Эрон ва Афғонистон паймони истротежик имзо мекунанд
Ҳомид Карзай, раиси ҷумҳурии Афғонистон, ки барои сафаре якрӯза озими Теҳрон шуда, мавриди истиқболи Ҳасани Рӯҳонӣ, раиси ҷумҳурии исломии Эрон қарор гирифт.
Пас аз он руасои ҷумҳури Эрон ва Афғонистон ба ҳамроҳи вузарои хориҷа ба баҳс ва гуфтугӯ дар бораи масоили минтақа, ба вижаи вазъияти сиёсӣ-амниятии Афғонистон пардохтанд. Дар ин дидор унвон шуд, ки ду кишвар музокиротро барои имзои мувофиқатномаи ҷомеъи дӯстӣ ва ҳамкорӣ оғоз хоҳанд кард.
Ин нахустин сафари хориҷии оқои Карзай пас аз баргузории Луя ҷиргаи машваратӣ аст, ки аз ӯ хост тавофуқномаи амниятӣ бо Омрикоро имзо кунад. Оқои Карзай дар ифтитоҳияи ин ҷирга гуфта буд, ки Эрон ба сароҳат бо тавофуқнома мухолифат кардааст.
Ҳасани Рӯҳонӣ дар дидор бо Ҳомид Карзай гуфтааст, ки Эрон бо ҳузури низомии хориҷӣ дар минтақа, ба вижа дар Афғонистон мухолиф аст.
Вебсойти дафтари оқои Карзай дар хабари кӯтоҳе навишта: "Аз раиси ҷумҳури кишвар дар ҷараёни сафараш дар маросими таҳлифи дуктур Ҳасани Рӯҳонӣ, ки ба торихи 13 асади (мурдоди) соли ҷорӣ анҷом шуд, даъват ба амал омада буд, то ҷиҳати баҳс ва гуфтугӯи муфассал дар робита ба густариши равобит ва ҳамкориҳои дуҷониба миёни ду кишвар дар як фурсати муносиб ба Эрон сафар намояд."
Фоиқ Воҳидӣ, аз сухангӯёни оқои Карзай ба Би-би-сии форсӣ гуфт, ки ҳарчанд ба сурати мушаххас дар барномаи сафари оқои Карзай ба гуфтугӯи ду раиси ҷумҳурӣ дар бораи тавофуқномаи Афғонистон ва Омрико ишора нашуда, аммо "тамоми масоиле", ки байни ду кишвари Эрон ва Афғонистон аҳамият дошта бошад, дар ин сафар мавриди баҳс қарор мегирад.
"Чархаи хушунат"
Дар остонаи сафари оқои Карзай ба Теҳрон Ҳуҷаттуллоҳ Фиғонӣ, раиси ситоди Афғонистони вазорати умури хориҷаи Эрон ба хабаргузории Форс гуфта аст: "Ба эътиқоди мо ин мувофиқатнома чархаи ботили хушунатро дар Афғонистони истимрор мебахшад."
Ба гузориши хабаргузории Форс оқои Фиғонӣ таъкид карда, ки ин тавофуқнома "набояд муҷиби зарар ва зиён ё эҷоди таҳдид нисбат ба дигарон шавад". Ӯ афзуда: "Мо мухолифи он буда ва муътақидем имзои ин мувофиқатнома дар ниҳоят кумаке ба Афғонистон нахоҳад кард."
Пештар Иброҳим Раҳимпур, муъовини вазири хориҷаи Эрон гуфта буд, ки "Эрон дар чанд вақти ахир ба сурати бародарона ба мақомоти афғонӣ эълом кард, ки бо имзои ин муъоҳида мувофиқ нест, зеро имзо ва иҷрои ин муоҳида ба манофеъи баландмуддати миллат ва давлати Афғонистон осеб мезанад."
Ҳарчанд Муҳаммадризо Баҳромӣ, сафири Эрон дар Кобул дар дидоре бо Иршод Аҳмадӣ, муъовини вазири хориҷаи Афғонистон гуфт, ки изҳороти оқои Раҳимпур мавзеъи давлати Эрон нест, аммо ба таври куллӣ суханони муъовини вазири хориҷаи Эрон вокуниши тунди мақомҳои вазорати хориҷаи Афғонистонро ба дунбол дошт.
Мақомоти давлати Афғонистон ва давлати Омрико аз ҳудуди ду соли пеш дар бораи ҳамкориҳои истротежик ва амниятӣ байни ду кишвар гуфтугӯ мекунанд ва ахиран бахши амниятии ин ҳамкориҳо ба далели тарҳи шуруте аз ҷониби оқои Карзай заминасози гуфтугӯҳои тоза шудааст.
Ҳарчанд ахиран ҷиргаи машваратӣ дар Кобул аз оқои Карзай хост, ки тавофуқномаи ҳамкориҳои амниятӣ ва дифоъӣ бо Омрикоро ҳар чӣ зудтар имзо кунад, аммо ӯ хостори ҳусули итминон аз ҷониби Омрико дар чанд мавриди қабл аз имзои ин санад шудааст؛ аз ҷумла заминасозӣ барои мусолиҳа бо Толибон ва озодии зиндониёни ин гурӯҳ аз Гуонтоному.
Бо вуҷуди ин мақомҳои омрикоӣ дар сафаре, ки ахиран ба Кобул доштаанд, гуфтугӯи муфассале дар ин хусус бо мақомҳои давлати Афғонистон ва аз ҷумлаи шахси раисҷумҳур доштаанд.
Дар охирин мавридЧок Ҳегал, вазири дифоъи Омрико дар сафаре ба Кобул дар рӯзи шанбе, 7 декабр гуфт, ки Бисмиллҳ Муҳммадӣ, вазири дифоъи Афғонистон ба ӯ гуфта, ки ин тавофуқнома имзо мешавад.
Давлати Омрико хостори имзои ин тавофуқнома пеш аз поёни соли ҷории мелодӣ аст. Ин тавофуқнома ба нерӯҳои омрикоӣ иҷоза медиҳад, ки аз 9 пойгоҳи низомӣ дар Афғонистон истифода кунанд.
