’جب مایوس امیتابھ بچّن کو منوج کمار نے روکا‘

حب الوطنی سے لبریز فلمیں بنانے کے لیے مشہور بالی وڈ کے اداکار منوج کمار 77 برس کے ہوگئے ہیں۔

اس موقع پر انھوں نے بی بی سی سے خصوصی گفتگو میں کچھ دلچسپ باتیں بتائیں اور اپنی بعض خاص تصاویر شیئر کیں۔

منوج کمار نے سنہ 1957 میں بطور اداکار فلم ’فیشن‘ سے اپنا کریئر شروع کیا تھا۔ وہ اسی فلم کو اپنی پسندیدہ فلم بھی سمجھتے ہیں۔

زیادہ تر فلموں میں ان کے کردار کا نام بھارت ہوا کرتا تھا اور اسی وجہ سے لوگ انھیں ’بھارت کمار‘ بھی کہنے لگے۔

منوج کمار نے بی بی سی کو بتایا کہ جب مسلسل ناکامی سے مایوس ہو کر امیتابھ بچن ممبئی چھوڑ کر اپنے ماں باپ کے پاس دہلی واپس جا رہے تھے تب انھوں نے امیتابھ کو روکا اور اپنی فلم ’روٹی، کپڑا اور مکان‘ میں موقع دیا۔

منوج کمار کہتے ہیں: ’جب لوگ امیتابھ کو ناكامي کی وجہ سے طعنے دے رہے تھے تب بھی مجھے ان پر مکمل اعتماد تھا کہ وہ ایک دن بہت بڑے سٹار بنیں گے۔‘

منوج کمار نے اس فلم کو ڈائریکٹ بھی کیا تھا۔ منوج کمار نے بتایا کہ ان کی فلم ’پورب اور پچھم‘ میں کام کرنے کے لیے دلیپ کمار نے اپنی بیوی سائرہ بانو کو منایا تھا۔ اس کے بعد انھوں نے دلیپ کمار کو اپنی فلم ’کرانتی‘ میں کاسٹ کیا۔

منوج کمار بتاتے ہیں کہ فلم ’اپکار‘ بنانے کی رغبت انھیں اس وقت کے بھارتی وزیر اعظم لال بہادر شاستری سے ملی تھی جنھوں نے ’جے جوان جے کسان‘ کا نعرہ دیا تھا۔

منوج کمار کہتے ہیں کہ ملک کے تمام لیڈروں کے ساتھ ان کے اچھے تعلقات تھے۔ لال بہادر شاستری کے علاوہ اندرا گاندھی اور اٹل بہاری واجپئي بھی ان کی فلمیں پسند کرتے تھے۔

منوج کمار نے راج کپور کی مشہور زمانہ فلم ’میرا نام جوکر‘ میں بھی کام کیا تھا۔

منوج کمار کہتے ہیں ’جب میرے قریبی دوستوں جیسے راج کپور، دیو آنند اور پران کی فلمیں ٹی وی پر آتی ہیں تو میں چینل بدل دیتا ہوں کیونکہ ان فنکاروں کی یادیں مجھے رلا دیتی ہیں۔‘

اداکار شاہ رخ خان سے منوج کمار اس وقت ناراض ہوگئے تھے جب شاہ رخ نے اپنی فلم ’اوم شانتی اوم‘ کے ایک سین میں منوج کمار کی نقل کی تھی۔

بعد میں شاہ رخ خان نے منوج کمار سے اس بارے میں معافی مانگ لی تھی لیکن یہ معاملہ میڈیا میں کافی دنوں تک چھایا رہا۔

منوج کمار نے بتایا کہ شاہ رخ سے ناراضی والی بات اب پرانی ہو چکی ہے اور اب وہ اس قصے کو بھول چکے ہیں۔