ਪਾਕਿਸਤਾਨ: ਜ਼ੈਨਬ ਦਾ ਕਥਿਤ ਬਲਾਤਕਾਰੀ ਤੇ ਕਾਤਲ ਗ੍ਰਿਫ਼ਤਾਰ ਕਰਨ ਦਾ ਦਾਅਵਾ
ਤਸਵੀਰ ਸਰੋਤ, Getty Images
ਪਾਕਿਸਤਾਨੀ ਪੰਜਾਬ ਦੇ ਮੁੱਖ ਮੰਤਰੀ ਸ਼ਾਹਬਾਜ਼ ਸ਼ਰੀਫ਼ ਨੇ ਕਿਹਾ ਕਿ ਪੁਲਿਸ ਨੇ ਸੱਤ ਸਾਲ ਦੀ ਬੱਚੀ ਜ਼ੈਨਬ ਦੇ ਕਾਤਲ ਨੂੰ 14 ਦਿਨ੍ਹਾਂ ਦੀ ਸਖ਼ਤ ਮਿਹਨਤ ਤੋਂ ਬਾਅਦ ਗ੍ਰਿਫ਼ਤਾਰ ਕਰ ਲਿਆ ਹੈ।
ਸ਼ਾਹਬਾਜ਼ ਸ਼ਰੀਫ਼ ਅਨੁਸਾਰ ਗ੍ਰਿਫ਼ਤਾਰ ਕੀਤੇ ਗਏ ਵਿਅਕਤੀ ਦਾ ਨਾਂ ਇਮਰਾਨ ਹੈ ਅਤੇ ਉਸਦੀ ਉਮਰ 24 ਸਾਲ ਹੈ, ਉਹ ਇੱਕ ਸੀਰੀਅਲ ਕਿਲਰ ਹੈ।
ਉਨ੍ਹਾਂ ਅੱਗੇ ਕਿਹਾ ਕਿ ਕਾਤਲ ਦਾ ਡੀਐੱਨਏ 100 ਫੀਸਦੀ ਮੇਲ ਖਾ ਰਿਹਾ ਹੈ।
4 ਜਨਵਰੀ ਨੂੰ ਕੁਰਾਨ ਦੀ ਕਲਾਸ ਵਿੱਚ ਜਾਂਦੇ ਹੋਏ ਜ਼ੈਨਬ ਕਸੂਰ ਤੋਂ ਗਾਇਬ ਹੋ ਗਈ ਸੀ।
ਉਸ ਨੂੰ ਆਖ਼ਰੀ ਵਾਰ ਸੀਸੀਟੀਵੀ ਫੁਟੇਜ ਵਿੱਚ ਇੱਕ ਅਣਜਾਣ ਆਦਮੀ ਦਾ ਹੱਥ ਫੜ ਕੇ ਜਾਂਦੇ ਹੋਏ ਦੇਖਿਆ ਗਿਆ। ਕੁਝ ਦਿਨਾਂ ਬਾਅਦ ਉਸ ਦੀ ਲਾਸ਼ ਕੂੜੇ ਦੇ ਢੇਰ 'ਚੋਂ ਮਿਲੀ।
ਤਸਵੀਰ ਸਰੋਤ, Police
ਸ਼ਾਹਬਾਜ਼ ਸ਼ਰੀਫ਼ ਅਨੁਸਾਰ ਪੜਤਾਲ ਦਾ ਕੰਮ ਮੁਕੰਮਲ ਹੋਇਆ ਹੈ ਅਤੇ ਹੁਣ ਅੱਗੇ ਇਮਰਾਨ ਦਾ ਕੇਸ ਐਂਟੀ-ਟੈਰੀਰਿਜ਼ਮ ਅਦਾਲਤ ਵਿੱਚ ਚੱਲੇਗਾ।
ਉਨ੍ਹਾਂ ਕਿਹਾ, "ਜੇ ਮੇਰਾ ਵੱਸ ਚਲਦਾ ਮੈਂ ਉਸ ਨੂੰ ਚੌਰਾਹੇ ਤੇ ਫਾਸੀ ਲਾ ਦਿੰਦਾ।"
