تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د کورونا وېروس محدودیتونو سره د کیوبا پلازمېنه او نورو ښارونو کې مظاهرې
د کیوبا پلازمېنه هاوانا او نورو ښارونو کې زرګونه خلک د دغه هېواد د کمونېست حکومت پرضد مظاهرو سره یو ځای شول.
خواله رسنیو کې انځورونه ښيي چې د یکشنبې په ورځ خلک مظاهرو کې د کووېډ-۱۹ واکسین، ازادۍ او ولسواکۍ شعارونه ورکوي.
د برېښنا پرچاوي هم د مظاهرو بل لامل دی.
کیوبا کې دا کمسارې مظاهرې په داسې مهال دي چې دغه هېواد کې کورونا اوج ته رسېدلې ده.
د کیوبا ولسمشر میګل دیاز کانل تلوېزوني وینا کې کیوبايي-امریکايي مافیا د دې نارامۍ په پلانولو تورنه کړې ده.
په دا مهال د کیوبا کمونېست حکومت ملاتړو هم هاوانا کې د دې مظاهرو پرضد لاریون کړی دی.
په سان انتونیو دلوس بانوس ښار کې یو لاریونوال فرانس خبري اژانس ته ویلي: ''خلک د خوړو او برېښنا حالت غوسه کړي دي. ''
رپوټونه وايي، په پلازمېنه هاوانا کې پولس او پوځ ګومارل شوي او پولیسو پر ځینې لاریونوالو د مرچ سپري پاشلې ده.
د کیوبا د حکومت مخالفان دا مظاهرې تېرو ۳۰ کلونو کې د حکومت ضد تر ټولو سترې مظاهرې بولي.
کیوبا په لاتینه امریکا کې یواځنی هېواد دی چې کورونا واکسین یې تولید کړی دی.
دغه هېواد له کورونا وېروس سره د مقابلې لپاره دوه واکسین تولید کړي او له ۱۱.۷ میلیون وګړو یې ۱.۷ میلیون کسان واکسین شوي دي.
د کیوبا حکومت د جمعې په ورځ د عبدالله-۲ په نوم خپل ځايي واکسین د بېړنۍ کارونې لپاره تایید کړ.
د دې واکسین تخنیکي نوم CIGB-66 دی.
په دې واکسین اېښودل شوی عبدالله نوم د کیوبا خپلواکۍ د اتل خوزه مارتي له حماسي شعر اخیستل شوی دی.
