ඔබ මේ දකින්නේ අවම ඩේටා ප්රමාණයක් භාවිත කරන මෙම වෙබ් අඩවියේ පෙළ පමණක් කියවිය හැකි අනුවාදයකි. රූප සහ වීඩියෝ අන්තර්ගත අපගේ මුලික වෙබ් අඩවිය මෙතැනින් නරඹන්න.
අවම ඩේටා ප්රමාණයක් භාවිතා කරන මෙම වෙබ් පිටු පිළිබඳ වැඩිදුර කියවන්න
රාජ්ය අමාත්ය සනත් නිශාන්ත රිය අනතුරකින් ජීවිතක්ෂයට
ජල සම්පාදන රාජ්ය අමාත්ය සනත් නිශාන්ත අද (ජනවාරි මස 25 වෙනිදා) කටුනායක - කොළඹ අධිවේගී මාර්ගයේ සිදුවූ රිය අනතුරකින් ජීවිතක්ෂයට පත්ව තිබේ.
පොලිස් මාධ්ය කොට්ඨාසය බීබීසී සිංහල සේවයට පැවසුවේ රාජ්ය අමාත්ය සනත් නිශාන්ත ගමන් කරමින් තිබු ජීප් රථය අධිවේගී මාර්ගයේ කඳාන පොලිස් බල ප්රදේශයේ 11.1 සැතපුම් කණුව අසලදී කන්ටේනර් රථයක ගැටීමෙන් අනතුරක් සිදුව ඇති බවයි.
කන්ටේනර් රථයේ පසුපස ගැටීමෙන් අනතුරුව රාජ්ය අමාත්ය සනත් නිශාන්ත ගමන් කරමින් තිබු මෝටර් රථය අධිවේගී මාර්ගයේ ආරක්ෂිත වැටේහි ද ගැටී තිබෙන බව පොලිස් මාධ්ය කොට්ඨාසය ප්රකාශ කළේය.
අනතුරින් එම රථයේ ගමන් කරමින් සිටි සනත් නිශාන්ත රාජ්ය අමාත්යවරයා, එතුමාගේ ආරක්ෂක නිලධාරියෙක් ලෙස කටයුතු කළ පොලිස් කොස්තාපල්වරයෙක් සහ රථයේ රියැදුරු තුවාල ලබා රාගම රෝහලට ඇතුලත් කර ඇත.
රෝහල් ගත කිරීමෙන් අනතුරුව රාජ්ය අමාත්යවරයා සහ පොලිස් කොස්තාපල්වරයා ජිවිතක්ෂයට පත්ව තිබෙන බව පොලිසිය පැවසීය.
රාගම රෝහලේ අධ්යක්ෂක ලියනගේ රණවීර බීබීසී සිංහල සේවයට පැවසුවේ රෝහල් ගත කරන විටත් රාජ්ය අමාත්ය සනත් නිශාන්ත රිය අනතුරෙන් ලද තුවාල හේතුවෙන් ජිවිතක්ෂයට පත්ව සිටි බවයි.
