'மோதல் மேலும் மோசமாகலாம்' : மத்திய கிழக்கில் முந்தைய போர்களை இது எவ்வாறு மாறுபட்டதாக இருக்கும்?

இரான் மீது அமெரிக்காவும் இஸ்ரேலும் தாக்குதலைத் தொடங்கியுள்ளன, 'பெரிய அளவிலான போர் நடவடிக்கைகள்' நடைபெற்று வருவதை அமெரிக்க அதிபர் டிரம்ப் உறுதிப்படுத்தியுள்ளார்.

இரான் உச்ச தலைவர் காமனெயி அலுவலகம் மற்றும் டெஹ்ரானில் உள்ள அதிபர் அலுவலகம் ஆகியவையும் இந்த தாக்குதலில் குறிவைக்கப்பட்டதாக கூறப்படுகிறது.

இரான் மீது தங்களது நாடு முன்னெச்சரிக்கை தாக்குதலைத் தொடங்கியுள்ளதாக இஸ்ரேலிய பாதுகாப்பு அமைச்சர் இஸ்ரேல் காட்ஸ் கூறுகிறார்.

தலைநகர் தெஹ்ரான் உட்பட இரானின் இஸ்ஃபஹான், கோம், கரஜ் மற்றும் கெர்மான்ஷா ஆகிய ஐந்து நகரங்களில் வெடிப்புச் சத்தங்கள் கேட்டன - அங்கிருந்து புகை மூட்டம் எழுவதை புகைப்படங்கள் காட்டுகின்றன.

இந்தத் தாக்குதலுக்குப் பதிலடியாக இரான் ஏவுகணைகளை வீசியுள்ளதாக இஸ்ரேலிய ராணுவம் தெரிவிக்கிறது.

அமெரிக்க கடற்படையின் 5வது பிரிவின் தாயகமான பஹ்ரைன் தலைநகரில் வெடிப்புகள் பதிவாகியுள்ளன

மத்திய கிழக்கு பிராந்தியத்தில் அமெரிக்காவின் மிகப்பெரிய விமானப்படை தளமான அல் உதெய்த் விமான தளம் கத்தாரிலும் தாக்குதல்கள் நடந்திருப்பதாக கூறப்படுகிறது. கத்தார் தலைநகர் தோஹாவில் வெடிப்புச் சத்தங்கள் மற்றும் வான்வழித் தாக்குதல் சைரன்கள் கேட்டன.

இரானிய பாலிஸ்டிக் ஏவுகணைகளை இடைமறித்து அழிக்கையில், அதன் சிதைவுகள் விழுந்து ஒருவர் பலியாகியிருப்பதாக ஐக்கிய அரபு எமிரேட்ஸ் தெரிவித்துள்ளது.

இரானிய உச்ச தலைவரின் அலுவலகம் தாக்கப்பட்டதாக தகவல்

ஜியார் கோல்

பிபிசி பாரசீகம்

டெஹ்ரானிலும் இரான் முழுவதும் பல நகரங்களிலும் ஏராளமான வெடிப்புச் சத்தங்கள் கேட்டுள்ளன.

இரான் உச்ச தலைவர் காமனெயி அலுவலகம் மற்றும் டெஹ்ரானில் உள்ள அதிபர் அலுவலகம் ஆகியவையும் இந்த தாக்குதலில் குறிவைக்கப்பட்டதாக கூறப்படுகிறது.

கெர்மன்ஷா, கும், இஸ்ஃபஹான், தப்ரிஸ், கராஜ் ஆகிய இடங்களில் உள்ள இராணுவ தளங்கள் மற்றும் இரானின் தெற்கில் உள்ள கெனாரக்கில் உள்ள இரானிய கடற்படை தளங்கள் மீது தாக்குதல் நடத்தப்பட்டுள்ளது.

குர்திஷ் பிராந்தியத்தில் உள்ள சிறிய நகரமான கம்யாரானில் இருந்து எங்களுக்குக் கிடைத்த ஒரு வீடியோ, ஒரு இஸ்லாமிய புரட்சிகர காவல் படையின் தளம் குண்டுவீச்சுக்கு இலக்கானதை காட்டுகிறது.

தாக்குதல்களுக்கு முன்னதாக இராணுவ தளங்கள் மற்றும் முக்கிய ஆயுதங்கள் நிலைநிறுத்தப்பட்டுள்ள இடங்களுக்கு அருகிலுள்ள பகுதிகளை காலி செய்யுமாறு இரானிய பொதுமக்களை இஸ்ரேலிய ராணுவம் எச்சரித்திருந்தது.

முன்னாள்அதிபர் மஹ்மூத் அஹ்மதி நிஜாத் வசிக்கும் டெஹ்ரானின் நர்மக் பகுதியில் உள்ள ஒரு வீடு தாக்கப்பட்டதாக டெஹ்ரானில் இருந்து வரும் படங்கள் காட்டுகின்றன. முன்னாள் அதிபர் காயமடைந்தாரா என்பது தெளிவாகத் தெரியவில்லை.

இரானிய உள்துறை அமைச்சகம், பாதுகாப்புப் படைகள் நிலைமையை கட்டுக்குள் வைத்திருக்கத் தயார் நிலையில் இருப்பதாகவும், நாடு முழுவதும் உள்ள பல மருத்துவமனைகள் தயார் நிலையில் இருப்பதாகவும் தெரிவித்துள்ளது.

'தாக்குதல் கடுமையாக இருந்தது'

மெர்லின் தாமஸ் மற்றும் பால் பிரவுன்

டெஹ்ரானில் இருந்து வெளிவந்துள்ள, பல சரிபார்க்கப்பட்ட வீடியோக்கள் தலைநகருக்கு மேலே பெரிய புகை மூட்டங்கள் எழுவதைக் காட்டுகின்றன.

ஒரு பரபரப்பான சந்திப்பில் படமாக்கப்பட்ட ஒரு வீடியோ, வாகன ஓட்டுநர்கள் மற்றும் பாதசாரிகள் வானத்தைப் பார்க்கும் போது போக்குவரத்து மெதுவாக இருப்பதைக் காட்டுகிறது. காட்சிகளில், "அவர்கள் கடுமையாகத் தாக்கினர். அவை எங்கே மோதின? அவர்கள் அது காமனெயி வீடு என்று கூறுகிறார்கள்." என்று ஒருவர் கூறுவதைக் கேட்க முடியும்.

இரான் உச்சத் தலைவர் ஆயதுல்லா அலி ஹொசைனி காமனெயி அலுவலகமான லீடர்ஷிப் ஹவுஸிலிருந்து ஒரு கிலோமீட்டர் தொலைவுக்குள் இந்த வீடியோ படம்பிடிக்கப்பட்டிருக்கலாம் என்று கருதுகிறோம். அந்த கட்டடம் நேரடியாகத் தாக்குதலுக்கு இலக்கானதா என்பது அந்த வீடியோ கோணத்தில் இருந்து தெளிவாகத் தெரியவில்லை.

அதே பகுதியில் இருந்து வெளியான, மற்றொரு சரிபார்க்கப்பட்ட புகைப்படம் குடியிருப்பு கட்டிடங்கள் மற்றும் சிறிய மளிகைக் கடைகளுக்கு மேலே அடர்த்தியான, இருண்ட புகை எழுவதைக் காட்டுகிறது. நாட்டின் பிற இடங்களிலும் தாக்குதல் நடந்திருப்பது பற்றிய செய்திகளும் வெளியாகியுள்ளன.

'இரானின் பதிலடி தாக்குதல்'

"சிறிது நேரத்திற்கு முன்பு, இரானில் இருந்து இஸ்ரேல் நாட்டின் எல்லையை நோக்கி ஏவப்பட்ட ஏவுகணைகளை இஸ்ரேல் ராணுவம் அடையாளம் கண்டுள்ளது" என்று இஸ்ரேல் ராணுவம் அறிக்கையை வெளியிட்டுள்ளது.

இஸ்ரேல் ராணுவ அறிக்கையில், "இரானில் இருந்து இஸ்ரேல் நாட்டை நோக்கி ஏவப்பட்ட ஏவுகணைகள் அடையாளம் காணப்பட்டதைத் தொடர்ந்து, நாடு முழுவதும் பல பகுதிகளில் சைரன்கள் ஒலிக்கப்பட்டன. ஹோம் ஃப்ரண்ட் கமாண்டின் வழிமுறைகளைப் பின்பற்றுமாறு பொதுமக்கள் கேட்டுக் கொள்ளப்படுகிறார்கள்."

"இந்த நேரத்தில், இஸ்ரேலிய விமானப்படை அச்சுறுத்தலைத் தடுத்து நிறுத்தவும், தேவையான இடங்களில் தாக்குதல் நடத்தவும் செயல்பட்டு வருகிறது. பாதுகாப்பு என்பது காற்று புகாத அமைப்பு அல்ல, எனவே பொதுமக்கள் ஹோம் ஃப்ரண்ட் கமாண்டின் வழிகாட்டுதல்களை தொடர்ந்து கடைப்பிடிப்பது அவசியம்" எனத் தெரிவிக்கப்பட்டுள்ளது.

இரானிய ஏவுகணைகள் இடைமறிப்பு - ஒருவர் பலி

ஐக்கிய அரபு எமிரேட்ஸின் பாதுகாப்பு அமைச்சகம் வெளியிட்டுள்ள ஒரு அறிக்கையில், "தங்கள் நாடு இரானிய பாலிஸ்டிக் ஏவுகணைகளை உள்ளடக்கிய ஒரு தாக்குதலுக்கு" உள்ளாகியுள்ளது என்று கூறுகிறது.

"ஐக்கிய அரபு எமிரேட்ஸ் வான் பாதுகாப்பு அமைப்புகள் அந்த ஏவுகணைகளை அதிக செயல்திறனுடன் கையாண்டன மற்றும் பல ஏவுகணைகளை வெற்றிகரமாக இடைமறித்தன," என்று அந்த அறிக்கை கூறுகிறது.

அபுதாபியில் உள்ள ஒரு குடியிருப்புப் பகுதியில் ஏவுகணை சிதைவுகள் விழுந்ததால், பொருள் சேதம் ஏற்பட்டதாகவும், ஆசிய நாட்டவர் ஒருவர் உயிரிழந்ததாகவும் ஐக்கிய அரபு அமீரகத்தின் பாதுகாப்பு அமைச்சகம் கூறுகிறது. அவர் பெயர் குறிப்பிடவில்லை.

இந்தத் தாக்குதலை "பதற்றத்தை தூண்டும்" மற்றும் "கோழைத்தனமான செயல்" என்று கண்டிக்கிறோம். ஐக்கிய அரபு எமிரேட்ஸ் "பதிலடி கொடுக்க அதன் முழு உரிமையையும் கொண்டுள்ளது" என்று அந்த அறிக்கை கூறுகிறது.

அபுதாபியின் தெற்கே உள்ள அல் தஃப்ரா விமானத் தளத்தில் இருந்து, ஐக்கிய அரபு எமிரேட்ஸ் விமானப்படையுடன் அமெரிக்க விமானப்படை இணைந்து செயல்படுகிறது.

ஏவுகணை தாக்குதலை முறியடித்ததாக கத்தார் தகவல்

டேவிட் கிரிட்டன்

பிபிசி நியூஸ் மத்திய கிழக்கு

கத்தார் தலைநகர் தோஹாவில் வெடிப்புச் சத்தங்கள் மற்றும் வான்வழித் தாக்குதல் சைரன்கள் கேட்டன.

"நாட்டின் எல்லையை குறிவைத்து நடத்தப்பட்ட பல தாக்குதல்களை வெற்றிகரமாக முறியடித்ததாக"

கத்தார் பாதுகாப்பு அமைச்சகம் கூறியதாக அரசு ஊடகங்கள் தெரிவித்துள்ளன.

அமெரிக்காவில் தயாரிக்கப்பட்ட, எதிரி ஏவுகணைகளை இடைமறித்து தாக்கும் பேட்ரியாட் அமைப்பு, இரானிய ஏவுகணையை இடைமறித்ததாக கத்தார் அதிகாரி ஒருவர் ஏ.எஃப்.பி. செய்தி நிறுவனத்திடம் தெரிவித்தார்.

மத்திய கிழக்கு பிராந்தியத்தில் அமெரிக்காவின் மிகப்பெரிய விமானப்படை தளமான அல் உதெய்த் விமான தளம் கத்தாரில் உள்ளது.

'மோதல் இன்னும் மோசமடையக்கூடும்'

ஃபிராங்க் கார்ட்னர்

பாதுகாப்பு செய்தியாளர்

வளைகுடா அறிக்கைகள் வெடிப்புகள், சைரன்கள், வான் பாதுகாப்பு நடவடிக்கைகள் மற்றும் புகை மூட்டங்கள் குறித்து அடுத்தடுத்து தகவல்கள் வந்து கொண்டிருக்கின்றன.

இரான் எப்போதுமே அந்த பிராந்தியத்தில் உள்ள அமெரிக்க தளங்கள் மீது பதிலடி தாக்குதல் தொடுக்கப்படும் என்று எச்சரித்து வந்துள்ளது. சற்று தாமதத்திற்குப் பிறகே, அமெரிக்காவின் வளைகுடா அரபு நட்பு நாடுகள் மீது ஏவுகணை தாக்குதலை இரான் தொடுத்துள்ளது.

"இது மிகவும் பயங்கரமாக இருக்கிறது", என்று பஹ்ரைனில் வசிக்கும் ஒரு பிரிட்டிஷ் நாட்டவர் கூறினார். பேட்ரியாட் ஏவுகணை பேட்டரி ஒன்று, வரும் ஏவுகணையை தலைக்கு மேல் இடைமறிப்பதைப் பார்த்ததாக என்னிடம் கூறினார்.

ஐக்கிய அரபு எமிரேட்ஸின் மிகவும் பிரபலமான இடமான துபையை உள்ளடக்கிய வளைகுடா நாடுகள் போரை சந்திப்பது இது முதல் முறை அல்ல.

1980-88 இல் இரான்-ஈராக் போர், 1991இல் குவைத் மீதான இராக் படையெடுப்பும் அதன் பின்னரான அமெரிக்க தாக்குதலும், 2003 இல் இராக் படையெடுப்பு மற்றும் கடந்த ஆண்டு இரான் கத்தாரில் உள்ள அமெரிக்க விமானப்படை தளத்தை குறிவைத்தது என பட்டியல் நீள்கிறது.

ஆனால் இம்முறை மாறுபட்டதாக இருக்கும். இது முன்பு இருந்ததை விட பெரியது மற்றும் ஆபத்தானது.

அதனால்தான் ஓமன், கத்தார் மற்றும் சௌதி அரேபியாவின் தலைவர்கள் முன்னதாக டிரம்ப் நிர்வாகத்தை தங்கள் பெரிய அண்டை நாட்டை கடல் கடந்து தாக்க வேண்டாம் என்று வலியுறுத்தினர்.

இந்த மோதல் இன்னும் மோசமாகலாம்.

- இது, பிபிசிக்காக கலெக்டிவ் நியூஸ்ரூம் வெளியீடு