ඔබ මේ දකින්නේ අවම ඩේටා ප්රමාණයක් භාවිත කරන මෙම වෙබ් අඩවියේ පෙළ පමණක් කියවිය හැකි අනුවාදයකි. රූප සහ වීඩියෝ අන්තර්ගත අපගේ මුලික වෙබ් අඩවිය මෙතැනින් නරඹන්න.
අවම ඩේටා ප්රමාණයක් භාවිතා කරන මෙම වෙබ් පිටු පිළිබඳ වැඩිදුර කියවන්න
T20 ලෝක කුසලානය: ශ්රී ලංකා කණ්ඩායමට අවසන් පූර්ව වටයට පිවිසීමට තවමත් ඇති අවස්ථා මොනවා ද?
මෙවර T20 ලෝක කුසලාන තරගාවලියේ සුපිරි 08 දෙනාගේ වටයේ ශ්රී ලංකාව ක්රීඩා කළ පළමු තරගයේදී ම එංගලන්ත කණ්ඩායම හමුවේ ලකුණු 51 කින් පරාජයට පත්විය.
එංගලන්තය හමුවේ ලද පරාජයත් සමග මෙවර විස්සයි 20 ලෝක කුසලාන තරගාවලියේ අවසන් පූර්ව වටයට පිවිසීමට ශ්රී ලංකා කණ්ඩායමට පවතින හැකියාව පිළිබඳ ක්රීඩා ලෝලීන්ගේ අවධානය යොමුව තිබේ.
නවසීලන්තය සහ පකිස්ථානය අතර පැවති සුපිරි 08 දෙනාගේ වටයේ තරගය වර්ෂාව හේතුවෙන් අතහැර දැමීමට සිදුවීම නිසා කණ්ඩායම් දෙකට ම එක් ප්රසාද ලකුණ බැගින් හිමිවී තිබේ.
ඒ අනුව පළමු කාණ්ඩයේ තරග කරන ශ්රී ලංකා කණ්ඩායමට මෙවර විස්සයි 20 ලෝක කුසලාන තරගාවලියේ අවසන් පූර්ව වටයට පිවිසීමට හැකියාවක් තිබේ ද?
ශ්රී ලංකාවට ඉදිරියේදී ක්රීඩා කිරීමට ඇති තරග මොනවා ද?
සුපිරි 08 වටයේදී එක් එක් කණ්ඩායමට තමන්ගේ කාණ්ඩයේ සිටින අනෙක් කණ්ඩායම් 03 සමග එක් තරගය බැගින් ක්රීඩා කිරීමට සිදුවන අතර ශ්රී ලංකා කණ්ඩායමට ඉදිරියේදී නවසීලන්තය සහ පකිස්ථාන කණ්ඩායම සමග සුපිරි 08 දෙනාගේ වටයේ තරග දෙකක් ක්රීඩා කිරීමට ඉතිරිව ඇත.
ශ්රී ලංකාව සහ නවසීලන්ත කණ්ඩායම අතර තරගය පෙබරවාරි මස 25 වන දා කොළඹ ආර්. ප්රේමදාස ක්රීඩාංගණයේදී දිවා රාත්රී තරගයක් ලෙස පැවැත්වීමට නියමිතව තිබේ.
එමෙන් ම, ශ්රී ලංකාව සහ පකිස්ථානය අතර තරගය පෙබරවාරි මස 28 වන දා මහනුවර පල්ලෙකැළේ ක්රීඩාංගණයේදී දිවා රාත්රී තරගයක් ලෙස පැවැත්වීමට නියමිත ය.
ශ්රී ලංකාවට අවසන් පූර්ව වටයට සුදුසුකම් ලබා ගැනීමට ඇති අවස්ථා මොනවා ද?
ශ්රී ලංකා කණ්ඩායම ඉදිරියේදී ක්රීඩා කිරීමට නියමිත සුපිරි 08 දෙනාගේ වටයේ තරග දෙක අනිවාර්යෙන් ම ජයග්රහණය කළ යුතුව ඇත. එමෙන් ම, ප්රසාද ලකුණු සටහනේ ඉදිරියට යාමට දළ ලකුණු ලබා ගැනීමේ වේගය ද ඉහළ නංවා ගැනීමට සිදුවේ.
ඒ, යම් හේතුවක් මත අවසන් පූර්ව වටයට සුදුසුකම් ලබා ගැනීමේදී කණ්ඩායම් දෙකක් සුපිරි 08 දෙනාගේ වටයේදී සමාන ප්රසාද ලකුණු ලබාගෙන තිබුණහොත් එහිදී එම කණ්ඩායම් දෙකේ දළ ලකුණු ලබා ගැනීමේ වේගය සලකා බලන හෙයිනි.
යම් හේතුවක් මත ශ්රී ලංකාව ඉදිරියේදී ක්රීඩා කිරීමට නියමිත තරග දෙකෙන් එක් තරගයක් හෝ පරාජයට පත්වුවහොත් ලෝක කුසලාන තරගාවලියේ අවසන් පූර්ව වටයට පිවිසීමට ඇති අවස්ථාව අහිමි වනු ඇත.
නවසීලන්තය සහ පකිස්ථානයට ඇති අවස්ථාව
ශ්රී ලංකාව ඇතුළත් දෙවන කාණ්ඩයේ තවත් කණ්ඩායම් දෙකක් වන නවසීලන්තය සහ පකිස්ථානය මේ වන විට ප්රසාද ලකුණු සටහනේ පිළිවෙළින් දෙවන සහ තෙවන ස්ථානවල පසුවේ. ඒ ප්රසාද ලකුණ බැගින් ලබා ගනිමිනි. මෙම කණ්ඩායම් දෙක ම ඉදිරියේදී තරග දෙක බැගින් ක්රීඩා කිරීමට නියමිතව ඇත.
විස්සයි 20 ලෝක කුසලාන තරගාවලියේ අවසන් පූර්ව වටය සඳහා පිවිසීමට මෙම කණ්ඩායම් දෙක ඔවුන් ක්රීඩා කරන තරග දෙක ම ජය ගත යුතු වේ.
නවසීලන්ත කණ්ඩායම ඉදිරියේදී ශ්රී ලංකාව සහ එංගලන්තය අතර පැවැත්වෙන තරග දෙකෙන් එකක් හෝ පරාජයට පත්වුවහොත් ඔවුන්ට අවසන් පූර්ව වටයට පිවිසීමට ඇති අවස්ථාව මග හැරෙනු ඇත.
එමෙන් ම, පකිස්ථාන කණ්ඩායමට ද ශ්රී ලංකාව සහ එංගලන්තය සමග පැවැත්වෙන තරග දෙකෙන් එක් තරගයක් හෝ පරාජයට පත්වුවහොත් ඔවුන්ට ද අවසන් පූර්ව වටය සඳහා පිවිසීමට ඇති අවස්ථාව මග හැරෙනු ඇත.
යම් හෙයකින් නවසීලන්තය සහ පකිස්ථානය තමන්ට ඉදිරියේදී ක්රීඩා කිරීමට ඇති තරග දෙක ම ජයග්රහණය කළහොත් ඔවුන්ට ලෝක කුසලාන අවසන් පූර්ව වටයට පිවිසීම සඳහා හැකියාව ලැබෙනු ඇත.
ඒ, ඔවුන් දැනටමත් ලබා ඇති ප්රසාද ලකුණට ලකුණු 4 බැගින් එකතු වුවහොත් ප්රසාද ලකුණු 5 බැගින් හිමි වන හෙයිනි.
එසේ වුවහොත්, එංගලන්තයට සහ ශ්රී ලංකාවට අවසන් පූර්ව වටයට පිවිසීමේ අවස්ථාව අහිමි වනු ඇත.
ශ්රී ලංකාවට එංගලන්ත කණ්ඩායමේ සහය අවශ්ය වන්නේ ඇයි?
ශ්රී ලංකා කණ්ඩායමට මෙවර විස්සයි 20 ලෝක කුසලාන තරගාවලියේ අවසන් පූර්ව වටයට පිවිසීම සඳහා නවසීලන්තය සහ පකිස්ථානය පරාජය කිරීම පමණක් නොව එංගලන්ත කණ්ඩායමේ සහය ද අවශ්ය වේ.
හැරී බෲක් නායකත්වය ලබාදෙන එංගලන්ත කණ්ඩායම මේ වන විටත් සුපිරි 08 දෙනාගේ වටයේ පළමු කාණ්ඩයේ ලකුණු 02ක් ලබා ගනිමින් පළමු ස්ථානයේ පසුවන අතර ඔවුන්ට ඉදිරියේදී පකිස්ථානය සහ නවසීලන්තය සමග පැවැත්වෙන තරග දෙක ජයග්රහණය කළහොත් අවසන් පූර්ව වටයට පිවිසීමට පහසුවෙන් ම අවස්ථාව උදා වෙනු ඇත.
එංගලන්ත කණ්ඩායම යම් හෙයකින් නවසීලන්තයට සහ පකිස්ථානයට එරෙහිව ලබන තරග ජයග්රහණ ශ්රී ලංකාවට සුපිරි 08 දෙනාගේ වටයෙන් ඔබ්බට යාමට ඇති අවස්ථාව වැඩි කර දෙනු ඇත.
යම් හෙයකින් එංගලන්ත කණ්ඩායම එක් තරගයක් හෝ පරාජයට පත්වුව ද ඔවුන්ට අවසන් පූර්ව වටය සඳහා සුදුසුකම් ලැබීමට හැකි වනු ඇත.
අවසන් පූර්ව තරගයක් කොළඹදී පැවැත්වීමට අවස්ථාවක්
මේ අතර, මෙවර විස්සයි 20 ලෝක කුසලාන තරගාවලියේ අවසන් පූර්ව වටය සඳහා ශ්රී ලංකාව සුදුසුකම් ලැබුවහොත් ඔවුන් එම තරගය ක්රීඩා කරන ප්රතිවාදී කණ්ඩායම සහ අනෙකුත් කණ්ඩායම් මත මෙරටදී ක්රීඩා කිරීමට අවස්ථාවක් ඇති බව Cricinfo වෙබ් අඩවිය වාර්තා කර සිටියි.
ඒ අනුව, පකිස්ථානය හැර ශ්රී ලංකාව සුදුසුකම් ලබා ඉන්දියාව හැර වෙනත් කණ්ඩායමක් සමග ක්රීඩා කරන්නේ නම්, ශ්රී ලංකා කණ්ඩායමට කොළඹදී පළමු අවසන් පූර්ව වටයේ තරග සඳහා ක්රීඩා කිරීමට අවස්ථාව උදාවනු ඇත.
යම් හෙයකින් ශ්රී ලංකාව සහ පකිස්ථානය අවසන් පූර්ව වටය සඳහා සුදුසුකම් නොලැබුවහොත් පළමු අවසන් පූර්ව වටයේ තරගය කොල්කටාහිදීත්, දෙවන අවසන් පූර්ව තරගය මුම්බායිහිදීත් ක්රීඩා කිරීමට සැලසුම් කර ඇත.
දෙවන අවසන් පූර්ව වටයේ තරගයට ඉන්දියාව ක්රීඩා කරන්නේ නම් එම තරගය මුම්බායිහිදී ක්රීඩා කිරීමට නියමිත අතර, යම් හෙයකින් පකිස්ථානය සහ ඉන්දියාව අතර එම තරගය ක්රීඩා කරන්නේ නම්, තරගය පවත්වන ස්ථානය වෙනස් වීමට ඉඩ ඇත.
