Muxuu Ruushku uga aamusay ciddii dishay Ayatollah Cali Khamenei?

28-kii February, Ayatollah Ali Khamenei, hogaamiyaha sare ee Iran ayaa lagu dilay weerarro ay qaadeen Israa'iil iyo Maraykanku. Maalintii xigtay, Putin ayaa dhimashada hogaamiyaha sare ku tilmaamay "dil" isla markaana cambaareeyay, isagoo sheegay in dilkan uu ahaa "xadgudub cad oo ka dhan ah akhlaaqda aadanaha iyo dhammaan xeerarka caalamiga ah."

Si kastaba, hadalkiisa cambaareynta kuma uusan sheegin cidda ka dambeysay dilkan.

Waqti aan fogayn, Janaayo 2025, ayay Russia iyo Iran saxiixeen heshiis iskaashi istiraatiiji ah. Heshiiskaas kuma jirin wax qodob ah oo ku saabsan in Ruushku siiyo caawimaad milatari Iiraan.

Bilo yar kadib, Juun 2025, markii United States ay duqeysay xarumaha nukliyeerka ee Iiraan oo ay sheegtay inay burburisay, Vladimir Putin ayaa arrintaas ku tilmaamay "gacan ka hadal aan sabab lahayn oo ka dhan ah Iiraan", isagoo sheegay in ficilkaas "aan lahayn wax sal ama wax cudurdaar ah."

Si kastaba ha ahaatee, xitaa bayaankaas cambaareynta ah, Putin ma uusan xusin magaca Maraykanka.

Muammar Gaddafi iyo Viktor Yanukovych

Kaddib dilkii Muammar Gaddafi ee Libya 2011, Vladimir Putin ayaa si faahfaahsan u cambaareeyay, isagoo sheegay in diyaarado Maraykanka ah lagu weeraray kolonyadii Qaddafi iyo in ciidammo gaar ah oo shisheeye ay joogeen. Wuxuu dilka ku tilmaamay mid dhacay iyadoo aan maxkamad ama baaritaan jirin, wuxuuna qaraarkii Qaramada Midoobay ee Libya ku sifeeyay "baaq dagaal".

Markii Viktor Yanukovych laga tuuray xukunka Ukrayn, 2014, Putin sidoo kale si cad ayuu u dhaliilay. Wuxuu sheegay in uu ka caawiyay Yanukovych in uu u baxsado Crimea, wuxuuna marar badan ku eedeeyay Maraykanka in uu qorsheeyay "afgambi" ka dhacay Ukraine.

Bashar al-Assad: Tallaabooyin aan hadal lahayn

Diseembar 2024 markii uu dhammaaday xukunkii Bashar al‑Assad ee Syria, Ruushka ayaa u qaaday Assad magaalada Moscow. Si kastaba, Vladimir Putin jawaabtiisa ma aanu ku cambaareyn cidna mana uusan magacaabin cid ku lug lahayd.

Ku dhowaad laba toddobaad kaddib, Putin wuxuu saxaafadda u sheegay inuusan weli la kulmin Assad, wuxuuna sidoo kale sheegay in horumarrada ka dhacay Syria aanay ka dhignayn guuldarrada Ruushka.

Bilo kaddibna, Putin wuxuu hambalyo u diray madaxweynaha cusub ee Syria, Ahmed al‑Sharaa, isagoo ku bogaadiyay dadaallada lagu soo celinayo midnimada dhuleed ee dalka.

Wax bayaan ah lagama soo saarin Nicolás Maduro

Bishii January 2026, markii ciidammada Maraykanku ay qabteen hoggaamiyaha Venezuela Nicolás Maduro, Vladimir Putin ma uusan bixin wax bayaan dadweyne ah.

Laakiin cambaareyn ayaa ka timid mas'uuliyiin Ruush ah sida Dmitry Medvedev, Vasily Nebenzya, iyo Maria Zakharova, iyo sidoo kale xubno baarlamaan.

Laakiin Kremlin si rasmi ah uma soo saarin bayaan cambaareyn ah.

Cali Khamenei: Dil la xusay iyadoo aan la magacaabin qofkii dilka geystay

Falanqeeye ka tirsan Carnegie Berlin Center, Alexander Baunov, ayaa sheegay in Ruushka uu leeyahay nidaam "luqado siyaasadeed oo badan", halkaas oo Wasaaradda Arrimaha Dibadda ay qaadato hadal adag oo ka dhan ah Maraykanka halka Kremlin-ku uu mararka qaar qaato mowqif ka jilicsan oo ku wajahan Donald Trump. Wuxuu sidoo kale sheegay in bayaankii Vladimir Putin ee ku saabsanaa dilka Ali Khamenei uu ka jilicsanaa kii uu bixiyay markii la dilay Qasem Soleimani 2020, inkastoo xilligaasna uusan magacaabin Trump.

Wariye la yidhaahdo Yekaterina Kotrikadze ayaa sheegtay in Putin ku jiro xaalad adag: si cad uma dhaliili karo Maraykanka, laakiin sidoo kale si buuxda uma aamusnaan karo, maaddaama aamusnaantu muujin karto daciifnimo. Waxay sidoo kale tilmaantay in Kremlin uu weli rajaynayo in uu la shaqeeyo madaxweynaha 47aad ee Maraykanka.

Falanqeeye Alexander Morozov ayaa sheegay in jawaabtaas "taxaddarka leh" ee Kremlin-ku ay muujinayso dhibaato siyaasadeed oo uu dagaalka Iran u keenay Putin. Halka Sergei Shelin uu sheegay in Putin hadda si ka duwan u arko Trump, isagoo xaaladaha ku qiimeeya walaaca sii kordhaya.

Sannadkii 2011, senatorkii Maraykanka John McCain ayaa sheegay in Putin laga yaabo inuu la kulmo "masiibo la mid ah tan Qaddafi." Putin markaas wuxuu su'aal geliyay caafimaadka maskaxda ee McCain. Inkastoo hadalladaas oo kale maanta aan la maqal, haddana jawaabaha Putin ee arrimaha waaweyn ee caalamka mararka qaar waxay ku ekaadaan inuusan cidna magacaabin.