Инфиҷоре тоза дар Волгогради Русия шуморе кушта ва захмӣ бар ҷо гузошт

Расонаҳои Русия хабар аз инфиҷори бумбе дар як утубус дар шаҳри Волгоград медиҳанд, ки боъиси кушта шудани дастикам 14 нафар ва захмӣ шудани беш аш 20 нафари дигар шудааст.

Ба гуфтаи мақомоти амниятӣ, ин инфиҷор монанди ҳамлаи дирӯз иқдоме "теруристӣ" будааст.

Садои ин инфиҷор то чанд килуметр дуртар шунида шуд ва ба гуфтаи шоҳидони айнӣ, аҷсоди қурбониён дар атрофи маҳалли инфиҷор пароканда аст.

Шаҳри Волгоград дар ҳафтсадкилуметрии шимоли шарқии Сочӣ қарор дорад, ки шаш ҳафтаи дигар мизбони улампики зимистонӣ аст.

Дирӯз ҳам ҳамлаи интиҳорӣ дар истгоҳи қатор дар ин шаҳр боъиси кушта шудани 17 ва захмӣ шудани 40 нафар шуд.

Ҳамлаи дирӯз замоне анҷом шуд, ки милюнҳо рус барои ҷашни соли нави милодӣ бо қатор сафар мекарданд.

Тасовири як дурбини мадорбаста аз инфиҷори дирӯз нишон медиҳад, ки нуре норанҷиранг пушти дари истгоҳи қатор мисли раъд рӯшан ва хомӯш шудааст.

Бино бар гузоришҳо, тадобири амниятии шадиде дар фурӯдгоҳҳо ва истгоҳҳои қатори Русия ба иҷро даромадааст.

Даниел Санфурд, хабарнигори Би-би-сӣ дар Русия, мегӯяд ин ҳамалот нишон медиҳад бумбгузорон барои ҷалби таваҷҷуҳи байналмилалӣ ниёз надоранд Сочиро ҳадаф қарор бидиҳанд ва ҳамла ба ҳар ҷое дар Русия ҳадафи онҳоро бароварда хоҳад кард.

Ҳанӯз ҳеч гурӯҳе масъулияти ҳамалоти имрӯз ва дирӯзро ба уҳда нагирифтааст.

Давлати Русия омили ҳамлаи интиҳории дирӯзро шибҳинизомиёне донист, ки мехоҳанд то замони баргузории ин рӯйдоди варзишӣ хушунатро дар кишвар густариш диҳанд.

Шӯрои амнияти Созмони Милали Муттаҳид ҳам бо судури баёнияе ҳамлаи дирӯзро маҳкум кард.

Пештар, дар моҳи октябр ва дар ҷараёни як ҳамлаи интиҳории дигар ба утубусе дар шаҳри Волгоград шаш нафар кушта шуда буданд.

Маҳалли баргузории Улампик дар Сочӣ ба минтақаи ноороми шимоли Қафқоз наздик аст. Ин шаҳр дар 900-килуметрии ҷануби Маскав ва 650-килуметрии шимоли Қафқоз қарор дорад.

Дар солҳои ахир густариши фаъъолияти исломгароён дар шимоли Қафқоз боъиси ҳамалоти мутаъаддиде дар Русия шудааст.