'My daughter bin no wan go dat school' - Mama of kidnapped Kebbi schoolgirl lament

E don reach three days wey bandits attack Government Girls Comprehensive Secondary School for Magu, Kebbi state.

For di same attack, dem kidnap 25 school girls, kill di vice principal and anoda pesin.

Tori don come out say three of di girls don try escape, while di odas still dey wit dia captor.

One parent wey we no wan tok her name for safety concerns for Maga community tok how her life turn upside down afta she hear say her pikin dey among di schoolgirls wey bandits dem carry.

Di mother explain say since dat day, she no sabi wetin dey do for her life. For her mind, she dey fear say di girls no go return.

She tok say "wen I hear di news, I begin dey cry, my bodi dey shake, chest dey pound. I try go house but I no fit move until one woman help am climb okada go back home."

"Di pain dey burn my heart sake say na six weeks now since I last see my pikin.

Di girl bin dey cry dat day say she no wan go school, but we beg am make she endure" di mama of di pikin tok.

She add say di community dey inside deep sorrow and distress - den beg make govment help return dia girls and give security help to protect di town.

"Fear don dey before dis wahala happun, we dey always live for fear."

Three major attacks wey happun for Nigeria inside one week

Nigeria don face security wahala wey e neva see for a long time sake of attacks from armed bandits and jihadist fighters for Borno State for northeast.

Inside just one week, three bad attacks don happun for different parts of di kontri from Northeast go Northwest, and di last one happun for North Central.

For Borno State for northeast, pipo wake up on Monday morning hear report say Brigadier General Musa Uba don die in di line of duty during ambush by terrorist group.

Di tok about di whereabouts of di Brigadier General Uba bin make pipo begin worry, afta fotos show wia terrorists bin gbab am.

Nigerian Army for one of dia previous statement say oga Uba bin dey on routine patrol to secure communities wey dey around Wajiroko for Azir Multe, Damboa LGA of Borno State.

Dat na di last time wey dem hear anytin about am, up till wen di video of di death Uba come dey trend.

Although di Nigerian Army no issue any statement to confam di whereabouts of Brigadier General Uba since 15 November.

But statement wey do presidency release on Tuesday through im tok tok pesin Bayo Onanuga, President Tinubu say e dey depressed to hear of di death of di senior army officer.

Another attack wey happun for Kebbi State for northwest Nigeria na di kidnapping of schoolgirls, but some of dem later manage escape from di hand of di bandits.

Tori be say bandits capture 25 students from di Government Girls Comprehensive Secondary School for early hours of Monday.

Di attack happun for the school wey dey Danko/Wasagu Local Govment Area of Kebbi State, northern Nigeria.

Local sources tell BBC News Pidgin say di bandits kill one school teacher bifor dem carry di girls, and later kill one school security guard.

Di federal Govment don show deep concern and solidarity wit families of di female students wey bandits abduct from di school.

Federal Govment dey adjust di kontri military, police, and intelligence system to prevent more attacks and to respond faster and more effectively wen threats show.

For another development, President Bola Tinubu don tell Vice President Kashim Shettima make he go Kebbi State on Wednesday go sympathise wit di state govment and assure di parents and guardians of di kidnapped schoolgirls say govment go do everytin to make sure dem come out quick.

Di President, wey di military authorities don brief well-well about di two incidents, tok say e dey sad about di kidnapping of di schoolgirls, even though intelligence don warn befor say bandits fit strike.

While on di oda hand, Kebbi State Governor, Nasir Idris, tok say e don assure parents of di schoolgirls wey bandits carry from GGCSS Maga say efforts dey on ground to rescue dia children.

For Kwara State, for north-central region of Nigeria one deadly attack for one church for di town of Eruku, wia jaguda pipo bin open fire on top pipo wey gada to pray for Tuesday evening.

Di attack happun for di Christ Apostolic Church (CAC) for Oke Isegun, for Ekiti Local Government Are, Kwara state during di church evening programme.

Di bandits shoot di pastor of di church bifor dem round up di worshippers at gunpoint.

For dia statement, di police tok say: "As we search di area, we discover one male victim wey dem shoot die inside di Christ Apostolic Church, Oke Isegun, while we also find anoda victim of fatal gunshot for di bush.

Meanwhile, eyewitnesses say na three pipo die for di attack wey happun for di Christ Apostolic Church (CAC) for Oke Isegun, contrary to wetin police tok.

Di eyewitness wey be member of di Church also say di bandits carry over 30 of dia members enta bush. E say dem no fit account to 35 of dia worshipers

'Nigeria security systement dey weak' - Expert tok

One security expert, Dr Buhari Ubandawaki, tell BBC News Pidgin say di recent violent attacks wey happun for Nigeria witin one week show clearly say di kontri security system dey weak and overstretched.

Dr Ubandawaki tok dis one as im react to three major incidents: di killing of one Army General for Borno, di kidnapping of 25 schoolgirls for Kebbi, and di attack wey gunmen do for one church for Kwara wey lead to deaths and kidnapping.

According to am, di way di attacks take happun dey show say terrorist groups wan prove say dem get power pass govment.

"From wetin we see for oda kontris wey dey face similar wahala, terrorists dey always increase attacks when dem sense say di kontri dey weak or wen external pressure dey. Dem wan show say na dem dey control, no be government," e tok.

Dr Ubandawaki identify many reasons wey dey cause insecurity for northern Nigeria. E tok say one big problem be di large ungoverned areas wey nobodi dey in charge, and na dat kind place terrorists dey use hide, plan and execute attacks.

"Plenty areas for northern Nigeria no get any authority wey dey control am. Dat one dey give terrorists chance to settle, plan attack and go hide later," e add.

E still tok say many state govments never put serious effort to fight insecurity, and communities just dey rely only on govnment to protect dem.

E add say porous borders dey allow illegal guns dey enter Nigeria, and di kontri never still identify or punish di sponsors of terrorism.

Di expert tok say Nigeria neva apply di three important security layers wey suppose help stop insecurity.

E say "di first layer na community level, wia every community suppose set up dia first line of defence."

"Di second layer na state level, wia state govments suppose work togeda wit communities and federal security agencies.

Di third layer na federal level, wia better recruitment, correct deployment and enof weapons suppose dey in place, plus better defence budget." Im tok

"Federal govment need to recruit more people and equip dem well to fit fight terrorists," e add.

E advise say govnors for di affected states suppose work togeda instead of evribodi dey run dia state individually.

"Govnors gatz to come togeda develop cross-border plan to fight terrorism," e add.

Dr Ubandawaki tok say state govments suppose put more money for community security groups, and federal govment suppose make sure say all ungoverned land dey under govment control.

"Govment need to take over those lands again. Dis one go require better surveillance and modern technology," e tok.