Four doctors and three nurses sanctioned for medical negligence ova death of hit-and-run accident victim for Ghana
Wia dis foto come from, SOCIAL MEDIA/AMBULANCE SERVICE
One committee wey investigate di death of hit-and-run accident victim afta three hospitals deny am emergency care don find say medical negligence kill di 29-year-old engineer.
Di three-member committee afta almost three months submit dia report to di minister for health wia dem make some recommendations wey include sanctions for four doctors and some nurses.
Di case of Charles Amissah wey bin dey work wit beverage company Promasidor Ghana limited trend for early February afta di Police Hospital, Ridge Hospital and Korlebu Teaching Hospital refuse to provide am wit emergency care.
Dem tok di ambulance pipo wey carry am go di facilities say dem no get bed to admit di accident victim for treatment, na so im bleed wey im die afta two hours.
At dat time, social media users and oda citizens vex say di kontri don fail one of dia citizens again for di healthcare sector.
Ghana president and parliament condemn di action wey dem demand investigation for di mata to understand how e hapun say three ogbonge hospitals refuse to treat di victim till im die.
Di Korlebu Teaching Hospital also interdict four of dia staff ova di case at dat time to allow investigation for di case.
Family of di 29-year-old Charles Amissah bin demand justice and reforms for di healthcare system for Ghana.
End of Di one wey oda users dey read well well
Dem say di death of dia relative gatz serve as reminder say pesin no ever suppose die again sake of medical negligence.
Wia dis foto come from, DAVID ANDOH/JOY
Wetin di investigative committee find
Di health ministry set dis committee to chook eye for di case and also protocols and policies around emergency care for pipo.
Di members of dis committee be:
- Professor Agyeman Badu Akosa – Pathologist (chairman)
- Dr Henry Kwasi Bulley – Ghana medical association rep
- Dr Koku Awoonor-Williams - technical advisor to di health minister
- Apart from di health ministry, oda agencies like di health facilities regulatory agency (HeFRA) also chook eye for dis case.
- Afta almost three months di committee finally submit dia report, dem find di following tins:
- Di 29-year-old no die from im injuries, na medical negligence kill am
- Di victim die sake of im loss excessive blood
- Di patient die 70 minutes afta dem carry am roam di city to dis hospitals
- Charles Amissah fit dey saved if di three facilities – Police hospital, Ridge hospital and Korlebu Teaching Hospital bin offer am emergency care
- Di victim go survive if dem bin give am intravenous fluids inside di ambulance
- Di ambulance technicians for dat operation no get vital equipment to save di patient
- Di ambulance technicians no get basic life support, advanced life support and advanced trauma life support skills for dat day
- Di healthcare system no get coordinated emergency communication process wey go fit show wia beds dey available make di ambulance carry di victims go dia straight without roaming for di whole city
Doctors and nurses go face sanctions
Wia dis foto come from, DAVID ANDOH/J
Di committee recommend disciplinary action and oda reforms for di emergency healthcare system.
Chairman for di committee Professor Agyemang Badu Akosa confam say many healthcare workers breach dia duty of care and ethical standards for di way dem handle di case.
Dem recommend say make di Police Hospital as well as di Medical and Dental Council (MDC) punish and recommend for disciplinary action four doctors ova alleged misconduct and breaches.
Di committee also recommend say make dem refer two nursing staff to dia respective hospitals and di Nursing and Midwifery Council (NMC) for disciplinary action.
Di kontri health minister Kwabena Mintah Akandoh say di various hospitals gatz take immediate action to deal wit dia staff ova dis case.
Meanwhile, family of di deceased 29-year-old say dem dey launch advocacy against di no-bed syndrome and medical negligence wey dey lead to many deaths.
Dem want make di death of Charles Amissah to be di turning point to fix di kontris healthcare wahala.
