د ازبکستان ولسمشر اسلام کريموف خاورو ته وسپارل شو
د عکس سرچینه، AFP
د ازبکستان ولسمشر اسلام کريموف چې تېره ورځ مړ شوی و نن (۳ سپټمبر) يې د جنازې مراسم تر سره او د دغه هېواد په سمرقند کې خاورو ته وسپارل شو.
تر دې وړاندې د ده جنازه له پلازمېنې تاشکند څخه خپل پلرني ټاټوبي سمرقند ته لېږدول شوې وه.
په ازبکستان کې نوموړي ته د درناوۍ په خاطر درې ورځنی مې وير اعلان شوی دی.
د اسلام کريموف تابوت په سپينه کپړه او د ازبکستان پر بيرغ پوښل شوی و چې د لارې په اوږدو کې ګڼو خلکو ده ته درناوی وړاندې کړ او ویر یې کاوه.
وړاندې ۷۸ کلن اسلام کریموف د مغزي سکتې له امله روغتون ته لېږدول شوی و چې وروسته یې د مړیني ګونګوسې هم خپرې شوې خو ازبک چارواکو د جمعې په ورځ د هغه مړینه تایید کړه.
د عکس سرچینه، Reuters
د نوموړي په جنازه کې افغان ولسمشر محمد اشرف غني، د روسیې لومړی وزیر دیمیري میدودف، د ایران د بهرنیو چارو ویر جواد ظریف او د ځینو نورو هېوادونو لوړ پوړو چارواکو ګډون کړی و.
ښاغلی کريموف په اسيا کې له خورا مهمو واکمنو بلل کېده چې ۲۷ کاله يې پر خپل هېواد واکمني وکړه.
نوموړی د بشري حقونو د څار ډلو لخوا د خپلو مخالفینو په ځپلو او له بشري حقونو په سرغړونه هم تورن و.
د عکس سرچینه، AP
د عکس سرچینه، Reuters
د ولسمشر کریموف څرګند ځای ناستی لا تراوسه معلوم نه دی خو اوس پوښتنه دا راپورته کېږي، چې د ده ځای ناستی به څوک وي؟
د ښاغلي کریموف د کورنۍ پر ځینو غړو د فساد تورونو له لګېدو وروسته دا وروستیو کلونو کې د هغه د ځای ناستي په اړه تاوده بحثونه پیل شول.
یو وخت خو د ډېرو په نظر د ده مشره لور ګلناره د ځای ناستې په توګه مناسبه وه، خو ګلناره هغه مهال د خلکو له پامه ولوېده چې په فساد تورنه شوه او اوس مهال په خپل کور کې نظربنده ده.
د دغه هېواد تر ټولو اوږد مهاله لومړی وزیر شوکت مرزایوف او مرستیال یې رستم اعظیموف هغه دوه کسان دې چې کېدای شي د ده ځای ناستي شي.
