ගේබ්රියල් ගාර්සියා මාර්කේස්ට විනාශ කිරීමට අවශ්ය වූ අවසන් නවකතාව පුත්රයන් විසින් ප්රකාශයට පත් කරයි.
ඡායාරූප මූලාශ්රය, Getty Images
- Author, යස්මින් රූෆෝ සහ සන්තියාගෝ වැනේගස්
- Role, බීබීසී පුවත්/බීබීසී මුන්ඩෝ
නොබෙල් ත්යාගලාභී ගේබ්රියල් ගාර්සියා මාර්කේස් දශකයකට පෙර අභාවප්රාප්ත වෙද්දී, ඔහු ඩිමෙන්ෂියා රෝගී තත්ත්වයෙන් පෙළෙමින් සිටියදී රචනා කරන ලද නවකතාවක් නොතකා හැර තිබිණි.
ජීවත් වූ අවසන් දින කිහිපයේදී, ඔහු සිය පුතුන්ට පවසා තිබුණේ, එම ග්රන්ථය විනාශ කරන ලෙස ය.
කෙසේ වෙතත්, ඔවුන් සිය පියාට අකීකරු වෙමින්, "පාවා දීමේ" ක්රියාවක් ලෙස සැලකෙන, එම ග්රන්ථය මුද්රණය කර තිබේ.
Until August නමැති එම කෘතිය සම්බන්ධයෙන් මිශ්ර විචාර පළවී ඇති අතර, ද ගාඩියන් පුවත්පතේ විචාරකයා එය විස්තර කළේ, "සාමාන්යයෙන් කටු සටහනක් ලෙස බොඳවූ ලේඛනයක් සහ දෝෂ සහිත කටු සටහනක්" ලෙසිනි.
"ඒත්, දැවැන්තයෙකුගේ කටු සටහන සාදරයෙන් පිළිගන්නවා," ලුසී හියුස් හැලට් සඳහන් කර තිබිණි.
"මැකී ගිය සිහිවටනයක් වැනි" පිටු 100කින් යුත් මෙම ග්රන්ථය, "දුර්වල මට්ටමක පැවතිය ද, මාර්කේස් ඔහුගේ සාර්ථක ම අවධියේදී මවා පෑ අපූරු මනඃකල්පිත ලෝකය ඇසුරු කිරීම සඳහා වැදගත් වන," බව ඇය පැවසුවා ය.
2014 වසරේදී අභාවප්රාප්ත වූ කොලොම්බියානු ලේඛකයා වඩාත් ප්රසිද්ධියට පත්ව සිටියේ, ඓන්ද්රජාලික යථාර්ථවාදී ලේඛන ශෛලියේ පුරෝගාමියා වශයෙනි.
ඔහු Love in the Time of Cholera සහ One Hundred Years of Solitude ඇතුළු ග්රන්ථ රැසක් රචනා කර ඇති අතර එය ලොව පුරා පිටපත් මිලියන 50කට වඩා අලෙවි වී තිබේ.
'ඒකට තමයි දරුවන් ඉන්නේ'
පොත ප්රකාශයට පත්කිරීම සාධාරණීකරණය කරමින් ගාර්සියා මාර්කේස්ගේ පුත් ගොන්සාලෝ, BBC Radio 4හි Front Row වැඩසටහනට පැවසුවේ, අවසානය වන විට, කතුවරයා "ඔහුගේ කෘතියේ අඩුපාඩු පමණක් දැකිය හැකි නමුත් එහි ඇති රසවත් දේ විනිශ්චය කිරීමේ තත්ත්වයක නොසිටි," බව ය.
මෑතකදී අත්පිටපත (පෙළ) නැවත කියවීමෙන් පසු ගොන්සාලෝ පැවසුවේ, "මාර්කේස් එය විනිශ්චය කළ තරම් විනාශකාරී බවක් තමාට නොපෙනුණු" බවත්, එය ඔහුගේ නව පැතිකඩක් පෙන්වූ නිසාත්, "අනන්ය වූ" නිසාත් එම නවකතාව මාර්කේස්ගේ කෘතිවලට වටිනා එකතු කිරීමක් බව ය.
ඡායාරූප මූලාශ්රය, Getty Images
උණුසුම් පුවත්, විශ්ලේෂණ සහ විශේෂ විශේෂාංග ඔබේ දුරකතනය වෙත ඍජුව ම ලබා ගන්න.
සම්බන්ධ වීමට link එක click කරන්න
End of podcast promotion
"නිසැකයෙන් ම, අපි ඒක විනාශ කරන්න ගියේ නෑ," ඔහු පැවසීය. "2022දී අපි එක සංස්කරණයක් කියෙව්වා. ඒ ගැන ලොකු සාකච්ඡාවක් ඇති වුණේ නෑ."
"අපට තේරුණා පොත සම්පූර්ණ කරලා තියෙන බව, ලොකු සංස්කරණයක් කරන්න දෙයක් තිබුණෙ නෑ කියලා අපට තේරුණා. කිසි ම දෙයක් අලුතින් එකතු කළේ නෑ, ලොකු වෙනස්කමක් කරලාත් නෑ. ඒ නිසා ඇත්තට ම කිසි ම සාකච්ඡාවක් සිද්ධ වුණේ නෑ."
"ඒක මගේ දෙමාපියන් පාවාදීමක් ද? මගේ පියාගේ කැමැත්ත පාවාදීමක් ද? - අපට ඒ ගැන හිතන්න ගත වුණේ තත්පර තුනයි."
"අපි තීරණය කළා, ඔව්, ඒක පාවාදීමක් කියලා. ඒත්, ඒකට තමයි දරුවො ඉන්නේ."
අවසානයේ එය ප්රකාශයට පත් කිරීමට තමන් බැඳී සිටින බවත්, එබැවින් සිය පවුලේ සාමාජිකයින් අනුමත කළ අනුවාදයක් ප්රකාශයට පත් කිරීමට අවශ්ය බවත්, එහි ප්රකාශන හිමිකම ආරක්ෂා කරන බවත් ඔහු පැවසීය.
තම මවගේ සොහොන නැරඹීමට සෑම ගිම්හානයක ම තනිව දූපතකට යන මැදිවියේ කාන්තාවක මෙම නවකතාවට කේන්ද්රගත වන අතර, සතුටුදායක විවාහයක් ගත කළ ද, සෑම සංචාරයකදී ම ඇය නව පෙම්වතෙකු රැගෙන යයි.
ගාර්සියා මාර්කේස් සිය නවකතාවක කාන්තා ප්රධාන චරිතයක් වටා කේන්ද්රගත වූ පළමු අවස්ථාව මෙය වේ.
The i පුවත්පතේ මැක්ස් ලියු, පැවසුවේ, "ඔහුගේ පවුල සහ ඔහුගේ ප්රකාශකයින්" පොත ප්රකාශයට පත් නොකළ යුතු බවට වූ, "ඔහුගේ කැමැත්තට ගරු කළ යුතුව තිබූ" බව ය.
"සාමාන්යයෙන්, කතුවරයෙකුගේ මරණයෙන් පසු පළ කරන දුර්වල කෘතියක් හෝ දැවැන්ත ලේඛකයෙකුගේ සුළු කෘතියක් ගැන විචාරයකදී, එහි අඩුපාඩු තිබුණත්, එය ඔහුට ළැදි පාඨකයින් සතුටු කරනු ඇති."
"ඒක Until August සම්බන්ධයෙන් සත්යයක් කියලා මම පිළිගන්නේ නෑ. මාර්කේස් මේක දැනගෙන හිටියා. ඒ වගේ ම ඒක ප්රසිද්ධියට පත් නොකරන්න තීරණය කරපු එක නිවැරදි තීරණයක්," ඔහු තවදුරටත් පැවසීය.
ඡායාරූප මූලාශ්රය, Getty Images
'අමුතු කම්පනයක්'
එසේ වුව ද, "එම නවකතාවේ ගුණාංග කිහිපයක් තිබෙනවා," ඒ වගේ ම, "එය සැබෑව සහ මායාව අතර සමතුලිතතාවක් ඇති කරන වපසරියක පිහිටා තිබෙනවා," යනුවෙන් ඔහු වැඩිදුරටත් පැවසීය.
තරු තුනේ විචාරයක් කරමින්, ද ටෙලිග්රාෆ්හි සාරා පෙරී පැවසුවේ, නවකතාවේ සමස්ත බලපෑම "අමුතු කම්පනයක්" බව ය.
"වැඩිහිටි මාර්කේස් සහ බාල මාර්කේස් පොත තුළ අන්තර්ගත වූවාක් මෙන්, මහලු වයසේ හැඟීම් සහ විඩාබර හාස්යයක් සමගින් ආධුනිකයෙකුගේ අස්ථිර තත්ත්වයක් ඇති වී තිබෙනවා,"
කෙසේ වෙතත්, "එම නවකතාව, මාර්කේස්ගේ ජන කතා, පසුබිම් කතා සහ වාචික ශක්තීන්ගෙන් අලංකෘත වූ නිර්මාණාත්මක ආඛ්යාන ශෛලියෙන් බැහැරව පවතින බව," ඇය සඳහන් කළා ය.
"Until August කෘතිය ගැබෝගේ (මාර්කේස්) විශිෂ්ටත්වය වැඩි කිරීමට හෝ අඩු කිරීමට කිසි දෙයක් කරන්නෙ නෑ," ඇය අවසන් වශයෙන් පැවසීය.
Netflix සැලසුම්
එමෙන් ම, 1967 වසරේදී පළ කෙරුණු මාර්කේස්ගේ One Hundred Years of Solitude නමැති නවකතාව ස්පාඤ්ඤ බසින් Netflix කතා මාලාවකට අනුවර්තනය වෙමින් පවතී.
නිව් යෝර්ක් ටයිම්ස් පුවත්පත පවසන පරිදි, වසර ගණනාවක් තිස්සේ මාර්කේස්ට ඔහුගේ නවකතාව චිත්රපටයකට නැගීම සඳහා ඉල්ලීම් රැසක් ලැබුණු නමුත් එය ස්පාඤ්ඤ භාෂාවෙන් පමණක් කිරීමට ඔහුට අවශ්ය වූ බැවින් එම ඉල්ලීම් ප්රතික්ෂේප කළේ ය.
ඡායාරූප මූලාශ්රය, Getty Images
ගාර්සියා මාර්කේස්ගේ ග්රන්ථය, කතුවරුන්ගේ කැමැත්තට එරෙහිව මරණින් පසු ප්රකාශයට පත් කළ පළමු නවකතාව නොවේ.
- 1924 වසරේදී ක්ෂය රෝගය වැළඳීමෙන් මිය යාමට පෙර ඔහු සිය මිත්රයා වූ මැක්ස් බ්රොඩ්ට පවසා තිබුණේ, තමන්ගේ සියලු කෘති ගිනි තබා විනාශ කරන ලෙස ය. කෙසේ වෙතත්, 1925 සහ 1935 අතර කාලය තුළ The Trial, The Castle සහ Amerika ඇතුළු කෆ්කාගේ කෘති එකතුවක් බ්රොඩ් පළ කළේ ය.
- ලොලිටා නවකතාව රචනා කළ ව්ලැඩිමීර් නබෝකොෆ් සිය බිරිඳට පවසා තිබුණේ, සිය අවසන් නවකතාව වූ The Original of Laura ලියා අවසන් කරන තුරු තමන් ජීවත්ව නොසිටියහොත් එය විනාශ කරන ලෙස ය. දින දර්ශන කාඩ්පත්වල පැන්සලකින් ලියා තිබූ එම අවසන් නොකළ කෘතිය ඔහුගේ පුත්රයා විසින් ඔහුගේ මරණයෙන් 30 වසරකට පසු, එනම් 2009 වසරේදී ප්රකාශයට පත් කරන ලදී.
- පුරාවෘත්තයන්ට අනුව, රෝමානු කවියෙකු වූ වර්ජිල්, ඔහුගේ වීර කාව්යය වූ The Aeneidහි සටහන් පුළුස්සා දමන ලෙස ඉල්ලා සිටියේ, ඔහුගේ මරණයට පෙර එය නිම කිරීමට නොහැකි වනු ඇතැයි ඔහු බිය වූ බැවිනි.
BBC Radio 4හි Front Row වැඩසටහන තුළින් සහ BBC sounds වෙතින් ගොන්සාලෝ ගාර්සියා බාර්කාගේ සාකච්ජා සඳහා තවදුරටත් ඔබට සවන් දිය හැකිය.
Until August කෘතිය දැනටමත් ස්පාඤ්ඤ භාෂාවෙන් ප්රකාශයට පත් කර ඇති අතර මාර්තු 12 වන අඟහරුවාදා එනම් අද සිට ලොව පුරා පොත් සාප්පු වලින් පාඨකයින්ට ලබා ගැනීමට හැකිය.
