ኮሚሽነር ምትኩ ካሳ ዝቐረቡሉ ክስታት ብልሽውና

ኮሚሽነር ምሕደራ ስግኣት ሓደጋታት ኢትዮጵያ ምትኩ ካሳ፡ ኣብዚ ሰሙን ኣብ ቀይዲ ዝኣተወ ኰይኑ፡ ዝተጠርጠረሎም ገበናት ብልሽውና ዝምልከት ፖሊስ ብወግዓዊ ዘርዚሩዎም ኣሎ።

እዞም ገበናት፡ እቲ ንዝሓለፉ ዓመታት ነቲ ኮሚሽን ክመርሕ ዝጸንሐ ምትኩ፡ ‘ኤልሻዳይ ሪሊፍ ኤንድ ዴቨሎፕመንት’ ምስ ዝተባህለ ገባሪ ሰናይ ትካል ተመሻጢሩ ፈጺሙዎም ዝተባህሉ’ዮም።

ኣብ ሚኒስትሪ ፍትሒ፡ ጀነራል ዳይሬክተር ጳቃብ ሕጊ ገበናት ብልሽውናን ቤት ጽሕፈት መርመራ ገበን ፖሊስ ፌደራልን ብሓባር ኣካይዶምዎ ዝተባህለ መርመራ ሰብን መረዳእታታት ሰነድን፡ እቲ ኮሚሽነር ንረድኤት ተባሂሎም ዝቐርቡ ናውቲ ንውልቃዊ ረብሓኡ ብምውዓል፣ ዘይሕጋዊ ገንዘብ ሕጋዊ ኣምሲሉ ብምቕራብ ከም ዝተጠርጠረ ማዕከናት ዜና ኢትዮጵያ ኣቃሊሐን።

ብተወሳኺ፡ ዋና ኦዲተር ፌደራል፡ ኣብ ጉዳይ እቲ ኮሚሽንን፡ ኣብ ክልል ኣምሓራ፡ ዓፋር፡ ኦሮሚያን ደቡብን ዝርከቡ ማእከላት እቲ ማሕበር ግብረሰናይን ዘካየዶ መርመራ ኦዲት ተፈጺሙ፡ ምስቲ ዝተኻየደ መርመራ ከም ዝተጠቓለለን ተሓቢሩ።

እቶም ክስታት እንታይ’ዮም?

እቲ ኮሚሽነር ኣብ ቀይዲ ምስ ኣተወ፡ ኣብ ገዛኡ ድሕሪ ዝተገብረ ተፍትሽ ልዕሊ 650 ሽሕ ባጤራ ወጻኢ ከም ዝተረኽበ ተሌቭዥን 'ታ ሃገር ኣቃሊሓ።

ብተወሳኺ እቲ ኮሚሽነር፡ ኣብ ዝሓለፉ ክልተ ዓመታት፡ ስልጣን ብዘለዎ ኣካል ካብ ሃገር ከይወጽእ ተኣጊዱ ከም ዝጸንሐ ተጠቒሱ።

ኣቶ ምትኩ፡ ምስ ዳይሬክተር ኤልሻዳይ የማነ ወልደማርያምን ካልኦት ሰራሕተኛታት እቲ ትካልን፡ ዘይግባእ ጥቕማዊ ምትእስሳር ፈጢሮም ንረድኤት ተባሂሎም ዝመጽኡ ናውቲ ንውልቃዊ ረብሓኦም ከም ዘውዓሉ ፖሊስ ይገልጽ።

ሓበሬታ ፖሊስ ከም ዘመልክቶ፡ ኣቶ ምትኩ ዝርዝር ኣስማት ብኣሽሓት ዝቝጸሩ ተሓገዝቲ ተጠቒሙ፡ ካብ መኽዝን እቲ ኮሚሽን እኽልን ካልኦት ሃለኽቲ ነገራትን ኣውጺኡ ሸይጡ።

እቲ ንረድኤት ዝመጽአ ሓገዝ፡ ናብ ተጸበይቲ ከይበጽሐ እንከሎ፡ ናብ ፋብሪካታት ሕሩጭን ካልኦት ውልቀሰባትን ብምሻጥ፡ ብስም ቤተሰቡ ድማ ካብቲ ማሕበር ግብረ-ሰናይ ብሚሊዮናት ብር ዝግመት ጥቕሚ ረኺቡ’ዩ ብምባል ፖሊሲ ይኸስስ።

በዚ መሰረት፡ ፖሊስ፥

ኣብ ርእሲ'ዚ፡ እቲ ኮሚሽነርን ቤተሰቡን፡ ካብ ማሕበር ኤልሻዳይ ብዝተዋህበ ገንዘብ ተጠቒሞም ብሽም ቤተሰቡ ንብረት ከም ዘጥረየ’ውን ፖሊስ ይገልጽ።

እቲ መርመራ ገና ከም ዘይተዛዘመን፡ ካልኦት ካብቲ ኮሚሽን ብኣማኢት ሚሊዮናት ወጺኦም’ዮም ዝተባህሉ ገንዘብ፡ ከምኡ’ውን ንኣባላት ስድራኡ ዝተገዝኡ ኣባይቲ፡ መካይንን ካልንኦት ጥቕማዊ ምትእስሳራትን ዝምልከት መርመራ ይካየድ ከም ዘሎ ፖሊስ ኣመልኪቱ።