اردو جسے کہتے ہیں، تہذیب کا چشمہ ہے

بھارتی دارالحکومت دہلی میں دو روزہ ادبی پروگرام ’جشن ریختہ‘ میں پاکستان، بھارت، امریکہ اور کینیڈا جیسے ممالک کے 60 سے زائد اردو شاعر، مصنفین اور فنکاروں نے شرکت کی۔

ریختہ نے اس سفر کا آغاز اردو شاعری کی ایک ویب سائٹ سے کیا تھا جو اب اردو کے جشن کی شکل اختیار کر چکا ہے۔

شاعر کہتا ہے:

’اردو جسے کہتے ہیں، تہذیب کا چشمہ ہے وہ شخص مہذب ہے جس کو یہ زباں آئی

دہلی میں جشن ریختہ کے ذریعے اس بار اردو کے کئی دلچسپ پہلو دیکھنے کو ملے۔ اس جشن میں داستان گوئي، شاعری، قوالی، غزل اور قصہ گوئي نے اردو کے چاہنے والوں کے دل گرما دیے۔

پاکستان سے آئے ہوئے بعض اہم ادیبوں اجمل کمال، امجد اسلام امجد، آصف فرخی، انتظار حسین، ضیاء محی الدین اور انور شعور نے بھی جشن ریختہ میں شرکت کر کے اس کی رونق بڑھائی۔

اس جشن کے دوران بحث و مباحثے کی محفلوں اور تبادلۂ خیال کی نشستوں کے ذریعے اردو کے مختلف پہلوؤں کو جاننے کا موقع ملا۔

جشن ریختہ کی آخری شام کو موسم کا مزاج بدلا ہوا تھا۔ گھرے ہوئے بادلوں کے درمیان گلوکارہ رادھیكا چوپڑا نے موقعے کی مناسبت سے غزل ’دور تک چھائے تھے بادل اور کہیں سایہ نہ تھا، اس طرح برسات کاموسم کبھی آیا نہ تھا‘ پیش کی اور اس خوبصورت جشن کوانجام تک پہنچایا۔