Tanzania yaongoza katika ustawi wa akili ya vijana Duniani - Ripoti

Ripoti ya hivi majuzi, Ripoti ya Hali ya Akili Duniani, imefichua kwamba vijana wa Kiafrika wanaonyesha viwango vya juu vya afya ya akili, tahadhari, na ustahimilivu.

Kulingana na Business Insider Africa , ripotio hiyo iliyochapishwa na Mradi wa Global Mind, ilichambua zaidi ya majibu milioni moja juu ya afya ya akili kutoka kwa watu wanaotumia mtandao katika nchi 76.

Ripoti hiyo iligundua kupungua kwa kiasi kikubwa kwa ustawi wa kiakili miongoni mwa vijana wenye umri wa miaka 18 hadi 34 katika mataifa yenye mapato ya juu, bila dalili za kupona.

Hata hivyo, mataifa kadhaa ya Kiafrika yalionyesha ujasiri mkubwa wa kiakili miongoni mwa vijana.

Kulingana na Business Insider Afrika, Tanzania ilishika nafasi ya kwanza duniani kwa ustawi wa kiakili wa vijana, ikiwa na alama za Afya ya Akili (MHQ) zaidi ya 60.

Vijana wazima nchini Nigeria na Kenya pia walipata alama za juu, na alama za MHQ katika safu ya 50-60.

Kuzorota kwa afya ya akili katika mataifa yenye mapato ya juu kunasababishwa na ugumu wa kudhibiti hisia, kudhibiti mawazo, na kudumisha uhusiano mzuri.

Matokeo muhimu

Tathmini ya MHQ ni uchunguzi wa mtandaoni unaopima hali ya kiakili, kihisia na kijamii. Inatoa alama ya jumla inayoangazia uwezo wa mtu wa kushughulikia mafadhaiko na kufanya kazi kwa tija, ikitoa maarifa kuhusu mienendo ya afya ya akili duniani.

Ripoti hii inaangazia changamoto za afya ya akili ambazo vijana walio na umri mdogo (18-34) wanakabili duniani kote, na wastani wa Kiwango cha Afya ya Akili (MHQ) cha alama 38.

Ingawa vijana wa Afrika Kusini mwa Jangwa la Sahara wanaonyesha ustahimilivu wa juu zaidi, asilimia 41 ya vijana duniani kote hupata dhiki inayodhoofisha utendaji.

Matokeo ya utafiti yanasema kwamba vizazi vichanga vinatatizika sana na kazi za utambuzi na kijamii-kama vile umakini, udhibiti wa kihemko, na mwingiliano wa kijamii-kwa viwango vya mara 4-5 zaidi kuliko watu wazima wazee.

Kupungua huku kumechangiwa na kudhoofika kwa miunganisho ya kijamii, vijana kupewa mapema simu aina ya smartphone, kuongezeka kwa matumizi ya vyakula vilivyochakatwa zaidi na zaidi, na sumu za mazingira.

Dk. Tara Thiagarajan, Mwanzilishi na Mwanasayansi Mkuu katika Sapien Labs, anasisitiza faida ya kipekee ya Afrika katika ustahimilivu wa kiakili wa vijana.

Anazihimiza serikali kulinda nguvu hii kwani ukuaji wa haraka wa miji na kupitishwa kwa dijiti hurekebisha maisha.

Kulingana na ripoti hiyo, jedwali hili linaangazia mataifa 10 bora ambapo vijana wanaongoza katika ustawi wa kiakili.