بريتانيا کې د ډيزلو بيه ريکارډ کچې ته لوړه شوې
د عکس سرچینه، Getty Images
بریتانیا کې د یو لیتر ډېزلو بیه ۱.۷۶ پونډو ته لوړه شوه. انګلستان کې د ډیزلو بیه په اوسط ډول یوه ورځ کې له ۲ پنسو څخه ډېره لوړه شوې ده.
د تېلو بیه کې دا لوړوالی پر اوکرایین د روسیې د یرغل له کبله راغلی چې د تیلو نړیوال قیمتونه یې اغېزمن کړي دي.
د تېلو بیه چې د دوشنبې په ورځ نژدې یو اعشاریه ۷۴ پونډه وه، د سې شنبې پر ورځ یو اعشاریه ۷۶ ته لوړه شوه.
د پټرولو بیه هم له شاوخوا ۱.۶۴ پونډو نژدې ۱.۶۵ پونډو ته پورته شوې چې د ریکارډ لوړې کچې ته رسېدلې.
د دې احتمال شته چې د نرخونو دوامداره لوړوالی د تېلو نړیوالې ستونزې خبرداری رامنځ ته کړي.
د انرژي نړیواله اداره (ای اي اې) وايي، دا لوړې بیې او په روسیه باندې بندیزونه " د نړۍ په کچه د تیلو د تولید ګواښ رامنځ ته کوي".
اټکل کېږي چې د نړیوالو بندیزونو په پایله کې د روسیې تیل چې هره ورځ درې میلیونه بیرله نړیوال بازار ته وړاندې کوي بند شي.
دې ادارې خبرداری ورکړی چې یوازې سعودي عربستان او متحده عربي امارات د روسیې په تولید کې د کمښت د پوره کولو لپاره کافي اضافي تولید ظرفیت لري، کوم چې په وینا یې په نړۍ کې د تیلو ترټولو لوی صادرونکی دی.
دغه اداره وايي، دمګړۍ روسیه هغه تیل صادروي، کوم چې قراردادونه یې په اوکرایین له بریده مخکې لاسلیک کړي دي.
د عکس سرچینه، Getty Images
تازه سوداګرۍ یې په ټپه درېدلې ځکه ډېری کمپنۍ هڅه کوي د تېلو پېرلو بدیلې لارې پیدا کړي. ځینو هېوادونو لکه امریکا او کاناډا د روسیې د تېلو پر وارداتو بندیز لګولی، خو برعکس اروپايي اتحادیه چې د روسیې پر انرژۍ ډېره تکیه لري، دې بندیزونو لاس تر زنې ښېنولې.
په عین حال کې، انګلستان ویلي چې دوی به د کال تر پایه پورې د روسیې د اقداماتو په ځواب کې د روسیې د تیلو واردات ودروي.
د بريتانيا لومړي وزیر بوریس جانسن سعودي عربستان او متحده عربي اماراتو ته د انرژۍ د امنیت او نورو مسلو په اړه د خبرو لپاره سفر کړی دی.
بلخوا نړیوال بازار کې د یوه بیرل خام تیلو بیه شاوخوا ۱۰۰ ډالرو ته د چارشنبې په ورځ ورسېده، له دې مخکې هغه مهال چې لوېدیځ په روسیه بندیزونه ولګول سم لاسي له ۱۳۰ ډالرو پورته شوې وه.
هغه مهال د تېلو بیې د کنترول لپاره د انرژۍ د نړیوال اژانس غړو یو څه ګامونه پورته کړل.
