پاکستان ته د روسیې د خامو تېلو لومړنۍ جوپه رسېدلې ده
د عکس سرچینه، Govt of Pakistan
د پاکستان لومړي وزیر شهباز شریف وايي، د اسلام اباد او مسکو ترمنځ د نوې هوکړې له مخې د روسیې ارزان قېمته خام تېل کراچۍ ته رسېدلي دي.
رویټرز خبري اژانس لومړی په تېره اپرېل میاشت کې ددې معاملې خبر ورکړی و. له اقتصادي پلوه د ځپل شوي پاکستان لپاره د روسیې د خامو تېلو معامله له ګټې ډکه بلل شوې ده.
شهباز شریف د خامو تېلو دا جوپه د روسیې او پاکستان ترمنځ د نویو اړیکو پیلامه بللې ده.
د پاکستان لومړي وزیر پر خپل ټوېټر لیکلي: "خوشحاله یم چې اعلانوم د روسیې د خامو تېلو لومړنۍ جوپه په تخفیف کراچۍ ته وارده شوې ده".
په داسې حال کې چې پر اوکرایین د روسیې د یرغل له کبله پر مسکو د لوېدیځ له لوري بندیزونه لګول شوي، پاکستان ته د روسیې د خامو تېلو واردېدل یو نوی بازار ګڼل کېږي.
د پاکستان د لګښت یوه لویه برخه د وارداتي سونتوکو له اړخه ده.
ویل شوي چې له لومړنۍ جوپې وروسته به پاکستان ته په ورځ د روسیې د خامو تېلو د وارداتو کچه ۱۰۰ بیرلو ته ورسېږي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
پاکستان او روسیه که یو وخت خپلو کې دوه بد سیالان و اوس د خپلمنځي ډيپلوماټیکو او اقتصادي اړیکو د نږدې کولو پلاني هڅه کوي.
په دغه کار سره نه یواځې د سیمې دودیز سیاسي او دفاعي چوکاټ بدلېږي، بلکې د مسکو د ګاز کمپنیو ته نوی بازار موندل کېږي.
دا حالت د ۱۹۸۰ کلونو اپوټه دی چې د افغان- شوروي جګړې پر مهال امریکا خپلې وسلې د پاکستان له لارې افغان مجاهدینو ته ور کولې او هغوی روسي پوځیان پرې وژل.
د امریکا او پاکستان د اړیکو په خرابېدلو پسې که د مسکو او اسلام اباد د اړیکو زیاتولو هڅې په لومړي پړاو کې دي، چین د دې تشې د ډکولو هڅه کوي.
په ۲۰۱۸ کال کې، روس او پاکستان د انرژۍ پر داسې پروژو خبرې وکړې، چې د پاکستاني چارواکو په خبره، ټول لګښت یې له لس میلیارد ډالرو ډېر دی.
