Jinsi Diego Maradona na Argentina walivyotumia 'ushirikina' kushinda kombe la Dunia

Katika awamu ya pili ya nyota wa Kombe la Dunia, mwandishi wa wasifu wa Diego Maradona na mtaalamu wa soka wa Uhispania Guillem Balague anasimulia hadithi ya ndani ya jinsi mchezaji huyu wa Argentina alitoa msukumo wa kushinda Kombe la Dunia huko Mexico 1986.

Diego Maradona alifika kwenye Kombe la Dunia la Mexico la 1986 akiwa amebeba viatu vyake pekee . Vilevile alibeba matumaini na ndoto za taifa zima ambalo bado linatatizika kifedha na kihisia kutokana na vita vilivyopiganwa katika Visiwa vya Falkland miaka minne mapema.

Wakati Maradona na wachezaji wenzake wa Argentina waliposhinda mashindano hayo, walifanya hivyo kama wawakilishi wa taifa ambalo katika msimu mmoja walirudisha umaarufu na tabasalamu lao .

Ilikuwa Kombe la Dunia ambalo lilimwona Maradona mwenye umri wa miaka 25 katika kilele cha ustadi wake wa kimwili licha ya kuongezeka kwa ushahidi wa uraibu ambao, baada ya muda, ungeharibu mwili wake; mchezaji nguli aliyeshinda kwa ajili ya nchi yake, kwa Waargentina wa rika zote ambao kila siku walikuwa wakimkumbusha yeye ni nani, alitoka wapi na angekuwaje isingekuwa soka.

Wachezaji walilazimika kuweka vivuli katika taa zao’

Argentina waliingia kwenye michuano hiyo huku Maradona akichukuliwa na kikosi kizima kama turufu yao, tumaini lao pekee la kweli, kundi zima lilijenga mahitaji yao kwake .

Beki Julio Olarticoechea, aliyeishi naye chumba kimoja huko Mexico, anakumbuka kutembea kwa kunyatia bafuni wakati Maradona amelala, akiwaza: “Natumai hataamka, anaweza asipate usingizi na itakuwa kosa langu iwapo atacheza vibaya kesho."

Kwa upande wa vifaa vilivyotolewa kwa timu, Kombe la Dunia la Mexico lilikuwa la kisasa zaidi. Wale waliopatikana upande wa Argentina walikuwa zaidi sawa na miundombinu ya zamani, isiyo na maendeleo ambayo walipaswa kushughulika nayo katika nchi yao badala ya kile kinachoweza kutarajiwa katika mashindano makubwa ya soka duniani.

Makazi ya Club America karibu na uwanja wa Azteca yalikuwa na simu moja kwa kikosi kizima na televisheni moja, iliyokuwa kwenye chumba cha kulia chakula. Walipofika, wachezaji walilazimika kuweka vivuli kwenye taa kwenye vyumba vyao ambavyo havijakamilika. Kulikuwa na vyumba umbali wa mita 100 kutoka kwa wachezaji ambapo vinne vililazimika kukaa katika hali iliyofanya sehemu nyingine ionekane nzuri.

Wachezaji wote, pamoja na Maradona, walipokea posho dogo kutoka kwa shirikisho la Argentina - la $25 kwa siku.

Lakini badala ya kukivunja kikosi, ilisaidia kuwaunganisha na kuwaimarisha.

“Ulipokubali kwenda kushiriki katika michunao hiyo ulikuwa unasema upo tayari kufanya kila kitu, kuishi katika mazingira mabaya, kuwacha mambo ya ndani na nje ya uwanja ambayo hukuyapenda,” alisema Jorge Valdano ambaye alifunga mabao manne wakati wa michuano hiyo.

"Hitaji hilo la kugawana kila kitu, nadhani, lilisaidia timu, kujihisi kuwa nyumbani. Ni muujiza mkubwa zaidi wa mabadiliko ambao nimeona katika kazi yangu ya mchezo huu."

Walihitaji kuwa na umoja na kusaidiana hasa kwa mechi zilizokuwa zikichezwa maeneo ya juu na mchana licha ya joto kali ili kuingiliana na ratiba za televisheni kote duniani. Pingamizi yoyote ilikabiliwa na ‘’endeleeni " kwa haraka kutoka kwa rais wa Fifa, Joao Havelange.

"Tulizungumza kwa manufaa ya mchezo. Walizungumza kwa manufaa ya biashara," Valdano alikumbuka baada ya kuongoza pingamizi na Maradona kuhusu nyakati za mechi kuanza.

'Kikosi kilichoweka ushirikina katika kiwango kipya'

Umoja ulijengwa kutokana na ushirikina na taratibu za kabla ya mechi kufuatia ushindi wa timu hiyo wa mechi ya ufunguzi dhidi ya Korea Kusini.

Siku chache kabla ya mchezo wao wa kwanza wa kundi, baadhi ya wachezaji walikuwa wamenaswa wakila hamburger kwenye kituo cha ununuzi na wakakaripiwa na daktari wa timu.

Kabla ya mechi, kulikuwa na nyama choma zilizoletwa na marubani wawili wa kampuni ya ndege ya Aerolineas Argentinas.

Wachezaji walichagua viti vyao kwenye basi chakavu lililowapeleka uwanjani.

Walipofika kwenye chumba cha kubadilishia nguo simu iliita, beki Jose Luis Brown akaipokea na hakukuwa na mtu upande wa pili.

Kiungo Carlos Tapia alinyoa nywele alipofika uwanjani, huku Maradona akitengeneza kitu kinachofanana na mtu chini kwa kutumia viatu vyake , shati na soksi, ambazo hakuna mtu aliyeruhusiwa kupita juu yake.

Kamera iliyonunuliwa na beki wa kati Nestor Clausen ilitumika kurekodi Olarticoechea akiwauliza maswali wachezaji wa kikosi kana kwamba alikuwa mwandishi wa habari.

Timu ilikunywa kinywaji kinachofanana na chai kilichopendwa sana nchini Ajentina.

Kocha Carlos Bilardo alimpigia mkewe simu mjini Buenos Aires mwendo wa saa kumi na moja kamili.

Kiungo Ricardo Giusti aliangusha peremende katikati ya uwanja.

Argentina ilishinda 3-1.

Mechi iliyofuata ilikuwa dhidi ya Italia. Wachezaji walikula hamburger tena, marubani wa Aerolineas walileta nyama choma, wachezaji walikaa viti sawa kwenye basi, Brown alijibu simu bila mtu upande wa pili, Tapia alinyolewa (ingawa hakuhitaji), Maradona alitengeneza tena mtu wake asiyejulikana chini , Olarticoechea akageuka mwandishi wa habari, timu ilikunywa chai inayopendwa sana Argentina huku wakati huo huo, Bilardo akampigia simu mkewe saa 17:00, na Giusti akaenda katikati ya uwanja ambapo alidondosha peremende.

Valdano, mtu aliyependa sana kusoma vitabu kuliko ngoma yenye hatima, alisema hivi kuhusu matambiko hayo: "Ninaheshimu sana imani potofu za kibinafsi lakini ninasumbuliwa na za pamoja.

Mwisho wa michuano tulikuwa ntumefanya matambiko mengi sana kama michezo ya kuigiza. ambayo imefanyika mara elfu."

Nahodha wa timu ambaye Maradona hakumsamehe

Nahodha wa timu Daniel Passarella - Muargentina wa kwanza kunyanyua kombe mwaka wa 1978, na mtu ambaye alifurahia sigara na glasi ya Scotch – ahakuweza kulisahau Kombe la Dunia la 1986.

Walipowasili Mexico timu iliambiwa kutokunywa maji ya eneo hilo, lakini Passarella alifikiri wazi kwamba vipande vya barafu kwenye whisky yake ya usiku sana havikuweza kuonekana na hatimaye alianza kuhara. Alifanya mazoezi kama kawaida siku mbili kabla ya mechi ya Korea Kusini, alitangazwa kama katika kikosi cha kwanza , lakini kuharisha kulirudi tena akapunguza kilo saba katika siku hizo chache.

Alirejea mazoezini kabla ya mechi ya tatu ya kundi dhidi ya Bulgaria lakini akapata jeraha la msuli katika mguu wake wa kushoto. Daktari wa timu hiyo alidai kuwa mchezaji huyo alizidisha mazoezi yake bila ruhusa, huku mchezaji huyo akisisitiza alivunjika baada ya kulazimishwa kucheza.

Hangeweza kuichezea Argentina tena na alibakia kuamini kulikuwa na njama kati ya Maradona na kocha Bilardo ya kumweka kando.

Amini utakaye, lakini matokeo ya Passarella yalikuwa ni kufunga virago vyake na kuelekea ufukweni.

Maradona hakuwahi kumsamehe na baadaye aliandika: "Mwaka wa 86 tulikuwa tunapigania roho zetu wakati yeye alikuwa akiota jua huko Acapulco."

Usiku wa kuamkia robo fainali dhidi ya England, Passarella aliugua tena na kulazwa hospitalini na kidonda cha koloni. Maradona alikataa kumtembelea hospitalini.

Walizunguka mji wote wa Mexico City kutafuta jezi za mechi ya robo fainali

Sare dhidi ya Italia, ushindi wa mabao mawili kwa sifuri dhidi ya Bulgaria na ushindi wa bao 1-0 dhidi ya Uruguay ulimaanisha kwamba mazingira yalipangwa kwa robo fainali dhidi ya Uingereza.

Yalikuwa mazingira ya sumu, hali iliyochochewa na vyombo vya habari - Vita vya Falklands bado vikikumbukwa – lilikuwa hakikisho kwamba mechi hii haitakuwa kama mchezo mwingine wa kawaida.

Maradona alitangaza: "Ni mpira wa miguu tu kama ile mingine." Lakini hakuna aliyeamini, hata mmoja wao.

Baadaye alikiri: "Sote tulitangaza kabla ya mchezo kwamba soka haikuwa na uhusiano wowote na Vita vya Malvinas [Falklands]... Takataka!"

Mashabiki wa Uingereza walikuwa wameimba wakati wa mechi yao ya hatua ya 16 bora dhidi ya Paraguay: "Walete Waajentina, tunataka vita vingine!"

Wanajeshi wa zamani wa Argentina walituma telegramu kwa timu yao wakiwahimiza kuunda upya makombora yalioizamisha meli ya Uingereza The Destroyer HMS Sheffield.

Muda kati ya mchezo wa Uruguay na robo fainali dhidi ya England ulionekana kuwa wa milele lakini, mwishowe, kikosi cha Argentina kilifarijika kwa kupata mapumziko.

Timu ilikuwa imeambiwa italazimika kucheza na jezi ya pili ya blue buluu ambayo walikuwa wamevaa dhidi ya Uruguay, lakini Bilardo alitaka jezi tofauti kwa sababu zile walizokuwa nazo zilikuwa nzito na zisizovumilika, hasa katika joto kali la Mexico.

Shida ilikuwa kwamba wadhamini wa jezi ya Le Coq Sportif hawakuwa na jezi ya shingo wazi ambayo timu ilikuwa ikiomba, wala hawakuwa na muda wa kuzitengeneza.

Msaidizi wa ufundi wa Argentina, Ruben Moschella na msaidizi wa jezi, Tito Benros kisha walipatiwa jukumu la kuzunguka Mexico City kutafuta jezi inayofaa kutumika katika mechi ya robo fainali ya Kombe la Dunia. Waliipunguza jezi zilizoletwa hadi mbili, ya kwanza ikiwa na rangi sawa na jezi iliyopo nyingine ikiwa na rangi angavu ya bluu.

"Oh hapana, si hii," Bilardo aliyeonekana kuchukizwa alisema, lakini akatolewa upepo baadaye Maradona alipoingia ndani, akaionyesha na kutangaza: "Hii ni jezi nzuri sana, Carlos. Tukivaa hii tutaishinda Kiingereza."

"Sawa," kocha alisema, "twendeni na hii."

Na hivyo ndivyo ilivyokuwa kwamba saa 24 kabla ya mojawapo ya mechi ya kukumbukwa zaidi katika historia ya soka, wafanyakazi wa Club America walichapisha nambari kwenye mashati mapya ya bluu angavu katika kitambaa cha rangi ya fedha-kijivu ambacho kwa kawaida hutumiwa na timu za soka za Marekani. , na nembo ya shirikisho la Argentina.

'Yeye ni mdogo, mnene na ana mguu mmoja tu'

Mpango wa England haukuwa kamwe kumkaba Maradona, ingawa uteuzi wa Terry Fenwick - beki wa kati asiye na mchezo na rekodi ya kadi nyingi za njano kwenye Kombe la Dunia - hakika ulituma ujumbe.

Meneja wa England Bobby Robson aliripotiwa kumwambia: "Usijali Terry, yeye ni mdogo, mnene na ana mguu mmoja tu." Maneno ambayo pengine yangemsumbua kwa siku zake zote.

Brown alizungumzia hisia za wachezaji wengi wa Argentina. “Ukifika katikati ya uwanja unapowasikia wakiimba wimbo wa taifa utadhani wameweka visu katika meno yao, nilitaka kuona iwapo ningeweza kulipiza kisasi kwa kushinda mechi,” alisema. .

"Niliacha maisha yangu ya kawaida nyuma. Na sote tulifikiria kitu kimoja. Hatukuwahi kuzungumza kuhusu matatizo ya Las Malvinas, lakini sote tulibadilika."

Kwa mchezo ambao utakumbukwa milele kama moja ya muhimu zaidi wakati wote, ulikuwa na kipindi cha kwanza cha kawaida.

Kisha kukaja mwendo wa dakika tano ambapo Maradona aliuonyesha ulimwengu mambo mawili makali ya tabia yake ya uwanjani: ujanja, ulaghai n mtu asiyeweza kuaminika

Ilikuwa ni mchezo uliomfanya kubadilika mbele ya macho ya taifa lake kutoka kuwa mchezaji mwenye kipaji hadi nguli.

Bao la 'Mkono wa Mungu' katika dakika ya 51 lilifuatia kona ya Steve Hodge ambayo iligeuka na kuwa pasi ya nyuma ilipopaa juu angani.

Ilipaswa kuwa ya Peter Shilton, lakini kipa alijibu nusu ya pili akiwa amechelewa sana kuufuata mpira.

Maradona aliruka wa kwanza, akiwa hewani aliutengeneza mwili wake kana kwamba anataka kuupiga mpira kichwa, kisha ngumi ikatoka na kuupiga, na kuusukuma polepole kwenye wavu uliokuwa wazi.

Inaonekana kila mtu aliona kwamba maradona alitumia mikono – isipokuwa mwamuzi wa Tunisia Ali bin Nasser na mcheza mstari wa Kibulgaria Bogdan Dochev.

Dochev, baada ya kusema kuwa anaamini kuwa bao hilo lilikuwa halali kabisa wakati huo, alimwambia mjumbe wa tume ya waamuzi siku mbili tu baadaye kwamba aliuona mkono wa Maradona lakini hakukataa bao hilo kwa sababu mwamuzi tayari alikuwa amemkabidhi bao.

Dakika tatu na nusu baada ya mzozo huo lilipatikana bao ambalo hadi leo linatajwa kuwa moja ya mabao makubwa kuwahi kufungwa. Bao ambalo lisingetokea kama Bin Nasser angepuliza kipenga cha kumchezea vibaya Glenn Hoddle katika mchezo uliotangulia.

Sekunde 10 za ustadi wa kustaajabisha ziliibuka wakati Maradona alipoanza kukimbia kwa kustaajabisha na mpira kutoka ndani ya nusu ya upande wa timu yake na kumalizika kwa kuupachika mpira wavuni kwa utulivu na kuifanya timu yake kuwa mbele kwa mabao 2-0.

Mchezo huo ulibadilisha maisha, si kwa Maradona pekee bali hata kwa wachezaji wenzake na wapinzani wake wengi wa Uingereza.

Beki wa kati wa England Fenwick ambaye ni mgumu kumpita alikuwa amepania kumkosesha raha Maradona, baada ya kumuona akirejea uwanjani baada ya kupata matibabu na upepo uliompita kipindi cha pili akielekea kufunga bao lililopewa jina la 'Goal of the Century'. '.

Fenwick alishinda mechi 20 akiichezea England na, zikiwa zimesalia dakika 16 katika mechi ya kirafiki na Israel mnamo Februari 1988, robo fainali ilikuwa mechi yake ya mwisho kabisa England. Baadaye alikiri uzoefu wa kuondolewa kwa England kutoka Kombe la Dunia huko Mexico ulimwacha na "uchungu na msongo wa mawazo" kwa miaka 20.

Kama hangetolewa mapema kwenye mchezo kwa kumchezea vibaya Maradona, bila shaka angemzuia nje ya eneo la hatari badala ya kusukuma tu mkono wake tumboni alipokuwa akikaribia zaidi lango la Shilton.

Mchezaji mwenza wa Maradona Hector Enrique aliendelea na hadi kuwa mweka hazina ya kitaifa nchini Argentina. Mwanaume aliyempasia Maradona mpira kabla tu ya kuanza kupiga chenga za kudanganya, baadaye - ulimi wake ukiwa umewekwa shavuni - angetoa pasi na kuongeza: "Kwa ubora wa pasi niliyompa, kama angekosa ningemuua."

Kipa wa England, Shilton hakuwahi kumsamehe nambari 10, si kwa kufunga na mikono, alisema, lakini kwa kutoomba msamaha kwa hilo. Baadaye alikataa kumwalika Maradona kwenye ushuhuda wake.

Jibu la Maradona lilikuwa na tindikali iliyotabiriwa. "Yeye hakunialika, kweli - oh, moyo wangu unavuja damu! Ni watu wangapi wanaoenda kwa ushuhuda wa kipa hata hivyo? Kipa?!"

Miaka kadhaa baadaye, Chris Waddle aliweka wazi hasira ya 'Mkono wa Mungu': "Mashabiki wengi wa Uingereza hawatawahi kumsamehe Maradona kwa kile alichokifanya. Lakini kama Gary Lineker angefanya hivyo kwa upande mwingine, bado angesifiwa kama shujaa."

Kiungo wa kati wa Uingereza Hodge hangeweza kufikiria ni kiasi gani kubadilishana shati na Maradona mwishoni mwa mechi kungeathiri maisha yake. Katika tendo hilo moja alihakikisha mustakabali wake na wa kizazi chake. Kwa miaka 20 jezi hiyo ilikuwa kwa mkopo kwenye Jumba la Makumbusho la Kitaifa la Soka huko Manchester, kisha Mei mwaka huu iliuzwa kwa mnada kwa £7.1m, ada ya juu zaidi kuwahi kulipwa kwa kipande cha kumbukumbu za michezo.

Hivi majuzi ilitangazwa kuwa mpira uliowekwa kimiani mara mbili na Maradona ulikuwa unapigwa mnada, ambapo unatarajiwa kuuzwa kwa hadi £3m.

Mmiliki wa mpira? Mwamuzi wa mechi Bin Nasser.

'Kungekuwa na mwisho mwema'

Iliyofuata ilikuwa Ubelgiji, kifurushi cha kushangaza cha mashindano hayo.

Ushindi dhidi ya England uliwafanya Waajentina wajisikie kuwa hawawezi kushindwa na hilo lilijiri baada ya dakika 51. Pasi kupitia kwa Jorge Burruchaga ilifungwa goli la kupendeza kutoka nje ya mguu wa kushoto wa Maradona na juu ya kichwa cha kipa wa Ubelgiji aaliyekuwa akisonga mbele Jean-Marie Pfaff kuzuia goli hilo.

Kisha Maradona alichukua mpira umbali wa yadi 40, akawachenga mabeki watatu na, kabla ya Pfaff kuamua kusimama au kujipinda, Maradona akamfunga kwa mara ya pili.

Umahiri wa Maradona uliamua tena matokeo ya mechi. Wakati huu ilikuwa imechukua dakika 12. Baada ya mchezo mzuri kuwahi kuonekana katika Kombe la Dunia la kandanda, Argentina walikuwa kwenye fainali ambapo wangekutana na Ujerumani Magharibi.

Kwa Maradona huo ulikuwa mchezo wake tulivu zaidi wa hatua ya mtoano, ingawa hangenyimwa neno la mwisho.

Licha ya kuongoza kwa mabao 2-0, Argentina waliwaruhusu Ujerumani Magharibi kurejea mchezoni wakati mabao ya Karl-Heinz Rummenigge na Rudi Voeller yalisawazisha mechi ikiwa dakika 81.

Muda mfupi baadaye, mpira ulitua katikati ya uwanja na Maradona akaupiga kulia halafu akaufuata kuudhibiti huku wapinzani wawili wakija mbele yake na wengine wawili wajaribu kumzuia, alimuona Burruchaga akikaribia akikimbia mbele ambapo alimpigia pasi nzuri na kuisaidia Argentia kufunga bao la tatu.

"Alinipa pasi bora zaidi katika maisha yangu ya soka, jinsi yeye pekee awezavyo," Burruchaga alisema. "Nilipata nguvu kutoka sijui wapi pa kukimbia mita hizo za mwisho."

Kwa mara nyingine tena uamuzi wa Maradona katika wakati huo muhimu ungekuwa muhimu na kuhakikisha kwamba Kombe la Dunia lilikuwa linarejea Argentina.

Maradona aliiongoza nchi yake kutinga fainali ya Kombe la Dunia 1990 nchini Italia, ambapo walifungwa na Ujerumani Magharibi. Kufikia wakati huo uraibu wake wa cocaine ulikuwa umeshika kasi na alipigwa marufuku kwa muda wa miezi 15 mwaka 1991 baada ya kupimwa na kukutwa na dawa hiyo. Aliwahi kuwa nahodha wa nchi yake tena nchini Marekani mwaka 1994, lakini alirudishwa nyumbani baada ya kufeli kipimo cha dawa za ephedrine.

Lakini katika majira ya joto ya '86, alipopanda kwenye roshani ya Casa Rosada akiwa na Kombe la Dunia mikononi mwake - roshani ambayo mke wa rais wa zamani wa Ajentina Eva Peron alikuwa ametoa hotuba yake maarufu kwa "descamisados" wake maskini] - Diego Armando Maradona alijua kwamba hatimaye alikuwa amefanikisha ndoto yake.

Kamwe asingefurahi tena kama alivyokuwa katika wakati huo mmoja.