په لسگونو ميليونه ماشومان ښوونځى نه لري
د عکس سرچینه، AP
ملگري ملتونه وايي په نړۍ کې ٥٨ ميلييونه کوچنيان ابتدايي ښوونځيو ته لاسرسى نه لري او نړيواله ټولنه به د زريرزې ژمنه تر سره کولو کې پاتې راشي چې د ٢٠١٥ کال پورې به هر کوچني ته د لومړنيو زدکړو شرايط برابول و.
يونيسکو په خپل کلني رپورټ کې دا خبردارى هم ورکړى دى چې مخ پر ودې هيوادونه د مسلکي ښوونکو له کمي سره مخامخ دي .
نړيواله ټولنه په خپلې دې ژمنې کې چې تر ٢٠١٥ م کاله پورې به هر ماشوم ته د لومړنيو زدکړو زمينه برابروي، پاتې راغلې.
دا ځکه چې اوس هم د نړۍ په لر او بر کې ٥٨ ميليون ماشومان ښوونځي ته نه ځي.
د يونيسکو د وروستي رپوټ پر بنسټ حالات نور هم د خرابۍ په لور سم دي، ځکه چې تمه کېږي راتلونکى کال د هغو ماشومانو شمېر ډېر شي چې ښوونځي ته د ورتگ په عمر کې دي.
ان له اقتصادي پلوه غوړېدونکي هېوادونه د بېلگې په توگه نايجيريا به دې ته اړه وي تر ٢٠٢٠ م کاله پورې د ماشومانو د زده کړو لپاره نژدې دوه ميليارد ډالر ومومي.
رپوټ همداراز خبردارى ورکوي چې ډېر شمېر هېوادونه په خپل ښوونيز سيستم کې د تشې د ډکولو لپاره وارله مخه نا مسلکي ښوونکي په دندو گوماري.
په انگولا، سويلي سودان او سنيگال کې له نيمايي کم ښوونکي سم روزل کېږي چې له دې سره د زريزې موخې نه پوره کېدونکې ژمنه برېښي.
