బాల్ ట్యాంపరింగ్: స్టీవ్ స్మిత్‌కు జరిమానా, ఓ మ్యాచ్‌ నిషేధం

దక్షిణాఫ్రికాతో జరుగుతున్న టెస్ట్ మ్యాచ్‌లో ఆస్ట్రేలియా జట్టు బాల్ ట్యాంపరింగ్‌కు పాల్పడిన నేపథ్యంలో.. ఆ జట్టు కెప్టెన్ స్టీవ్ స్మిత్‌కు ఐసీసీ జరిమానా విధించింది. ఓ టెస్ట్ మ్యాచ్ నిషేధం విధించింది.

ఒక మ్యాచ్ ఫీజును జరిమానాగా చెల్లించాలని స్మిత్‌ను ఐసీసీ ఆదేశించింది.

అంతకు ముందు స్టీవ్ స్మిత్, వైస్ కెప్టెన్ డేవిడ్ వార్నర్‌లు తాజా మ్యాచ్‌ ముగిసే వరకు తమ పదవుల నుంచి వైదొలుగుతున్నట్లు ప్రకటించారు.

ఈ మూడో టెస్ట్ మ్యాచ్ ముగిసేవరకే వీరు ఈ పదవుల్లో ఉండరు. కానీ మ్యాచ్‌లో ఇతర క్రీడాకారుల్లా కొనసాగుతారు.

కామెరూన్ బెన్‌క్రాఫ్ట్ బాల్‌ ట్యాపంరింగ్‌కి పాల్పడ్డారని ఆరోపణలు వచ్చాయి. దీంతో ఈ అంశంపై విచారణ జరుగుతోంది.

ఈ నేపథ్యంలో స్మిత్ కెప్టెన్ పదవి నుంచి వైదొలగాలని ఆస్ట్రేలియా ప్రభుత్వం, క్రికెట్ ఆస్ట్రేలియా ఆదేశించాయి.

దీంతో స్మిత్, వార్నర్‌లు పదవి నుంచి వైదొలిగారు.

అనంతరం ఐసీసీ స్మిత్‌పై ఒక మ్యాచ్ నిషేధం విధించింది.

ఈ మ్యాచ్ ముగిసేవరకు అంటే నాలుగు, అయిదో రోజు ఆటకు టిమ్ పైన్ కెప్టెన్‌గా ఉంటారు.

ఈ ట్యాంపరింగ్ వ్యవహారం చాలా బాధాకరమని క్రికెట్ ఆస్ట్రేలియా చీఫ్ జేమ్స్ సదర్లాండ్ పేర్కొన్నారు.

శనివారం కేప్‌టౌన్‌లో జరిగిన టెస్ట్ మ్యాచ్‌లో తాము బాల్ ట్యాంపరింగ్‌కి పాల్పడినట్లు బెన్‌క్రాప్ట్ అంగీకరించారు.

ట్యాంపరింగ్ ప్లాన్ గురించి తమకు ముందే తెలుసని స్మిత్ కూడా పేర్కొన్నారు.

ఈ అంశంపై సదర్లాండ్ మాట్లాడుతూ.. అసలు ఏం జరిగిందో పూర్తిగా విచారణలో తేలాక స్పందిస్తామని తెలిపారు.

ఈ బాల్ ట్యాంపరింగ్ పై ఐసీసీ కూడా కేసు నమోదు చేసింది. మరోవైపు ఈ ట్యాంపరింగ్ ఘటన తనను తీవ్ర దిగ్ర్భాంతికి గురి చేసిందని.. అసలు నమ్మలేకపోతున్నానని ఆస్ట్రేలియా ప్రధాని మాల్కం టర్న్‌బుల్ పేర్కొన్నారు.

ఈ ఘటనపై పలువురు తాజా, మాజీ క్రికెటర్లు సోషల్ మీడియాలో స్పందించారు.

ఇవి కూడా చూడండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)