ኣብ መላእ ህንዲ ጸጥታ ዓሲሉ ሓዲሩ

ቀዳማይ ሚኒስተር ህንዲ ናረንድራ ሞዲ፡ ዝርግሐ ኮሮናቫይረስ ንምግታእ መላእ ህዝቢ ህንዲ ኣብ ገዝኡ ክውሸብ መምርሒ ኣመሓላሊፉ።

እዚ መምርሒ ካብ ሎሚ መዓልቲ ጀሚሩ ንዝቕጽሉ 21 መዓልታት ክቕጽል እዩ።

እቲ ቀዳማይ ሚኒስተር ብቴሌቪዥን ኣብ ዘሕለፎ መልእኽቲ፡ "ኩሉ ካብ ገዝኡ ከይወጽእ ገደብ ተገይሩሉ ኣሎ" ኢሉ።

በዚ ዝተወስደ ስጉምቲ ሰባት ክስንብዱ ከም ዘይብሎም'ኳ እንተኣዘኻኸረ፡ ብርክት ዝበሉ ሰባት ግን ልዕሊ ዓቐን ንብረት ክሽምቱ ተራእዮም።

ይኩን'ምበር ከምዚ ዓይነት ሸመታ እቲ ቫይረስ ንክላባዕ ዕድል ዝኸፍት ምዃኑ ብምግላጽ፡ መንግስቲ እኹል ቐረብ ከም ዝገብር ብምግላጽ ሰባት ካብዚ ክቑጠቡ ኣተሓሳሲቡ።

ሪፖርተራት ቢቢሲ ከም ዝብሉዎ ድማ፡ ሰባት መግብን ካልኦት መሰረታዊ ነገራትን ንምዕዳግ ክወጽኡ ይፍቀደሎም ድዩ ዝብል ነገር ግልጺ ኣይኮነን።

ኣብ ቀረባ መዓልታት ኣብ ህንዲ ብዝሒ ብኮሮናቫይረስ ዝተሓዙ ሰባት እናወሰኸ ብምምጽኡ፡ 519 ሰባት በቲ ቫይረስ ክልከፉ እንከው 10 ድማ ሞይቶም ኣለው።

ቀዳማይ ሚኒስትር ናረንድራ ሞዲ ልክዕ ከም ካልኦት ሃገራት ኤውሮፓን ኣሜሪካን ዝወስድኦ ዘለዋ ስጉምቲ እገዳ ምንቅስቓሳት ክውሰድ ግድን ዝኾነሉ ምክንያት ከብርህ እንከሎ፡ ሃገር ንምድሓን'ዩ ክብል ገሊጹዎ።

"እዛ ሃገር ሙሉእ ክትውሸብ'ያ፤ ህንድን ኩሉ ዜጋን ንምድሓን . . . ስድራኹም ንምድሓን፡ ኩሉ ጎደናታት፣ ኩሉ ዓድታት ህንዲ ካብ ምንቅስቓስ ዝተገደበ ክኸውን ገይርና ኣለና" ኢሉ።

ኣብዘን 21 መዓልታት እዚ ክንቆጻጸሮ እንተዘይክኢልና ግን፡ "ሃገርና ን21 ዓመታት ንድሕሪት ክትጉተት'ያ" ክብል ኣጠንቂቑ።

ቀዳማይ ሚኒስትር ሞዲ ኣብ መግለጺኡ፥

ብርክት ዝበላ ዞባታት ህንዲ ኣቐዲመም ብተበግሶአን ጉዕዞ ብምእጋድ ኣገደስቲ ዘይኮኑ ኣገልግሎታት ብምዕጻው ክከላኸላ ጸኒሐን እየን።

ህንዲ ዓለምለኻውን ኣብ ውሽጢ ሃገር ዝግበሩ በረራታትን ኣጊዳ'ያ። ባቡር እታ ሃገር'ውን ዝህቦ ኣገልግሎት ደው ኣቢሉ ይርከብ።