هند؛ په سیند کې د اوبو کچې له زیاتېدو وروسته سلګونه کسان له کورونو ایستل شوي

په داسې حال کې چې د هند پلازمېنې ډیلي ته څېرمه جمنا سیند کې د اوبو کچه پرلپسې زیاتېږي، سلګونه کسان له خپلو مېشت ځایونو ایستل شوي دي.

د ډیلي اعلی وزیر ارویند کجریوال وايي، په جمنا کې د روانو اوبو کچه په تېرو ۴۵ کلونو کې دومره نه وه لوړه شوې. نوموړی زیاتوي دا کچه اوس ''خطرناک حد ته رسېدلې. ''

هندي چارواکي وايي، د ډیلي په شاوخوا کې د سږکال پشکال بارانونه چې په جون کې پیل شوي، ریکارډ کچې ته رسېدلي دي.

د هند ځايي رسنیو په رپوټونو کې ویل شوي، د تېرې میاشتې ورستیو کې د بارانونو له پیل راهیسې په هیماچل پردېش ایالت کې ۸۸ کسان مړه شوي دي.

د رویټرز خبري اژانس رپوټ کې ویل شوي، پر چهارشنبه هغه خلک چې د جمنا غاړو ته جونګړو کې مېشت وو، په ښار کې له چمتو شویو نژدې ۲۵۰۰ کمپونو ځینو ته لېږدول شوي دي.

اعلی وزیر اروین کجریوال خبریالانو ته په دې هکله وویل: د اوبو کچه پرلپسې زیاتېږي او د سېلاب غوندې وضعیت دی.)) نوموړي زیاته کړه، داسې احتمال شته چې د اوبو کچه به نوره هم پورته شي.

موسمي بارانونو ته په هند کې د سختې اړتیا په نظر کتل کېږي، خو په ورته مهال دا بارانونه په هند کې هر کال د سر زیان او دغه راز د ودانیو ړنګېدو یا زیانمنېدو لامل هم کېږي.

په دا وروستیو کې په هند کې خورا سخت موسمونه لیدل شوي او وروستي کمساري بارانونه هم د ګرمۍ له یوې خورا سختې څپې وروسته اورېدلي دي.

د سېلابونو راوتلو په لړ کې د ګڼ شمېر لاملونو یادونه کېږي، خو ماهرین وايي، اقلیمي بدلون چې د ځمکې تودوخې له کبله رامنځته شوی، د ګڼو بارانونو اورېدو لوی لامل دی.