طالبانو دوحه کې له چینایي او هندي چارواکو سره کتلي دي

په قطر کې د طالبانو د سیاسي دفتر چارواکو د سه شنبې پر ورځ دوحه کې د چین او هند له سفیرانو سره کتلي دي.

د دې ډلې د سیاسي دفتر ویاند محمد نعیم پر خپله ټوېټر پاڼه لیکلي، د یاد دفتر مرستیال شېر محمد عباس ستانکزي او ورسره پلاوي هلته د چین له سفیر زو جیان سره افغانستان کې پر وروستیو پرمختګونو خبرې کړې دي.

ښاغلي نعیم پر خپله ټوېټر پاڼه لیکلي: "د چین هېواد سفیر وويل: دوی نوي تحول ته په مثبت نظر ګوري، د نوي حکومت جوړېدل د افعانانو خپلمنځي کار دی. چين له افعانستان سره خپلو ښو اړیکو او مرستو ته دوام ورکوي".

محمد نعیم زیاتوي چې چینایي سفیر له افغانستان سره د یو اندازه مرستو ژمنه هم وکړه.

په ورته مهال د هند د بهرنیو چارو وزارت په یوه اعلامیه کې ویلي، قطر کې د دې هېواد سفیر دیپک مېټل د سې شنبې پر ورځ هلته د طالبانو د سیاسي دفتر مرستیال شېر محمد عباس ستانکزي سره کتلي دي.

د هند د بهرنیو چارو وزارت ویلي، دا لیدنه د طالبانو په غوښتنه شوې، خو طالبانو تر اوسه په دې اړه څه نه دي ویلي.

اعلامیه کې راغلي چې په دې کتنه کې افغانستان کې د ایسارو هندي وګړو امنیت او په خوندي توګه هند ته د دوی پر ستنېدو خبرې وشوې.

هندي سفیر دې کتنه کې اندېښنه شریکه کړې چې د افغانستان خاوره باید یو ځل بیا د ترهګرۍ او هند ضد فعالیتونو لپاره ونه کارول شي.

اعلامیه کې راغلي، طالبانو هندي لوري ته ډاډ ورکړ چې دې اندېښنو ته به مثبت ځواب وایي.

یاده دې وي چې پر افغان پلازمېنه کابل د طالبانو تر ولکې وروسته چین د هغو هېوادونو په ډله کې دی چې لا یې هم کابل کې خپل سفارت فعال ساتلی.

خو له هندي چارواکو سره د طالبانو لیدنې نادره خبره ده، او ظاهراً دا یوازې دویم ځل دی چې دواړه لوري دوحه کې مخامخ کتنه کوي.

طالب مشران ټینګار کوي چې دوی د امریکا او ګاونډیو په ګډون له ټولو هېوادونو سره مثبتې اړیکې غواړي.