Talwrn Ysgolion Gŵyl Gerallt
1 Pennill bachog: adroddiad ysgol unrhyw gymeriad hanesyddol
Ysgol Bro Myrddin
Cymeriad direidus yw Dafydd ap G.
Mae’n dipyn o dderyn, credwch chi fi.
Caiff drafferth i setlo, er gwaetha’ sawl ‘ffrind’.
Mae’n well ganddo grwydro, ciniawa a mynd.
Awen 8.5
Ysgol Maes y Gwendraeth
Adroddiad Ysgol Neil Armstrong
Dim ond camau bychain/ gymerodd ef ers tro,
mae’i ben yn y cymylau’/ ’sdim cynnydd unwaith ’to.
I gael effaith ar ddynoliaeth/ rhaid cymryd camau mawr,
ond nes y gwnaiff e bach o waith/ bydd ei draed yn sownd i’r llawr.
Steffan 9
2 Cwpled yn cynnwys y gair ‘hen’
Ysgol Bro Myrddin
Daeth dalen newydd sbon i’r stori hen,
A chariad dau mewn un yng ngwres ei llên.
Mabli 8.5
Ysgol Maes y Gwendraeth
I’r blaid newydd, Reform
Un blaid dros ei phobl ei hun,
ni welaf ond hen elyn.
Elen 8.5
3 Limrig yn cynnwys y llinell ‘O ydi, mae’n anodd esbonio’
Ysgol Bro Myrddin
O ydi, mae’n anodd esbonio:
Roedd tîm Talwrn Maes wedi’n concro,
Deg marc ym mhob rownd,
Bro Myrddin yn sownd …
Ac yna fe wnes i ddihuno.
Gwenan 8.5
Ysgol Maes y Gwendraeth
O ydy, mae’n anodd esbonio
pam fod ciwed mor sâl yn ein herio,
ni welaf ’r un dewin
yng ngharfan Bro Myrddin,
peth amheuthun yn wir fydd eu curo
Manon 8.5
4. Pennill ymson mewn siop
Ysgol Bro Myrddin
Teimlaf yn gynnes a chymunedol
wrth gerdded i mewn i’r siop.
Mae’r silffoedd yn llawn, ond y llawr sy’n wag.
Neb i ddychwelyd y wên wrth y til.
Cerddaf ymhellach a sylweddolaf y gwir,
Fod oes y stryd fawr wedi mynd ar ei hyd.
Lois 8.5
Ysgol Maes y Gwendraeth
Siop / Asiantaeth Deithio
Rwy yma’n prynu Ewros
i fynd ar f’antur gudd,
ond ofer fyddant maes o law
’rôl glanio ym Mhontypridd!
Iestyn 9
5 Triban beddargraff arolygwr neu arolygwraig ysgolion
Ysgol Bro Myrddin
Yn d’angladd doedd dim dagrau,
Dim straen nac estyn blodau,
Ni neidiwn ’to ar d’alwad di,
Na’th ofni, bigwr beiau.
Gruffydd 9.5
Ysgol Maes y Gwendraeth
Dim estyn cydymdeimlad
ar ddydd ei ymadawiad,
wrth fedd hen arolygydd blin
Twll tîn i bob adroddiad!
Marged 9.5
6 Cân ysgafn (heb fod dros 20 o linellau a heb fod dros funud a hanner o berfformiad) : Ysgol Waetha’r Byd
Ysgol Bro Myrddin (ar alaw ‘Ni’n mynd nôl i Flaenau Ffestiniog)
Cytgan
Ni’n ymbil am transfer i ysgol arall,
Ni’n desbret iawn, ystyriwch plis ein cais!
Ni’n ymbil am transfer i ysgol arall,
Achubwch ni cyn inni golli’n llais.
Gwrandewch ar fy stori am fwyd ein ffreutur ni,
A pharatowch am sioc a hanner nawr –
Ces frechdan gaws i ginio, heb sylwi beth oedd ynddo,
Dwi’n eistedd ar y toilet ers tair awr.
Cytgan
Ni’n ymbil am transfer i ysgol arall,
Ni’n desbret iawn, ystyriwch plis ein cais!
Ni’n ymbil am transfer i ysgol arall,
Achubwch ni cyn inni golli’n llais.
Yr addysg sy’n rêl llanast yn ein hysgol afiach ni,
A phob un stafell fel ryw gaets mewn sw,
Athrawon sydd yn iapo, y pennaeth wedi danto,
A’r plant yn gwbod llawer mwy na nhw!
Cytgan
Ni’n ymbil am transfer i ysgol arall,
Ni’n desbret iawn, ystyriwch plis ein cais!
Ni’n ymbil am transfer i ysgol arall,
Ond peidiwch plis â’n hala ni i Maes!
Pawb 9
Ysgol Maes y Gwendraeth
Wel, croeso mawr i’r ysgol, i Ysgol Waetha’r Byd,
lle does dim trefn na rhyddid, na gweithio ar y cyd;
lle does dim hawl i wenu, na chwerthin wir i chi,
na hawl i fynd i’r toiled, mae’r llawr yn llawn pî-pî!
Dim hawl i dynnu siwmper a hithau’n ganol ha’,
a ras trawsgwlad yn ddyddiol o gwmpas ugain ca’.
Mae Maths a Ffis yn orfodol nes blwyddyn un deg tri
a ffug arholiad dyddiol ar drigonometrî.
Rhaid gwisgo sgertiau pensil sy’n cyrraedd at y llawr
ac adrodd Gweddi’r Arglwydd yn gyson bob un awr.
Pob athro sy’n ddiogyn, drwy’r amser ar eu ffôn,
yn sgrolio trwy’r opsiynau am ‘hotties’ o Sir Fôn!
Fe dreuliwn ein hawr ginio yn ciwio am y ‘bwyd’,
ond afiach ydyw’r fwydlen, ’mond uwd a phryfed llwyd.
Ataliad am ddim rheswm dan lygaid craff y Doc,
er gwaetha’i chymwysterau, ni all hi ddarllen cloc!
A nawr fe gawn ddatgelu yr Ysgol Waetha sy’
nid cyfrinach wir mohoni, Bro Myrddin ydy hi!
Pawb 9.5
7 Gorffen limrig ar y pryd :
Mewn palas gerllaw Abergwili,
Mae pethau rhyfedda eleni,
A’r odiaf o hyd
O’r cwbwl i gyd
Ysgol Bro Myrddin
Mewn palas gerllaw Abergwili,
Mae pethau rhyfedda eleni,
A’r odiaf o hyd
O’r cwbwl i gyd
Yw’r crys sgwariau salw ‘sda Ceri
Luned 0.5
Ysgol Maes y Gwendraeth
Mewn palas gerllaw Abergwili,
Mae pethau rhyfedda eleni,
A’r odiaf o hyd
O’r cwbwl i gyd
Yw’n Meuryn ni heddiw – sef Ceri
Saran
8 Telyneg (heb fod dros 18 llinell): Lloches
Ysgol Bro Myrddin
Cysuraist, Mair, dy faban glân
Ag alaw leddf dy nodau,
Yn noddfa’r preseb suai’r gân
Yn rhodd o ryfeddodau.
Er llesged traed ar ben y daith,
Roedd gobaith yno’n drysor,
Mewn stabal lom ym Methlehem
Cest loches drws ar agor.
Mewn pabell unig dan y lloer,
Am ennyd, caf freuddwydio
Am gysur glân dy freichiau di,
I’m cadw a’m cysuro.
Gweddïo wnaf am hafan glyd
A chariad mam i’m lleddfu,
A gaf i glywed unwaith ’to
Dy lais a’th si-hei-lwli
Beca 9.5
Ysgol Maes y Gwendraeth
Ar fore Sul, yn selog anochel,
o gysur gwely pechod,
ymlwybraf yn ffyddlon at freichiau
croesawgar cymuned foesgar.
Trwy ddrysau trymion lloches Duw,
atseinia bob cam trwy f’enaid byw
fel cabledd, yn ffaeledd;
er y groes fach ffyddlon
ynghudd yn fy nghalon.
Gwrando, amenio, pregeth undonog, unochrog.
Ai llygaid graslon, ynteu saethau creulon
sy’n rhythu o’r pwlpud oddi fry?
A phwy fan hyn sy’n tafoli
rhwng purdeb plentyn tragwyddol
a llysnafedd gwaddol y Diafol?
 rhesi’r adnodau’n llosgi’n graith,
bygwth dianc mae’r cyfrinachau
a dw i’n syrthio, yn cwympo, o freichiau
‘croesawgar’ cymuned fyddar.
Saran 9.5
9 Englyn: Amgueddfa
Ysgol Bro Myrddin
Twll hel llwch, ynte lloches? Nid yw’n hawdd,
Ond o nôl dy hances,
Rhwbio, a’i bolisho’n bles,
Wir, dihunir dy hanes.
Eurig Salisbury 10
Ysgol Maes y Gwendraeth
(Ystafell wely’r ferch wedi iddi fynd i’r Brifysgol)
Tei’r chweched, dol, hen dedi – ei heiddo
sy’n waddol nawr hebddi,
a manion ei chymoni’n
un rhan fwy o’r hyn wyf i.
Lowri Lloyd 10
