کوباني ته د پیشمرګه تر تلو مخکې درنې چاودنې شوې

د سوریې په کوباني ښارګوټي کې د سپکو وسلو او هوايي بمباریو سخت بریدونه روان دي. په دغه ښارګوټي کې کردي جنګیالي د "اسلامي دولت" وسله والې ډلې پر ضد مقاومت کوي.

د امریکا پوځ په کوباني او خوا و شا سیمو کې پر هدفونو شپږ ځلې بریدونه کړي، چې په یوه برید کې د هغو مرستندویه توکیو یو بار هم ویشتل شوی، چې تر دې وړاندې د الوتکو له لارې په سیمه کې غورځول شوی و.

د امریکا د بهرنیو چارو وزیر جان کیري کوردي جنګیالیو ته د هوا له لارې د وسلو، مرمیو او روغتیايي توکیو د ور غورځولو ګام په سیمه کې د روان کړکېچن حالت د اواري لپاره اړین بللی.

تر دې وړاندې ترکیې ویلي وو، چې د ډموکراتیک یووالي په نامه کوردي ګوند ته به پخپله هم وسلې ور نه کړي او بل چا ته به هم د دې کار اجازه نه ورکوي.

خو ښاغلي کیري وویل، چې دوی د مرستې رسونې په اړه له ترکي چارواکو سره خبرې کړې دي.

"دغې جګړې په داسې وخت کې زور اخېستی، چې عراقي کوردي جنګیالیو ویلي، اوس چې ترکیې ورته له خپلې خاورې نه سوریې ته د ور اوښتو اجازه ور کړې، د خپلو کوردانو د دفاع لپاره دغه هېواد ته د ورتلو چمتوالی نیسي".

امریکايي پوځ ویلي، الوتکو د کوباني ښار پر ځینو اهدافو او شاوخوا سیمو شپږ ځلې بمبارۍ کړې دي.

پر همدې مهال، کردي جنګیالیو ویلي، چې له ترکي خاورې ته د سوري کردانو د ملاتړ او د "اسلامي دولت" پروړاندې د جګړې لپاره تګ ته تیارسئ ولاړ دي.

ترکیې مخکې ومنله، چې له خپلې خاورې به کوباني ښار ته هغو عراقي کردي جنګیالیو ته د ورتګ اجازه ورکړي، چې د "اسلامي دولت" پروړاندې جنګېدل غواړي.

وړاندې انقرې ویلي وو، چې کوباني ښار به د سخت دریځو "اسلامي دولت" جنګیالیو لاس لوېدو ته پرېنه ږدي.

د عراق کردستان حکومت ویاند ویلي، کردي ځواکونه تر اوسه د سوریې لوري ته نه دي خوځېدلي.

خو سرچینه وايي، هڅې روانې دي، چې د هوا او ځمکې له لارې کردي ځواکونه کوباني ته ولاړ شي.