AI: Sekta 5 za ajira ambazo zitahitajika kwa kiasi kikubwa wakati ujao

Soko la ajira linabadilika haraka kuliko hapo awali na kazi nyingi za leo zitatoweka hivi karibuni.

Kwa mujibu wa utafiti wa hivi karibuni wa Jukwaa la Uchumi Duniani, kuna mambo mawili makuu ambayo yanabadilisha mambo: kuibuka kwa teknolojia mpya, automatisering na harakati kuelekea uchumi wa kijani na uendelevu.

Maendeleo ya haraka ya teknolojia mpya kama vile Data Kubwa, kompyuta na akili mnemba yanatarajiwa kuleta mabadiliko makubwa katika soko la ajira.

Habari njema ni kwamba kuwasili kwa teknolojia mpya kunakuza uchumi mzima na, ingawa kunaharibu baadhi ya kazi, kunatengeneza nyingine nyingi. Baada ya yote, wakati kampuni inaweza kufanikiwa zaidi na rasilimali chache, kawaida hupanuka.

Watafiti katika Kongamano la Kiuchumi Ulimwenguni wanasema kuwa karibu robo ya kazi zote za sasa zitabadilika katika miaka mitano ijayo.

Kwa hivyo, ili kufanikiwa katika soko la ajira linalozidi kuwa na ushindani, itakuwa muhimu kujifunza kila mara ujuzi mpya na uwezo wa kuboresha.

Ujuzi

Ujuzi wa kiufundi ni mojawapo ya ujuzi muhimu ambao lazima upatikane ili kuwa na ushindani katika soko jipya la ajira.

Hii haimaanishi kwamba kila mtu anahitaji kujua lugha za programu au kuelewa mambo ya kujifunza kwa mashine.

Lakini katika siku zijazo, kazi za 'STEM' yaani Sayansi, Teknolojia, Uhandisi na Hesabu, zinatarajiwa kuhitajika zaidi.

Kwa hivyo, ikiwa unajiuliza ni masomo gani mtoto wako anapaswa kuzingatia shuleni, hapa kuna jibu: hisabati, sayansi ya kompyuta na sayansi ya asili.

Ujuzi unaofuata wa kuzingatia ni kufikiri kwa uchanganuzi. Ili kuiboresha, unahitaji kuboresha uwezo wako wa utambuzi, yaani, akili yako na uwezo wako wa kutambua mifumo, kuunganisha ukweli, na kufikia hitimisho ambalo halijafunikwa na hisia au mapendekezo ya kibinafsi.

Ujuzi wa uchanganuzi pia unajumuisha udadisi na elimu endelevu ya binafsi , na ili kuboresha na kujifunza kila wakati, unahitaji kuwa na uwezo wa kuzingatia lengo.

Kujifunza Kiingereza kwa kiwango cha juu pia ni ujuzi wa thamani sana kupata.

Pia, ubunifu: Katika sayansi, uhandisi, usanifu au sanaa, nafasi inayotafutwa sana itatolewa kwa mtu ambaye anaweza kuchanganya ujuzi wa kiufundi na ubunifu.

Mawasiliano na huruma zitakuwa stadi mbili zinazothaminiwa sana, haswa katika enzi ya Akili ya Mnemba.

Haijalishi jinsi mashine zinavyokua haraka, watu watahitaji watu wengine kila wakati, na umakini wa kibinadamu, kazi ya pamoja, uwezo wa kusikiliza, kusimulia hadithi, msaada na huruma utathaminiwa zaidi.

Kulingana na ripoti iliyochapishwa mnamo 2020 kwenye LinkedIn, jukwaa la kijamii kwa wataalamu, mawasiliano tayari yamekuwa ustadi unaohitajika zaidi katika soko la kazi la leo.

"Pamoja na kuongezeka kwa matumizi ya AI na roboti mahali pa kazi, nguvu kazi inayoongezeka ya mbali, na teknolojia inayoturuhusu kuungana na watu ulimwenguni kote, haijawahi kuwa muhimu zaidi kujua jinsi ya kuzungumza na kusikilizana,” anasema Dan Negroni, mtaalamu wa talanta na ushiriki wa mahali pa kazi.

1. Teknolojia mpya

Haishangazi kwamba teknolojia ya habari na teknolojia mpya pia ni kati ya sekta zitazofanikiwa zaidi kwa siku za usoni.

Ukuzaji wa AI na ujifunzaji wa mashine utaleta fursa za kupendeza sana.

Mojawapo ya taaluma zinazotia matumaini katika fani hii ni uhandisi wa haraka , mtaalamu wa mawasiliano na miundo ya AI ambaye husaidia kuunda maombi kwa usahihi na hufanya kazi kama aina ya kiunganishi kati ya Akili Mnemba na watu.

Kazi nyingine zinazowezekana zinazohusiana na AI ni pamoja na wataalamu wa maadili , wahandisi wa usalama, na watengenezaji wa miingiliano inayofaa ya mtumiaji na mashine.

Kwa ujumla, linapokuja suala la akili ya bandia, watu kutoka fani mbali mbali wanashauriwa kutoiona kama mshindani, lakini kama mshirika, na kujua jinsi ya kushirikiana nayo.

Uga mwingine wa uwezekano ni uchanganuzi wa Data Kubwa , aina kubwa ya taarifa, kuanzia majukwaa ya mtandaoni kama vile Netflix hadi mifumo ya udhibiti.

Hakika hakutakuwa na uhaba wa kazi kwa wataalamu wa usalama wa mtandao pia, kwa sababu tu kutakuwa na habari nyeti zaidi.

Wataalamu wa teknolojia ya fedha, wachambuzi wa biashara na watengenezaji wa mfumo wa blockchain pia watahitajika.

2. Kazi za uhifadhi mazingira

Kulingana na Ripoti ya Mustakabali wa Ajira ya Jukwaa la Kiuchumi Duniani 2023, mahitaji ya kazi za "kijani" yanaongezeka kwa kasi katika sekta na tasnia zote.

"Ulimwenguni kote, mabadiliko ya kijani kibichi yanaweza kuunda nafasi za kazi milioni 30 katika nishati safi, ufanisi na teknolojia za uzalishaji mdogo ifikapo 2030," ripoti inasema.

Kwa sasa, nchi zinazoongoza katika suala la fursa mpya za kazi katika nishati ya kijani na maendeleo endelevu ni nchi za Magharibi na Japan. China inazidi kushika kasi.

Kazi hizi zinaweza kuhusishwa na biashara, sayansi, siasa au moja kwa moja na mazingira, ndani ya sekta zinazofanya kazi katika ukuzaji wa nishati mbadala au vyanzo vipya vya nishati na betri, uhifadhi wa spishi zilizo hatarini kutoweka, ushauri wa biashara au, kwa mfano, mazoezi ya kisheria. na mabadiliko ya sheria za ulinzi wa mazingira.

Pia kutakuwa na haja ya wapangaji wa nyumba mahiri, wasanifu majengo, wabunifu na wajenzi.

3. Wataalamu wa afya

Utunzaji na matibabu kwa wazee utahitajika zaidi kwasababu umri wa watu kuishi unaongezeka.

Kwa hivyo, kutaendelea kuwa na mahitaji makubwa ya wataalamu wa afya katika siku za usoni.

Wataalamu wa afya ambao watakuwa na thamani zaidi watakuwa wanatoa sio tu na dawa bali pia usaidizi wa kimaadili.

Madaktari na wataalamu wa afya watalazimika kujifunza kila mara na kuzoea njia mpya za utambuzi na matibabu. Akili Mnemba pia itasaidia.

Pia kutakuwa na kazi kwa wanasaikolojia na washauri mbalimbali wa maendeleo ya binafsi au wakufunzi wa mazoea ya kiroho.

4. Kazi za mikono

Katika miaka ijayo, kutaendelea kuwa na hitaji la wataalamu katika kazi za mikono kama vile makanika, warekebishaji, mafundi umeme au wajenzi.

Katika tukio ambalo kazi ndogo na sahihi zinahitajika kufanywa katika hali tofauti, mwanadamu atabaki kuwa asiyeweza kubadilishwa.

Wataalamu hawa pia watahitaji kuboresha ujuzi wao wa kiufundi kila wakati na kufahamu zana mpya mahiri .

Mahitaji ya taaluma mpya katika kilimo pia yanatarajiwa kuongezeka. Idadi ya watu duniani inaongezeka na kila mtu anahitaji kula. Lakini tena, mahitaji yatakuwa zaidi kwa wahandisi wenye ujuzi kuliko wakulima.

Ajira ambazo zitafikia ukomo

Kutakuwa na kazi nyingi ambazo hivi karibuni zitaanza kutoweka kwenye soko la ajira. Hizi ni aina za kazi ambazo zinazidi kuwa rahisi kuziendesha.

Ifuatayo ni orodha ya kazi zinazowezekana ambazo zinaweza kutoweka katika soko la ajira hivi karibuni:

5. Kusimulia hadithi

Taaluma nyingine ambayo bila shaka itaendelea kuhitajika katika siku zijazo, ni ya wasimulizi wa hadithi.

Kama vile ilivyokuwa muhimu maelfu ya miaka iliyopita, kazi yoyote ya ubunifu inayohusiana na usambazaji wa uzoefu wa mwanadamu itaendelea kuwa muhimu.

Tutaendelea kuhitaji waandishi, washairi, wakurugenzi, waigizaji, wacheshi, wasanii na wanamuziki, hata kama akili ya bandia italeta changamoto mpya katika sekta hizi.

Imetafsiriwa na Lizzy Masinga