መዓዛ መልኣኩ፡ ብሰናይ ፍቓዳ ምስማዕ ንዘይክእሉ ብዛዕባ ኮሮናቫይረስ እተምህር ግድስቲ

ኣብ ኢትዮጵያ ለበዳ ኮሮናቫይረስ ምእታዉ ምስ ተሰምዐ፡ ገለ ግዱሳት፡ ኣብ ናይ ሰራይ ፍቓድ ስራሕቲ ይዋፈሩ ኣለው።

ካብ መንጎ እዚኦም፤ ምስማዕ ንዘይክእሉ (ጽሙማን) ብዛዕባ እቲ ቫይረስ ኣብ ፌስ ቡክ ብምልክት ቋንቋ እተምህር ዘላ መዓዛ መልኣኩ ትጥቀስ።

ከምዚ ዓይነት ጉድኣት ኣካል ዘለዎም ሰባት፡ ብዛዕባ እዚ ሕማም ኣገዳሲ ሓበሬታ ንምርካብ ዝጽገምሉ ኩነታት ሰፊሕ ምዃኑ ትዛረብ።

"በዚ ምኽንያት ኣነ'ውን ሓላፍነተይ ክፍጽም ስለ ዘለኒ በታ ዝኽእላ ነዚ ተግባር ክፍጽም ወሲነ" ትብል።

መዓዛ ብቐንዱ ብዛዕባ እቲ ሕማም ኣመልኪቶም ካብ መንግስቲ ዝወሃቡ መግለጺታትን ክግበሩ ዝግበኦም ጥንቃቐታትን ብናይ ምልክት ቋንቋ እናተርጎመት ተሕልፍ።

ሃገራዊ ሚድያታት፡ ምስዚ ቫይረስ ተኣሳሰሲሩ ንጽሙማን ዜጋታት እኹል ሓበሬታ ምሃብ ክሳብ ዝጅምሩ እዚ ስረሐይ ክቕጽለሉ እየ ድማ ትብል።

መዓዛ፡ ካብ ዩኒቨርሲቲ ኣዲስ ኣበባ ብናይ ምልክት ቋንቋ ቀዳማይ ድግሪ ረኺባ፤ ካልኣይ ድግሪ ድማ ብፍሉይ ድሌት ኣብ ዩኒቨርሲቲ ኦስሎ ተማሂራ።

ትማሊ ኣብ ኢትዮጵያ በቲ ቫይረስ ዝተለኸፈ ሓምሻይ ሰብ ብምርካቡ፡ መንግስቲ ንዝቕጽሉ 15 መዓልታት መባእታውን ካልኣይ ደረጃን ኣብያተ ትምህርቲ ክዕጸው፣ ህዝባዊ ዋዕላታትን ስፖርታዊ ንጥፈታትን ከይካየዱ ኣጊዱ'ዩ።

ብተወሳኺ፡ ዝርግሐ እቲ ቫይረስ ንምዕጋት መንግስታዊ ኣውቶብሳት ንተጉዓዝቲ መሐለዊ ጽርየት [ናይ ኢድ ሳኒታይዘር] ከቕርቡ ከም ዝግባእ ምምሕዳር ከተማ ኣዲስ ኣበባ ገሊጹ።