقابلے کو ٹی وی پر دیکھا اور پہلی بار چین میں اسے براہ راست نشر کیا گيا۔
