داسې اټکل دى چې ولسمشر مشرف بېړنى حالت د دې لپاره اعلان کړ چې په ستره محکمه کې د خپلې خوښې قاضيان کېنوي

مخالفو گوندونو مخکې سترې محکمې ته عريضې وړاندې کړې وې او د جنرال پروېز مشرف بيا ټاکل کېدل يې په دې دليل ناقانونه بلل چې دى د پوځ د مشرتابۀ پر څوکۍ او پوځي جامو کې د تېرې مياشتې د ولسمشرۍ ټاکنو ته ولاړ و.

د سترې محکمې پرېکړې د ښاغلي مشرف له مخې ټول هغه خنډونه او ننگونې ليرې کړې چې مخالفو گوندونو له بياولسمشر کېدو څخه پرې د هغۀ مخه نيوله.

مشرف به له پرېکړې سره سم د ملکي ولسمشر په توگه لوړه کوي او له ژمنې سره سم به د پوځ له مشرۍ څخه لاس اخلي.

د ولسمشر مشرف مشر حقوقي سلاکار وويل دوى اوس د محکمې ليکلې پرېکړې ته سترگې پرلاره دي.

دا پرېکړه د هغو قاضيانو لخوا شوې چې ولسمشر مشرف په ځېرکۍ سره په ستره محکمه کې ټاکلي. دوى د هغو قاضيانو ځايناستي دي چې په پراخه توگه خپلواک بلل کېدل او د ولسمشر مشرف په تاوان يې څو غټې پرېکړې کړې وې.

تمه وه چې د تېرې مياشتې په ټاکنو کې د ولسمشر مشرف پر کانديدۍ باندې هم د سترې محکمې پخواني قاضيان پرېکړه وکړي. عمومي اټکل دا دى چې دا پرېکړه د جنرال مشرف په ضد وه، ځکه خو يې درې اوونۍ مخکې بېړنى حالت اعلان کړ چې هغه قاضيان چې د دۀ پر خوښه کار نه کوي گوښه کړي.

تر اوسه پورې له ښکاره نه ده چې بېړنى حالت به څه وخت پاى ته رسېږي. مخالفو گوندونو او د نړۍ مشرانو پر مشرف فشار زيات کړى چې د جنورۍ د مياشتې له ټاکنو ډېر مخکې بېړنى حالت پاى ته ورسوي.