سویڈن کی لورین یورو ویژن کی فاتح
،تصویر کا ذریعہGetty Images
یورپ میں گائیکی کا مقابلہ یورو ویژن سویڈین کی گلوکارہ لورین نے اپنے کلب ٹریک ایورپیا کے ساتھ جیت لیا ہے۔
57 ویں یورو ویژن مقابلے کا انعقاد آذربائجان کے شہر باکو کے شاندار کرسٹل ہال میں منعقد ہوا اور وہاں بیس ہزار کے قریب شائقین لائیو مقابلے کو دیکھنے کے لیے موجود تھے۔
سویڈن کی لورین کو باکو میں ہونے والی ووٹنگ میں پہلے سے ہی برتری حاصل تھی اور اس میں ان کو صرف روس کی برونوو گرینز، سرببا اور میزبان ملک آذر بائیجان کے گلوکاروں سے چیلنج کا سامنا تھا۔
اس مقابلے میں برطانیہ کے انگلبرٹ پمرڈنگ سے بہت زیادہ امیدیں وابستہ تھیں لیکن وہ اس مقابلے میں دوئم پوزیشن پر آئے۔
چھہتر سالہ برطانوی گلوکار کا کہنا تھا’میں نے اپنے ملک کے لیے پوری کوشش کی ہے۔‘
ان کا کہنا تھا ’میں نے اپنے کرئیر میں بہت کامیابی دیکھی ہے اور یورو ویژن میں حصہ لینا ایک بے حد شاندار تجربہ رہا ہے۔‘
ان کا مزید کہنا تھا کہ’میں اپنے مداحوں کا شکریہ ادا کرنا چاہتا ہوں اور خاص طور سے بیرونی دنیا کے ان مداحوں کا اور جنہوں نے میری حمایت کی ہے۔‘
واضح رہے کہ برطانیہ کے کسی بھی گلوکار یا موسیقی کے بینڈ نے سنہ 1997 سے یہ مقابلہ نہیں جیتا ہے اور برطانیہ کے گلوکاروں نے گزشتہ دس برسوں میں تین بار آخری مقام حاصل کیا ہے۔
End of سب سے زیادہ پڑھی جانے والی
واضح رہے کہ یورو ویژن ایک بے حد مقبول موسیقی کا مقابلہ ہے کہ اس مقابلے کو پوری دینا میں ٹی وی پر تقریباً ایک سو پچیس ملین افراد نے دیکھا ہے۔
آذربائیجان میں ہونے والے اس مقابلے میں چھبیس ممالک نے حصہ لیا تھا اور جس ہال میں یہ مقابلہ ہوا وہاں بیس ہزار لوگوں نے بیٹھ کر مقابلے کا مزا لیا۔
اس مقابلے میں نیشنل جوری یعنی ججوں کے علاوہ ٹی وی کے ذریعے لوگ ووٹ دیتے ہیں۔سویڈین کی لورین کو تین سو بہتر ووٹ حاصل ہوئے۔
مقابلہ میں فاتح ہونے کے بعد لورین نے کہا’میں آپ سب کو بے حد پیار کرتی ہوں۔ مجھ میں یقین کرنے کے لیے بہت شکریہ۔‘
ان کا مزید کہنا تھا’ آپ سب کی حمایت کے بغیر میں یہ جیت حاصل نہیں کرسکتی تھی۔‘
