Cerddi Rownd 1 2026.
Pennill bachog: Pôl Piniwn
Dwy Ochr i’r Bont
A fyddai’n well gennych gael cic yn eich tin?
Neu life time supply o gaws ac o win?
O ddewis rhwng cimwch neu fag cachu ci?
Beth fyddech chi’n rhoi ar eich bwrdd swper chi?
Pe bae chi yn gorfod cael gwyliau yn Ffrainc
neu Borthladd Caergybi, a’ch gwely yn fainc?
Hawdd iawn ydi gwybod sut aeth pethau o chwith
O roi’r dewisiadau i rai yn ein plith.
Llywela Siriol 8
Tir Mawr
Yn awr, yr arolygon barn
Bob Mwnci 'ta Wil Penbwl ?
Mae cant y cant o bobl Sarn
Am ddewis ' Neb o Gwbl'.
Gareth Jôs 8.5
Cwpled caeth yn cynnwys unrhyw derm yn ymwneud â’r heddlu
Dwy Ochr i’r Bont
Coffi, secs a hancyffs hardd…
Yr wyf yn gaeth i brifardd
Ynyr Williams 8.5
Tir Mawr
O achos rhyw ffrae fechan
Y Tŷ Mawr sy’n glytiau mân.
Carys Parry 8.5
Limrig yn cynnwys y llinell ‘Mi neidiais cyn iddynt fy ngwthio’
Dwy Ochr i’r Bont
Meddyliais fy mod wedi cuddio
Y ffaith mod i rioed ‘di bod yno,
Ond mae yn y ffeiliau
Brawf clir o mhechodau:
Mi neidiais cyn iddynt fy ngwthio
Manon Wynn Davies 8
Tir Mawr
Dweud oeddent fy mod yn heneiddio,
Nad oedd y gwaith bellach yn siwtio,
Na fedrwn yn henwr
Wneud job parasiwtiwr,
Mi neidiais cyn iddynt fy ngwthio.
Carys Parry 8.5
Cywydd (heb fod dros 12 llinell): Neuadd
Dwy Ochr i’r Bont
Roedd y gân a’r gerdd i gyd
hyd loriau’r distiau, astud
a’n llafur yn blaguro
dan leuadau tyllau’r to.
Pob drama’n rym trydanol
Pob consyrt - ein Halbyrt Hall –
a hon yn ein gwylia ha
yn ysgolwych La Scala.
Difesur cyfyng furiau –
llwyfan oedd i’n holl fwynhau.
Ynyr Williams 9.5
Tir Mawr
Cyfarfod cefnogwyr aelodau seneddol newydd o Gymru yn Westminster Hall, Llundain
ar ôl etholiad 1992
Yn fywiog, yn dorf eang,
down yn sionc – mae dan ei sang;
meddiannwn y lle hwn, llys
holl hen, hen rym ein hynys.
‘Down ni,’ medd aelod newydd
‘yma ar waith y Gymru rydd
i droi’r grym adre’ o’r gwraidd,
daearu’r drefn Duduraidd.’
O dan gwaith pren ysblennydd
yr ymerodraeth, daeth dydd
hawlio’n ôl – eu gadael nhw
ac agor y ddôr dderw.
Myrddin ap Dafydd 10
Triban yn cynnwys y llinell ‘Ni wn ai ffug ai peidio’
Dwy Ochr i’r Bont
Ni wn ai ffug ai peidio
Yw'r brandiau wrth ‘mi sgrolio,
Ond fe gaf brisiau digon rhad
Am ddillad wnai mo’u gwisgo.
Llywela Siriol 8.5
Tir Mawr
Ni wn ai ffug ai peidio
Yw’r gair mai gwallt lliw cadno
A oedd ar ben arth wen fawr gas
Wrth Ynys Las yn nofio.
Huw Erith 9
Cân ysgafn: Dyrchafiad
Dwy Ochr i’r Bont
Annwyl Radio Cymru, gan obeithio'ch bod chi'n gwrando.
Parthed Tîm Dwy Ochr i'r Bont yn erbyn Tir Mawr...eto!
Dwy waith mewn llai na blwyddyn? Mae hyn yn destun ffrae -
Mae fel petai pum Daniel newydd gamu mewn i'r ffau!
A 'leni, i wneud pethau'n waeth, ry'm un yn llai na llynedd
Ac felly dyma'ch cyfle i ddangos mymryn o drugaredd.
Rhowch 'dransffyr' i un chwarter o Tir Mawr draw i'r tîm yma.
Rwy'n siwr y byddai'r cyn-archdderwydd yn mwynhau talyrna
A sgwrsio â Llywela am gynghanedd neu bêl-droed.
Mae ganddo fo ac Ynyr fwy'n gyffredin na jyst oed.
Mi ddadansoddith delynegion Manon gydag urddas
Ac Anest fydd yn siwr o gadw Cwrw Llŷn mewn busnas.
A'r Capten? Wel, mae'r cysylltiadau rhyngddynt yn chwedlonol -
Mae'r ddau yn caru yr un ferch ond mewn dwy ffordd wahanol!
Dywedwch mai 'dyrchafiad' yw, llawn mawl a bri a chlod
(Ond 'falla' peidio sôn mai atom ni y mae o'n dod).
Treialwch system newydd yn fan hyn - mae'n gyfle perffaith.
Go brin y byddai'n gwrthod cynnig darpar fab yng nghyfraith!
Edrychaf 'mlaen i glywed eich ymateb yn o fuan.
Ar ran aelodau Dwy Ochr i'r Bont, Yn gywir, Eu Capten, Osian.
Anest Bryn 9
Tir Mawr
I geisio am swydd yr is-swyddog a'i farf wedi'w drimio mor neis
Fe laniodd rhyw greadur go flewog ei enw oedd Montague Preis
Ar gadair o'u blaenau'n lled-orwedd mewn coler a thei, chwarae teg
Ac aur oedd yn ticial mewn danedd a ddaliai sigar yn ei geg
Roedd Monti, heb os, yn berffomiwr a'i si.fi yn faith a di fai
Gwirionodd y tri efo'r dysgwr Dechraeodd yn syth fwy neu lai.
Beth amser ar ôl y penodiad, mewn swyddfa, dros baned o de
Fe sylwodd rhyw glerc bach mewn eiliad fod rhywbeth sylweddol o'i le
Taliadau am deiars ? am rwydi ? bananas a phowdwr lladd chwain ?
Ei fosus ddisgynodd ar Monti i ofyn "be goblyn 'di'r rhain?"
A dyna pryd ddaru nhw sylwi pwy'n union oedd Montague Preis
Nid dysgwr amryddawn o Surrey ond Orang Wtan mewn disgeis
Heb folchi, heb newid , heb fwgwd pan laniodd y tri gyda'r wawr
Fe sbonciodd i fyny i'r nenfwd a gwrthod yn lân a dod lawr
Edrychodd y tri ar ei gilydd gan feddwl cymeryd y goes
Eu tynged oedd anfri a chywilydd a hyny hyd ddiwedd eu hoes
Heb os, d'oedd ond un peth amdani - ail eistedd o gwmpas y bwrdd
A chynig dyrchafiad i Monti i swydd oedd yn bell bell i ffwrdd
A'n awr mae o'n genad ym Morneo ar bensiwn go dda rhaid mi ddweud
A neb efo syniad pwy ydy o na'n gwybod be ddiawl mae o'n wneud
Gareth Jôs 9
Ateb llinell ar y pryd - Heno ar nos Fawrth Ynyd neu Heno mae’n nos Fawrth Ynyd
Dwy Ochr i’r Bont
Heno ar nos Fawrth Ynyd
Beth am geisio bwydo’r byd?
Osian Wyn Owen 0.5
Tir Mawr
Heno mae’n nos Fawrth Ynyd
A gwag yw’r cypyrddau gyd
Huw Erith
Telyneg (heb fod dros 18 llinell): Bwrdd
Dwy Ochr i’r Bont
Y Bwrdd Heddwch
Dewch, blant bychain, dewch ar frys
o’ch tiroedd trist neu’ch llysoedd hardd,
dewch drwy’r drain a thrwy ffosydd y byd,
dewch a’ch helyntion a’ch pechodau i gyd.
Dewch, blant bychain, cewch gladdu’ch gorffennol
a golchi’ch dwylo yng ngwyngalch fy nhŷ,
dewch, gyfeillion, mae fy nghynnig yn hael,
ac os rhowch imi’ch einioes, mae achubiaeth ar gael.
Ymlaciwch, gyfeillion, llaciwch eich crysau
a gadewch eich arfau wrth y drws,
cewch wledda’n wâr yng ngwâl ein cwrdd
tra’n hogi’ch cyllyll dan y bwrdd.
Rhowch eich gwledydd yn fy ngofal.
Rhowch eich llofnod fel cusan ar groen.
Rhowch, gyfeillion, eich ffydd yn gyfan
nad oes bradwr yn ein carfan.
Manon Wynn Davies 9
Tir Mawr
Cornel, a honno’n wag;
Cadair, a honno’n oer;
Lle llawn gwenwyn tawel,
Llygaid yn llawn poer.
Jwg o ddŵr i un
A’r gwddw’n sych o hyd;
Platiad, ond dim ond pigo
Rhyw bethau blas dim byd.
Dau ginio wedi hynny,
Rhywun yn chwifio llaw,
Yn hanner codi a chynnig
Fod y lleill yn symud draw
Myrddin ap Dafydd 9
Englyn: Morthwyl
Dwy Ochr i’r Bont
Morthwyl Dad
Mewn bybyl ráp fe’i lapiaf – holl lafur
y blawd llif a gliriaf,
a wylo pan ddychwelaf
i noddfa a braint swyddfa braf.
Osian Wyn Owen 9.5
Tir Mawr
Mae’i oed yng ngraen y coedyn – pren onnen
melynach bob blwyddyn;
mae i waith hwyl amheuthun
a lliw ei daid yn llaw dyn.
Myrddin ap Dafydd 9
