Wetin be security emergency wey President Tinubu declare?

Nigeria President Bola Tinubu don declare nationwide security emergency for di kontri afta weeks of kasala nationwide.

As part of di decalaration, oga Tinubu order di police and army make dem employ more pipo for inside dia ranks.

E tok for inside statement wey im release on Wednesday say dis one go help wit di foots for ground as police go hire anda 20,000 officers.

According to am, dis go add wit di officers wey dem collect from VIPs afta dem get dia crash training so dem go fit deliver wen dem enta "security-challenged areas for di kontri".

Oda agencies wey don get mandate to get more pipo for dia team to work on insecurity na di Department of State Services (DSS) wey get order to recruit more forest guards.

Di statement say, "di DSS get my authority to deploy all di forest guards wey already dey trained to flush terrorists and bandits wey dey hide for our forests comot. Di agency also get my directive to recruit more men, make dem for man di forests."

All dis dey come afta a week of national security kasala wey bin see kidnaps and killings wey happun for Church for Kwara state, GGCSS school for Maga Kebbi state and Saint Mary's school for Niger State and also di killing of Brigadier-General Musa Uba for Borno state.

Di goment confam di release of all di students from Kebbi State and di worshippers from di church for Kwara State.

On di mata of wetin go help wit di insecuirty for di kontri, President Tinubu drag ear give lawmakers to no dey drag leg ontop di mata of state police.

E tok say, "I dey call on di National Assembly make dem start to dey review di laws wey go allow states wey need state police to fit create dem".

On top di mata of consistent gbas-gbos between herders and farmers, Tinubu say e arrange Livestock Ministry to solve dat palava.

Dis na as e call ranching ass di future for livestock farming and national unity.

E say, "our adminsitration don arrange di Livestock Ministry to address di persistent gbas-gbos between herders and farmers. I dey ask make all herder association, make dem use am and end open grazing plus also surrender illegal weapon. Ranching, now na di road forward to create sustainable livestock farming and national harmony".

Wetin be security emergency?

Security emergency na total attack on criminals for di kontri, one security sabi pesin Ajayi Okasanmi tok.

Di declaration na sake of di dangerous security situation for di kontri wey need immediate attention.

Di mandate of di enforcers na to protect lives and property wit di total support of govment.

Oga Okesanmi add say, "na security operation wey go need all support including weapon and require logistics by di govment."

Summary of security emergency under Tinubu

President Tinubu formally declare a nationwide security emergency and wetin e mean according to di presidency be say;