ఆంధ్రప్రదేశ్‌లో బీజేపీ, కాంగ్రెస్ కంటే నోటాకే ఎక్కువ ఓట్లు

25 మే 2019

ఆంధ్రప్రదేశ్‌లోని సాలూరు శాసనసభ నియోజకవర్గంలో వైసీపీ అభ్యర్థి రాజన్నదొర దాదాపు 20 వేల ఓట్ల మెజారిటీతో గెలుపొందారు.

ఆయనకు పోలైన ఓట్లలో 51.7 శాతం ఓట్లు పడ్డాయి. రెండో స్థానంలో నిలిచిన టీడీపీ అభ్యర్థికి 38.49 శాతం ఓట్లు వచ్చాయి.

ఇక ఇక్కడ నోటా గుర్తు మూడో స్థానంలో నిలిచింది. దీనికి 4,874 ఓట్లు పడ్డాయి. అంటే పోలైన ఓట్లలో 3.21 శాతం ఓట్లు నోటాకే పడ్డాయి.

వైసీపీ, టీడీపీతో సహా ఇక్కడి నుంచి ఐదు పార్టీల అభ్యర్థులు పోటీపడ్డారు. కాంగ్రెస్ నుంచి పోటీ చేసిన సుందర్ రావుకు కేవలం 1737 ఓట్లు (1.14శాతం ఓట్లు) రాగా, బీజేపీ అభ్యర్థి ఉదయ్ కుమార్‌కు 3268 ఓట్లు (2.15 శాతం ఓట్లు), జనసేన అభ్యర్థికి 3038 ఓట్లు (2.18 శాతం) వచ్చాయి.

ఇలా చాలా చోట్ల బీజేపీ, కాంగ్రెస్ అభ్యర్థుల కంటే నోటాకే ఎక్కువ ఓట్లు వచ్చాయి. కేవలం శాసన సభ ఎన్నికలకే కాకుండా పార్లమెంట్ ఎన్నికల్లోనూ ఇదే పరిస్థితి కనిపించింది.

ఆంధ్రప్రదేశ్ విభజన తర్వాత 2014లో జరిగిన ఎన్నికల్లో కాంగ్రెస్ పార్టీ ఒక్క స్థానం కూడా గెలుచుకోలేకపోయింది. ఆ పార్టీ అభ్యర్థులు అన్నిచోట్లా డిపాజిట్లు కోల్పోయారు. ఇప్పుడు ఆ పార్టీ అదే ఫలితాలను నమోదు చేసింది.

గత ఎన్నికల్లో 4 శాసన సభ స్థానాలు గెలుచుకున్న బీజేపీ కూడా ఈసారి అన్నిచోట్ల డిపాజిట్లు కోల్పోయింది.

ఫలితాల సరళిని గమనిస్తే రాష్ట్రంలోని 25 లోక్ సభ స్థానాలకు సంబంధించి నోటాకు 1.5 శాతం ఓట్లు పోలైతే, బీజేపీకి 0.96 శాతం, కాంగ్రెస్‌కు 1.29 శాతం ఓట్లు పడ్డాయి.

Skip ఎక్కువమంది చదివినవి and continue reading

ఎక్కువమంది చదివినవి