கொல்கத்தா சாதனைமேல் சாதனை! கோப்பை வெல்ல காரணமான 6 அம்சங்கள்

2015ம் ஆண்டு ஐசிசி ஒருநாள் உலகக் கோப்பை ஃபைனல் ஆட்டம் போன்றே நேற்றைய 2024 சீசனின் ஐபிஎல் டி20 தொடரின் இறுதி ஆட்டமும் அமைந்திருந்தது.

2015ம் ஆண்டு உலகக் கோப்பைத் தொடரில் மெக்கலம் தலைமையிலான நியூசிலாந்து அணியின் பேட்டிங் முதுகெலும்பை மிட்ஷெல் ஸ்டார்க் தொடக்கத்திலேயே உடைத்து எறிந்தார். அதேபோன்ற சம்பவத்தை நேற்றைய இறுதி ஆட்டத்தை செய்து சன்ரைசர்ஸ் அணியை வதம் செய்துவிட்டார்.

கொல்கத்தா அணி ஏறக்குறைய 10 ஆண்டுகள் காத்திருப்புக்குப்பின் 3வது முறையாக ஐபிஎல் டி20 சாம்பியன்ஷிப் கோப்பையை கைகளில் ஏந்தி நேற்று மகிழ்ந்தது. கொல்கத்தா கோப்பையை ஏந்தும் தருணத்தில் முக்கியமான ஒற்றுமை என்னவென்றால், “ஜி.ஜி.” (GG)மட்டும்தான்.

2012ம் ஆண்டு, 2014ம் ஆண்டு கொல்கத்தா சாம்பியன்ஷிப் பட்டம் வென்றபோதும் ஜிஜி இருந்தார், 10 ஆண்டுகளுக்குப்பின் கோப்பையை வெல்லும்போதும் ஜிஜி அணியில் இருந்தார். ஆனால், வீரராக அல்ல “மென்ட்டராக” இருக்கிறார். “இவர் யாரென்று புரிகிறதா…தீ என்று தெரிகிறதா” என்பதைப் போல், கவுதம் கம்பீர்தான் கொல்கத்தா வெற்றிக்கு சூத்திரதாரியாக இருந்தார்.

இந்தியாவில் 3 முறையும் வெற்றி

கொல்கத்தா அணி இதுவரை 4 முறை இறுதிப்போட்டிக்குத் தகுதிபெற்றுள்ளது. அதில் 3 முறை சாம்பியன்ஷிப் பட்டத்தை வென்றுள்ளது. அதிலும் குறிப்பாக இந்தியாவில் நடந்த ஐபிஎல் ஃபைனல்களில் கொல்கத்தா தகுதிபெற்ற 3 தொடர்களிலும் கோப்பையைக் கைப்பற்றியது. 2021ம் ஆண்டு ஃபைனல் துபாயில் நடந்தபோது, சிஎஸ்கே அணியிடம் கொல்கத்தா தோற்றது.

தென் மாநிலங்களுக்கும் கொல்கத்தாவுக்கும் ஒற்றுமை இருக்கிறது, இதுவரை கைப்பற்றிய 3 சாம்பியன் பட்டங்களும் தென் மாநிலங்களில் நடந்த ஃபைனலில் என்பது குறிப்பிடத்தக்கது. 2012(சென்னை), 2014(பெங்களூரு), மீண்டும் 2024(சென்னை) ஆகியவற்றில் கொல்கத்தா அணி சாம்பியன்ஷிப் பட்டம் வென்றுள்ளது.

சென்னை சேப்பாக்கம் மைதானத்தில் நேற்று நடந்த இறுதி ஆட்டத்தில் சன்ரைசர்ஸ் ஹைதராபாத் அணியை 8 விக்கெட் வித்தியாசத்தில் வீழ்த்தியது கொல்கத்தா நைட் ரைடர்ஸ் அணி.

முதலில் பேட் செய்த சன்ரைசர்ஸ் அணி 113 ரன்களுக்கு ஆட்டமிழந்தது. 114 ரன்கள் சேர்த்தால் வெற்றி எனும் இலக்குடன் களமிறங்கிய கொல்கத்தா அணி 57 பந்துகள் மீதமிருக்கையில் 2 விக்கெட் இழப்புக்கு 114 ரன்கள் சேர்த்து 3வது முறையாக சாம்பியன் பட்டத்தைக் கைப்பற்றியது.

கொல்கத்தா அணியின் சாதனைகள்

'நாக் அவுட்' நாயகன் ஸ்டார்க்

இறுதிப்போட்டி பிசுபிசுத்து, ஒருதரப்பாக மாறியதற்கு மூல காரணமே கொல்கத்தா அணியின் வேகப்பந்துவீச்சாளர் ஸ்டார்க் மட்டும்தான். ஃபைனலில் ரன் மழையை எதிர்பார்த்து காத்திருந்த ரசிகர்களை ஸ்டார்க் தனது அற்புதமான, மாயாஜால பந்துவீச்சால் ஏமாற்றி, வெறும் 29 ஓவர்களில் முடிக்கவைத்துவிட்டார்.

முதல் தகுதிச்சுற்று ஆட்டத்தில் 3 விக்கெட்டுகளை வீழ்த்தி ஆட்டநாயகன் விருது வென்ற மிட்ஷெல் ஸ்டார்க், இறுதிப் போட்டியிலும் 2 விக்கெட்டுகளை சாய்த்து ஆட்டநாயகன் விருதை பெற்றார். ப்ளே ஆஃப் சுற்றில் 2 ஆட்டநாயகன் விருதுகளை வென்ற முதல் பந்துவீச்சாளராக ஸ்ட்ராக் உருவாகினார்.

ரூ.24 கோடி கொடுத்தது சரிதான் என நிரூபித்த ஸ்டார்க்

ஐபிஎல் ஏலத்தில் ரூ.24 கோடிக்கு மிட்ஷெல் ஸ்டார்க்கை கொல்கத்தா அணி வாங்கியபோது மென்ட்டர் கவுதம் கம்பீர் அனைவராலும் கிண்டலுக்கும், கேலிக்கும் ஆளாக்கப்பட்டார். 2015க்குப்பின் ஐபிஎல் தொடருக்குள் வரும் ஸ்டார்க் எப்படி பந்துவீசப் போகிறார் என்ற எதிர்பார்ப்பு இருந்தது.

சிஎஸ்கே அணிக்கு எதிராக கொல்கத்தா அணி தோற்றபோது ஸ்டார்க் ஒருவிக்கெட் கூட எடுக்காதபோது அவருக்கான ஐபிஎல் விலை பெரிதாக விமர்சிக்கப்பட்டது. லக்னெள மற்றும் பஞ்சாப் கிங்ஸ் அணிக்கு எதிராகவும் ஸ்டார்க் மோசமான பந்துவீச்சு இன்னும் விமர்சனத்தை கூர்மைப்படுத்தியது.

ஆனால் மனம்தளராத ஸ்டார்க் டெல்லி அணிக்கு எதிரான போட்டியில் ஒரு விக்கெட், மும்பை இந்தியன்ஸ் அணிக்கு எதிராக 4 விக்கெட்டுகளை வீழ்த்தி 'கம்பேக்' கொடுத்தார். அதன்பின் முதல் தகுதிச்சுற்றில் சன்ரைசர்ஸ் அணிக்கு பேரதிர்ச்சி அளித்து கொல்கத்தாவின் வெற்றிக்கும், இறுதிப்போட்டிக்கு செல்வதற்கும் ஸ்டார்க் பந்துவீச்சு முக்கியக் காரணமாக அமைந்தது.

இறுதி ஆட்டத்தில் சன்ரைசர்ஸ் பேட்டிங் அஸ்திவாரத்தையே வேரோடு பிடுங்கி எறிந்ததுபோல் ஸ்டார்க்கின் துல்லியமான பந்துவீச்சு அமைந்தது. அதிலும் அபிஷேக் ஷர்மாவை க்ளீன் போல்டாக்கிய ஸ்டார்க்கின் பந்துவீச்சு இந்த சீசனில் சிறந்த பந்துவீச்சாக இருக்கும் என்று கூறலாம்.

தகுதிச்சுற்று ஆட்டத்தில் முதல் ஓவரில் டிராவிஸ் ஹெட் விக்கெட்டை வீழ்த்தியதால், ஸ்ட்ரைக்கை அபிஷேக் வைத்திருந்தார். முதல்பந்தில் இருந்து லென்த்தை மாற்றாமல் பந்தை வெளியே ஸ்விங் செய்தார். அபிஷேக்கும் முதல் 3 பந்துகளில் பீட்டன் ஆகி, 4வது பந்தில் 2 ரன்கள் சேர்த்தார். ஆனால், 5வது பந்தில் நினைத்தது நடந்தது.

உண்மையில் முதல் தரமான டெஸ்ட் பந்துவீச்சு, இந்த சீசனில் மாஸ்டர்கிளாஸ் பந்துவீச்சு என்று சொல்ல வேண்டும். சரியான லென்த்தில் பந்து பிட்ச் ஆகி, அபிஷேக்கை நோக்கிச் சென்ற பந்து அவரின் அருகே சென்றபோது லேசாக அவுட் ஸ்விங் ஆகி அபிஷேக்கை ஏமாற்றி ஸ்டெம்ப்பை பதம்பார்த்து சென்றது.

இந்த ஒரு விக்கெட் மூலம் ஸ்டார்க் தனக்கு வழங்கப்பட்ட ரூ.24 கோடி சரியானது என்பதை நிரூபித்து வெற்றிக்கு அச்சாரமிட்டு சென்றார்.

கொல்கத்தா சாம்பியன்ஷிப் வெல்ல காரணங்கள்

முழுமையான வெற்றி

கொல்கத்தா அணியின் கேப்டன் ஸ்ரேயாஸ் அய்யர் கூறுகையில் “இந்த வெற்றி முழுமையானது. இதைத்தான் வீரர்களிடம் கேட்டோம், அதை வழங்கியுள்ளனர். இந்த வெற்றியின் மகிழ்ச்சியை விவரிக்க வார்த்தைகள் இல்லை. நாங்கள் முதலில் பந்துவீசியது எங்களுக்குக் கிடைத்த அதிர்ஷ்டம். அனைத்துமே எங்களுக்கு சாதகமாக அமைந்தது. இந்த சீசன் முழுவதும் சிறப்பான ஆட்டத்தை வெளிப்படுத்திய சன்ரைசர்ஸ் அணிக்கு வாழ்த்துகள். அதிக அழுத்தம் கொண்ட ஆட்டத்தில் ஸ்டார்க் சிறப்பாக செயல்பட்டார்.

இளைஞர்கள் வளரும் வீரர்கள் அதிகம் கற்க வேண்டும். எப்போதும் மந்திரக்கோலை கையில் வைத்துக்கொண்டு எப்போது பந்துவீச என ரஸல் என்னிடம் கேட்டுக்கொண்டே இருப்பார். பெரும்பாலான ஆட்டங்களில் திருப்புமுனையை ரஸல் தனது பந்துவீச்சால் ஏற்படுத்திக் கொடுத்தார். ஃபைனலில் எங்களுக்கான வெற்றியை வெங்கடேஷ் எளிதாக்கினார். ஒவ்வொருவரும் பங்களிப்பு செய்தனர். எந்த தனிநபரும் இதற்கு சொந்தம் கொண்டாட முடியாது, இது குழுவின் வெற்றி, முழுமையான வெற்றி” எனத் தெரிவித்தார்.

சன்ரைசர்ஸ் அணிக்கு கொல்கத்தா நைட் ரைடர்ஸ் பாராட்டு

சன்ரைசர்ஸ் அணி 2வது இடம் பெற்றதற்கு கொல்கத்தா நைட் ரைடர்ஸ் அணி தனது எக்ஸ் தளத்தில் படத்தை பதிவிட்டு பாராட்டுத் தெரிவித்திருந்தது. அதில் “சன்ரைசர்ஸ் அணியை மதிக்கிறோம். ஒரு மோசமான ஆட்டம், ஒட்டுமொத்த அற்புதமான சீசனையும் எந்தவிதத்திலும் விவரிக்காது. 2024 ஐபிஎல் சீசனில் மறக்கமுடியாத சில பங்களிப்புகளை வழங்கினீர்கள், சீசனின் டாப் ஒன்னாகவும் இருந்தீர்கள்” என தெரிவித்துள்ளது.

"எந்த வாய்ப்பும் கிடைக்கவில்லை"

சன்ரைசர்ஸ் அணியின் கேப்டன் கம்மின்ஸ் கூறுகையில் “கொல்கத்தா அணியினர் சிறப்பாகப் பந்துவீசினர், நாங்கள் தோற்கடிக்கப்பட்டோம். எங்களுக்கு எந்த வாய்ப்பையும் அவர்கள் வழங்கவில்லை. அதாவது ஆமதாபாத் ஆட்டம்போல் இதுவும் அமைந்தது. சேப்பாக்கம் விக்கெட்டை புரிந்துகொள்ள முடியவில்லை, 200 அடிக்கும் விக்கெட்போல் இல்லை. 160 ரன்கள்தான் சேர்க்க முடியும். 250 ரன்களுக்கு மேல் 3 முறை இந்த சீசனில் அடித்தது இந்த சீசனில் மறக்க முடியாதது. எங்களுக்கு இது மிகப்பெரிய சீசனாக அமைந்தது. இந்த அணி வீரர்களோடு, சப்போர்ட் ஸ்டாப்களுடன் அதிகமாக இதற்குமுன் பணியாற்றியதில்லை, ஆனால் சீசன் முடியும் தருவாயில் அவர்களின் நெருக்கம் அதிகமாக இருக்கிறது" எனத் தெரிவித்தார்.

மிரட்டலான அணியாக மாறிய சன்ரைசர்ஸ்

2024 சீசன் சன்ரைசர்ஸ் அணிக்கு மறக்க முடியாத சீசனாக அமைந்திருந்தது. இந்த சீசனில்தான் அதிகபட்ச ரன்களை(287) அடித்து, சன்ரைசர்ஸ் அணி ஐபிஎல் வரலாற்றில் சாதனை படைத்தது. அதே சன்ரைசர்ஸ் அணிதான் ஃபைனலில் 113 ரன்களுக்குச் சுருண்டு குறைந்தபட்ச ஸ்கோரையும் பதிவு செய்தது.

பேட்டிங்கில் அசுரத்தனமாக செயல்பட்டு எதிரணிகளின் நம்பிக்கையை உடைக்கும் வகையில் சன்ரைசர்ஸ் அணி செயல்பட்டது. தொடக்கத்திலிருந்தே பேஸ்பால் கிரிக்கெட் உத்தியை கையில் எடுத்த சன்ரைசர்ஸ் அணி அபிஷேக் ஷர்மா, டிராவிஸ் ஹெட்டை தயார் செய்தது. கொல்கத்தா அணிக்கு நரைன், சால்ட் எவ்வாறு வலுவான தொடக்கத்தை அளித்தார்களோ அதேபோன்ற தொடக்கத்தை இருவரும் வழங்கினர். இருவரின் பேட்டிங்கும் சன்ரைசர்ஸ் அணிக்கு நினைத்துப் பார்க்க முடியாத வெற்றிகளை வாரிக்கொடுத்தன.

சன்ரைசர்ஸ் அணியை நிர்வகிக்கவே, வழிநடத்தவே ரூ.20 கோடிக்கு ஆஸ்திரேலிய கேப்டன் பாட் கம்மின்ஸை வாங்கியது நிர்வாகம். பாட் கம்மின்ஸ் கேப்டன் பொறுப்பேற்றபின் ஆட்டத்தின் போக்கிலும், கேப்டன்ஷிப் உத்தியிலும் பல மாற்றங்கள் வந்தன. அந்த மாற்றம் ஒவ்வொரு வெற்றிக்கும் உதவியது. எந்த நேரத்தில் எந்த பந்துவீச்சாளர்களை பயன்படுத்துவது என தெரிந்து சரியாக கம்மின்ஸ் செயல்பட்டார். குறிப்பாக ப்ளேயிங் லெவனில் பெரிதாக மாற்றம் செய்யாமல் சில மாற்றங்களுடனே கம்மின்ஸ் அற்புதமான கேப்டன்ஷிப்பை செய்து இறுதிப்போட்டிவரை அழைத்து வந்தார்.

சன்ரைசர்ஸ் அணிக்கு பெரிய பலமாக அமைந்து, நடுப்பகுதி ஓவர்களில் அணியை கட்டமைக்கும் பொறுப்பை கிளாசன் பார்த்துக்கொண்டார். கிளாசன் இருக்கும்வரை வெற்றி உறுதியில்லை என்று எதிரணி நம்பும் அளவுக்கு பேட்டிங் இருந்தது. இந்த சீசனில் எதிரணிகளை இரக்கமின்றி வதம் செய்யும் பேட்டராக கிளாசன் இருந்தார்.

ஆனால், டிராவிஸ் ஹெட், அபிஷேக் பேட்டிங்கில் தோல்வி அடைந்தபோது, ஒட்டுமொத்த அணியும் தோல்வி அடைகிறது என்ற ரகசியத்தை கொல்கத்தா அணி கண்டுபிடித்து அந்த அச்சாணிகளை பிடுங்கி சன்ரைசர்ஸ் வண்டியை கவிழ்த்தது. தகுதிச்சுற்றிலும், ஃபைனலிலும் இருவரின் விக்கெட்டுகளை கழற்றியபோதே, பாதி தோல்வியை சன்ரைசர்ஸ் ஒப்புக்கொண்டது.

பரிசுத்தொகை எவ்வளவு?

சாம்பியன்ஷிப் பட்டம் வென்ற கொல்கத்தா நைட் ரைடர்ஸ் அணிக்கு ஐபிஎல் 2024 கோப்பையை முன்னாள் வீரர் ரோஜர் பின்னி, பிசிசிஐ செயலாளர் ஜெய்ஷா வழங்கினார்.

கொல்கத்தா அணியின் சாம்பியன்ஷிப் பட்டம் வென்றதற்கான நினைவுப்பரிசு பயிற்சியாளர் சந்திரகாந்த் பாட்டீலுக்கு வழங்கப்பட்டது, சாம்பியன்ஷிப் அணிக்கு ரூ.20 கோடி பரிசுத் தொகைக்கான காசோலையை கேப்டன் ஸ்ரேயாஸ் அய்யர் பெற்றார். 2வது இடம் பிடித்த சன்ரைசர்ஸ் அணிக்கு ரூ.12.50 கோடிக்கான காசோலையை அந்த அணியின் கேப்டன் பாட் கம்மின்ஸ் பெற்றுச் சென்றார்.

யாருக்கு எந்த விருது?

(சமூக ஊடகங்களில் பிபிசி தமிழ் ஃபேஸ்புக், இன்ஸ்டாகிராம், எக்ஸ்(டிவிட்டர்) மற்றும் யூட்யூப் பக்கங்கள் மூலம் எங்களுடன் இணைந்திருங்கள்.)