اوباما: نوماندان دې ترینګلتیا ته لمن نه وهي

د امریکا ولسمشر بارک اوباما د ولسمشرۍ سیالو نوماندانو ته خبرداری ورکړی، چې د 'ترینګلتیاوو ډېرېدو ته لمن ونه وهي'.

ولسمشر اوباما ویلي، نوماندان باید په ټاکنیزو منډو ترړو کې ''د ټولو امریکايي وګړو سپکاوی ونه کړي''.

د اوباما له خبرو یوه ورځ وړاندې، په شیکاګو کې د جمهوري ګوند نوماند ډونالډ ټرمپ وینا د ځینو امنیتي دلایلو (تاوتریخوالي او اخ او ډب) له کبله لغوه شوه.

د ښاغلي ټرمپ له وینا وړاندې، د جمعې په ورځ په شیکاګو کې د هغه سلګونه مخالفان د ایلینویز پوهنتون په انګړ کې راغونډ شوي وو چې بالاخره د دوی او د ټرمپ د ملاتړو ترمنځ ترینګلتیا رامنځ ته شوه.

له یوې خوا د ښاغلي ټرمپ ملاتړو او له بل پلوه د دیموکرات ګوند د دوو نوماندو د ملاتړو له خوا شعارونه ورکول کېدل.

د دواړو ډلو ترمنځ په اخ او ډب کې د ټرمپ ملاتړو هڅه کوله د مخالفانو له لاسونو د هغوی بیرغونه بهر ته وباسي.

پر ښاغلي ټرمپ وړاندې ډېرې نیوکې شوې دي.

نوموړي امریکا ته د کډوالو د ورتګ د مخنیوي غوښتنه کړې وه.

ولسمشر اوباما به راتلونکې نومبر میاشت کې له سپینې ماڼۍ وځي.

د یکشنبې په ورځ دیموکراتانو د یوه پروګرام په لړ کې وویل، هغه څوک چې سپینې ماڼۍ ته ځان رسول غواړي، او ټاکنیزې منډې ترړې کوي، باید نورو ته سپکاوی ونه کړي او د امریکایانو په منځ کې اختلاف او مذهبي توپیر ته لمن ونه وهي.

ټرمپ وروسته پاتې شو

پر همدې مهال، د امریکا له ټکساس ایالت نه د جمهوري ګوند استازی ټیډ کروز په لوېدیځ وایومینګ ایالت کې د شنبې په ورځ تر نورو نوماندانو مخکې و.

د رایو له اچولو وروسته، کروز ۶۶٫۳ سلنه رایې خپلې کړې، خو مارکو روبیو بیا ۱۹٫۵ سلنې واخیستې او ډونالډ ټرمپ ایله ۷٫۲ سلنه رایې ترلاسه کړای شوې.

په واشنګټن کې هم د جمهوري ګوند لومړنۍ ټاکنې وشوې، خو پایلې یې لا نه دي په ډاګه شوې.

د سې شنبې په ورځ به په ۵ ایالتونو (فلوریډا، الینوی، میزوري، شمالي کارولینا او اوهایو) کې د جمهوري ګوند لومړۍ ټاکنې کېږي.