قاضيانو د جنرال پروېز مشرف محاکمه وځنډوله
د ملي خیانت په تور د پاکستان د پخواني ولسمشر پروېز مشرف محاکمه له هغو راپورونو وروسته وځنډېده، چې د ده له کوره د محکمې په لاره یو بم وموندل شو.
د ښاغلي مشرف وکیل احمد رضا قصوري خبریالانو ته وویل، ښاغلی مشرف به پخپله محکمې ته ولاړ نه شي.
ښاغلی قصوري وايي د امنيتي ګواښونو په اړه يې لا له وړاندې چارواکو ته خبر ورکړی و، خو هغوی يې پروا ونه کړه.
دی وايي: ''موږ محکمې ته په دې اړه خبر ورکړ، چې د امنیتي ستونزو او ګواښونو له کبله په محکمه کې د جنرال مشرف موجودیت ممکن نه دی''.
ښاغلی قصوري وايي محکمې ته مو دا هم وویل، چې نن (سه شنبه، ۲۴ ډسمبر) د ده کور ته ډېر نژدې پنځه کيلو ګرامه چاودېدونکي توکي او یو شمېر وسلې وموندل شوې.
د ۲۰۰۷ د نومبر دريمه
جنرال مشرف په ۲۰۰۷ کال کې د هغې پرېکړې له کبله په دې تور تورن شوی، چې له مخې یې اساسي قانون وځنډول شو او بېړنۍ واکمني پلې شوه.
د ښاغلي مشرف د محاکمې لپاره درې قاضيان ګومارل شوي او په هغه ځای کې چې د ده محاکمه کېږي شاوخوا يې سخت امنيتي تدابير نيول شوي دي.
په دغو قاضيانو کې د سندهـ د عالي محکمې مشر قاضي فیصل عرب، د لاهور د عالي محکمې مشر قاضي ياور علي او د بلوچستان ايالت مشره قاضي طاهره صفدر شامل دي.
که نوموړی په دې کار کې د اسلام اباد د یوې ځانګړې محکمې لخوا مجرم وګڼل شي، د مرګ یا عمري بند له سزا سره مخامخ کېدای شي.
پروېز مشرف چې تر دې مخکې يې محکمې ته يې له ورتلو ډډه کړې وه، څارنوالۍ يې پرته د ضمانت له منلو د نيولو امر ورکړ.
ښاغلي مشرف د نواز شريف واکمني چې موده يې لا بشپړه نه وه، د سپينې کودتا له لارې پای ته ورسوله او ځان يې د هېواد ولسمشر اعلان کړ.
له دې وروسته يې د هېواد د قاضي القضات افتخار محمد چوهدري په ګډون د لوړې کچې شاوخوا ۶۰ عدلي چارواکي نظربند کړل.
نواز شریف د مشرف د واکمنۍ په دوره کې په سعودي عربستان کې اوسېده او هغه مهال چې په ۲۰۰۸ کال کې له واکه لرې شوې، بېرته هېواد ته ستون شو.
