డోనల్డ్ ట్రంప్‌పై కాల్పులు.. మోదీ, రాహుల్ ఏమన్నారు

అమెరికా మాజీ అధ్యక్షుడు డోనల్డ్ ట్రంప్ పై కాల్పులు జరిగాయి. పెన్సిల్వేనియా రాష్ట్రంలోఎన్నికల ప్రచారంలో ప్రసంగిస్తుండగా దుండగులు ఆయనపై కాల్పులు జరిపారు.

ముఖం మీద రక్తంతో కనిపించిన ట్రంప్‌ను అమెరికా సీక్రెట్ సర్వీస్ సిబ్బంది హుటాహుటిన స్టేజ్ మీద నుంచి కిందికి తీసుకొచ్చి అంబులెన్స్‌లోకి చేర్చారు.

ట్రంప్‌ను స్టేజ్ మీద నుంచి కిందికి తీసుకువస్తుండగా ఆయన చెవి దగ్గర, చెంపల మీద రక్తం కారుతుండటం కనిపించింది.

ప్రస్తుతం ఆయన ఆసుపత్రిలో చికిత్స పొందుతున్నారని, క్షేమంగానే ఉన్నారని రిపబ్లికన్ పార్టీ వర్గాలు వెల్లడించాయి.

ఈ ఘటనలో కాల్పులు జరిపిన వ్యక్తి సీక్రెట్ సర్వీస్ ఏజెంట్లు కాల్పుల్లో మరణించారు. సభకు హాజరైన వారిలో ఓ వ్యక్తి దుండగుడి కాల్పుల్లో మరణించారని, మరో ఇద్దరు గాయపడ్డారని సీక్రెట్ సర్వీస్ ఏజెన్సీ ప్రకటించింది.

ట్రంప్‌పై కాల్పులను అమెరికా అధ్యక్షుడు జోబైడెన్ సహా పలు దేశాల అధినేతలు ఖండించారు.

బీబీసీ న్యూస్ తెలుగు వాట్సాప్ చానల్‌లో చేరడానికి ఇక్కడ క్లిక్ చేయండి

ట్రంప్ ర్యాలీలో పలుమార్లు తుపాకీ కాల్పుల శబ్దం వినిపించింది. దీంతో వెంటనే స్పందించిన సీక్రెట్ సర్వీస్ ఏజెంట్లు ఆయన్ను వేదికపై నుండి దించి కారు వద్దకు తీసుకెళ్లారు.

కాల్పులు శబ్దం వినిపించడం, ట్రంప్‌ గాయాలతో కనిపించడంతో సభకు వచ్చిన ప్రేక్షకులు ఒక్కసారిగా హాహాకారాలు చేశారు.

పెన్సిల్వేనియాలోని బట్లర్‌లో ట్రంప్ ఎన్నికల ప్రచార సభలో పాల్గొన్నారు. ఆయన ర్యాలీ ప్రారంభమైన అయిదు నిమిషాల తర్వాత, ట్రంప్ ప్రసంగిస్తుండగా ఒక్కసారిగా పెద్ద శబ్దాలు వినిపించాయి.

వెంటనే సీక్రెట్ సర్వీస్ ఏజెంట్లు డోనల్డ్ ట్రంప్‌ను చుట్టుముట్టారు. అప్పటికే ఆయన చెవి దగ్గర, చెంపల మీద రక్తం కనిపించింది.

కట్టుదిట్టమైన భద్రతా వలయంలో ట్రంప్‌ను స్టేజి మీద నుంచి కిందికి తీసుకువచ్చారు సీక్రెట్ సర్వీస్ సిబ్బంది.

స్టేజి మీద నుంచి కిందికి దించుతుండగానే పిడికిలి బిగించి సభకు వచ్చిన ప్రేక్షకులకు చూపిస్తూ వారిని ఉత్సాహపరిచే ప్రయత్నం చేశారు ట్రంప్.

‘వరసగా తుపాకీ కాల్పుల శబ్దాలు వినిపించాయి’ అని ప్రేక్షకుల్లో ఒక వ్యక్తి చెప్పారు.

‘ట్రంప్‌ను స్టేజి మీద నుంచి దింపుతుండటం చూశాను. ఒక్కసారిగా జనం అక్కడ గుమిగూడారు. అంతా గందరగోళంగా కనిపించింది’ అని మరొకరు చెప్పారు.

ట్రంప్ స్పందన

‘‘నా చెవుల దగ్గర కరకు శబ్దం వినిపించింది. బుల్లెట్ నా చర్మాన్ని చీల్చుకుంటూ వెళ్లినట్లు అనిపించింది.’’ అని ట్రంప్ అన్నారు.

‘‘ఈ దేశంలో ఇలాంటి ఘటన జరుగుతుందని నేను ఊహించలేదు. కాల్పులు జరిపిన వ్యక్తి ఎవరో ఏంటో ఇంకా తెలియదు. అతను ఇప్పుడు చనిపోయాడు.’’ అని ట్రంప్ అన్నారు.

ఈ ఘటనలో మరణించిన వ్యక్తి కుటుంబానికి, గాయపడిన వారికి సానుభూతి తెలుపుతున్నట్లు ఒక సందేశంలో వెల్లడించారు.

ఎవరేమన్నారు?

‘‘ పెన్సిల్వేనియాలో ట్రంప్ పై జరిగిన దాడి గురించి వివరాలు తెలుసుకున్నాను. ట్రంప్‌ త్వరగా కోలుకోవాలని కోరుకుంటున్నాను. వెంటనే స్పందించిన సీక్రెట్ సర్వీస్ ఏజెన్సీకి కృతజ్ఞతలు. ఈ తరహా హింసకు అమెరికాలో చోటు లేదు. దేశమంతా ఇలాంటి ఘటనలను ముక్తకంఠంతో ఖండించాలి.’’ అని అమెరికా అధ్యక్షుడు జోబైడెన్ ఎక్స్ లో చేసిన ఒక ప్రకటనలో అన్నారు.

ట్రంప్ క్షేమంగా ఉండటంతో తాను ఊపిరి పీల్చుకున్నానని అమెరికా ఉపాధ్యక్షురాలు కమలా హారిస్ అన్నారు.

‘‘మేం ఆయన కోసం, ఈ ఘటనలో మరణించిన, గాయపడిన వ్యక్తుల కుటుంబాల కోసం ప్రార్థనలు చేస్తున్నాం. ఈ దేశంలో హింసకు తావులేదు. ఇలాంటి దుశ్చర్యలను అందరూ ఖండించాలి.’’ అని హారిస్ ఒక ప్రకటనలో అన్నారు.

‘‘వెంటనే స్పందించినందుకు సీక్రెట్ సర్వీస్ డిపార్ట్‌మెంట్‌కు, ఇతర అధికారులకు కృతజ్ఞతలు. నా దేశం కోసం నేను ప్రార్ధిస్తూనే ఉంటాను. ఐ లవ్యూ డాడ్, టుడే అండ్ ఆల్వేస్’’ అంటూ ట్రంప్ కూతురు ఇవాంకా ట్రంప్ ఎక్స్‌లో పోస్ట్ చేశారు.

పెన్సిల్వేనియాలో తన తండ్రిపై జరిగిన దాడి దుండగుల తెలివితక్కువ పనిగా ఆమె అభివర్ణించారు.

ఖండించిన నరేంద్ర మోదీ, రాహుల్ గాంధీ

ట్రంప్‌పై కాల్పుల ఘటనను ప్రధానమంత్రి నరేంద్ర మోదీ ఖండించారు. ఎక్స్‌లో ఆయన స్పందిస్తూ ... ‘‘నా స్నేహితుడు, మాజీ అధ్యక్షుడు డోనల్డ్ ట్రంప్‌పై దాడి నన్ను తీవ్రంగా కలచివేసింది. ఈ ఘటనను తీవ్రంగా ఖండిస్తున్నాను. రాజకీయాలు, ప్రజాస్వామ్యంలో హింసకు తావు లేదు. ఆయన తొందరగా కోలుకోవాలని కోరుకుంటున్నాను’’ అని రాశారు.

అమెరికా మాజీ అధ్యక్షుడు డోనల్డ్ ట్రంప్‌పై హత్యాయత్నం విచారకరమని, ఇలాంటి ఘటనలను అందరూ ఖండించాలని ప్రతిపక్ష నేత రాహుల్ గాంధీ అన్నారు.

ట్రంప్ త్వరగా కోలుకోవాలంటూ ఎక్స్ లో చేసిన ఒక ప్రకటనలో ఆకాంక్షించారు.

(ఈ కథనం అప్‌డేట్ అవుతోంది.)

(బీబీసీ తెలుగును వాట్సాప్‌,ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)