شاہ رخ سلمان خان کے گھر پہنچ گئے

بالی وڈ سٹار سلمان خان کی بہن ارپتا خان کی شادی کے موقعے پر مہندی اور گیت کی رسوم میں شرکت کے لیے شاہ رخ خان بھی پہنچ گئے۔

شاہ رخ خان اور سلمان خان کو ایک دوسرے کا حریف سمجھا جاتا ہے اس لیے جب بھی دونوں کی ملاقات ہوتی ہے، میڈیا کے لیے سرخیاں تیار ہو جاتی ہیں۔

شاہ رخ خان ممبئی کے باندرہ کے علاقے میں واقع سلمان خان کے گھر ’گیلیكسي اپارٹمنٹ‘ پر اتوار کو رات 12 بجے پہنچے۔

ارپتا خان نے سلمان اور شاہ رخ کے ساتھ لی جانے والی اپنی تصاویر انسٹاگرام پر شيئر کیں۔ سلمان کے بہنوئی اتل اگنی ہوتري نے بھی اپنے ٹوئٹر اکاؤنٹ پر یہ تصاویر پوسٹ کیں۔

اتل اگنی ہوتری سلمان کی بہن الويرا خان کے شوہر ہیں۔

سلمان نے شاہ رخ خان کو شادی میں شرکت کے لیے دعوت نامہ بھیجا تھا اور شاہ رخ نے میڈیا سے کہا تھا کہ وہ شادی میں ضرور شریک ہوں گے کیونکہ ارپتا ان کی بھی چھوٹی بہن کی طرح ہیں۔

ارپتا کی شادی حیدرآباد میں 18 نومبر کو ہونے والی ہے اور اس میں امیتابھ بچن اور عامر خان جیسے ستاروں کو بھی مدعو کیا گیا ہے۔

عامر خان نے ایک پروگرام کے دوران کہا تھا کہ انھیں شادی میں شرکت کے لیے کسی کارڈ یا دعوت نامے کی ضرورت نہیں کیونکہ ارپتا ان کی بھی بہن ہیں۔

اس سے قبل سلمان خان دہلی میں بھارتی وزیر اعظم نریندر مودی کو اس میں شرکت کے لیے مدعو کرنے آئے تھے۔