سعودي کې هغه سړی خوشی شوی، چې ماشومتوب کې نیول شوی او په اعدام محکوم شوی و
د عکس سرچینه، Ja'afar B Al Nemer
سعودي عرب کې هغه سړی له زندانه خوشی شوی، چې د ماشومتوب پر مهال د احتجاجونو په تړاو د اعدام په سزا محکوم شوی و.
د سعودي عرب شیعه لږکۍ اړوند علي النمر ۲۰۱۲ کال کې د نیول کېدو پر مهال ۱۷ کلن و.
۲۰۱۴ کال کې یوې محکمې د نوموړي سر غوڅولو امر کړی و.
په تېره فبرورۍ میاشت کې سعودي پاچا د یو شمېر جرمونو لړ کې د ماشومانو لپاره د اعدام سزا پای ته ورسوله او ورسره النمر ته اورول شوې سزا هم لغوه شوه.
سعودي عرب له هغو هېوادونو یو دی چې د اعدام سزا په کې خورا ډېره عملي کېږي.
دغه هېواد کې د پروسږ کال جنورۍ او جولای میاشتو تر منځ چې دغه هېواد د جي - ۲۰ هېوادونو ټولنې مشري کوله، د سږ کال همدې موده کې لږ تر لږه ۴۰ کسانو ته د اعدام سزا ورکړه.
علي النمر د سعودي عرب د مشهور شیعه دیني عالم شیخ نمر النمر ورارده دی، چې سعودي حکومت ۲۰۱۶ کال کې د ترهګرۍ یوه قضیه کې په اعدام محکوم کړ.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
شیخ النمر د هغو احتجاجونو سخت پلوی و، چې له عرب پسرلي پاڅونه په الهام ۲۰۱۱ کال کې د سعودي ختیځو سیمو کې پیل شوي وو.
د سعودي عرب شیعه لږکۍ اړوند کسان د هغو احتجاجونو مخکښان وو، چې له اوږدې مودې راهیسې د دغه هېواد د سني شاهي حکومت له لوري یوې څنډې ته د کېدو شکایت کوي.
علي النمر د ۲۰۱۲ کال فبرورۍ کې له نیول کېدو سملاسي وروسته د ترهګرۍ ضد محکمه کې ''له واکمن سره د بې وفايي، د هېواد ضد یو شمېر شعارونو بدرګه کولو '' او پر پولیسو د ډبرو ګوزارونو په تور محکوم شوی و.
نوموړي هغه مهال پر ځان لګېدلي تورونه رد کړي وو او محکمې ته یې ویلي و، امنیتي چارواکو د زور زیاتي له لارې 'اعتراف ' ترې اخیستی.
